Nihimyas 11 - Hanunuu

Ti manga Mag-ulian sa Hirusalim

¹ Ati katpung pag panahun, ti manga takinan nasakupan Israil mag-ulian sa Hirusalim, sa banal pag banwa. Naglunggungan ti manga nasakupan hampay sa kada sampulu ka magtal-anakan may usa ka magtal-anakan mangulian sa Hirusalim, habang ti nasawad matayak sa kanda manga banwa.

² Dinayaw manga tawu ti tanan nagbuluntad mangulian sa Hirusalim.

^3-4 Ti iba pag manga Israilita, ag ti manga manughandug, ti manga Libita, ti manga suruguun sa Balay Diyus, hanggan ti manga lahi manga suruguun ni Sulumun, parargu nangulian sa kanda sadili manga daga sa tuhay-tuhay pag manga banwa sa Huda. Ti iba waya pag manga nasakupan Huda hanggan Binhamin nangulian sa Hirusalim. Inda ti manga takinan manga purubinsiya Huda hanggan Binhamin nangulian sa Hirusalim. Ginan sa lahi ni Huda: si Ataya kay anak ni Usyas (si Usyas kay anak ni Sakaryas; si Sakaryas kay anak ni Amarya; si Amarya kay anak ni Sipatyas; ag si Sipatyas kay anak ni Mahalalil ginan sa linahi ni Paris);

⁵ si Maasiyas kay anak ni Baruk (si Baruk kay anak ni Kul Husi; si Kul Husi kay anak ni Hasayas; si Hasayas kay anak ni Adayas; si Adayas kay anak ni Huyarib; ag si Huyarib kay anak ni Sakaryas ginan sa linahi ni Sila).

⁶ (Sa manga linahi ni Paris may 468 ka marabisug pag manga lalaki mag-uli diman sa Hirusalim.)

⁷ Ginan sa lahi ni Binhamin: si Salu kay anak ni Misulam (si Misulam kay anak ni Huid; si Huid kay anak ni Pidaya; si Pidaya kay anak ni Kulaya; si Kulaya kay anak ni Maasiyas; si Maasiyas kay anak ni Ityil; ag si Ityil kay anak ni Hisayas);

⁸ kay sunud sa kan Salu si Gabay ag si Salay. Kay kayamuun manga Binhaminita 928 tanan.

⁹ Si Huwil kay anak ni Sikri imaw kanda pinagkatakinan ag kay ikadwa si Huda kay anak ni Hasinwa.

¹⁰ Ginan sa manga manughandug: si Hidaya kay anak ni Huyarib, si Hakin,

¹¹ ag si Siraya kay anak ni Hilkiyas (si Hilkiyas kay anak ni Misulam; si Misulam kay anak ni Saduk; si Saduk kay anak ni Mirayut; ag si Mirayut kay anak ni Ahitub ti pangulu sa Balay Diyus);

¹² kanda kaibahan 822 ka lalaki magsirbi sa Balay Diyus; si Adayas kay anak ni Hiruham (si Hiruham kay anak ni Pilaliya; si Pilaliya kay anak ni Amsi; si Amsi kay anak ni Sakaryas; si Sakaryas kay anak ni Pasur; ag si Pasur kay anak ni Malkiyas);

¹³ ti manga kaibahan ni Adayas 242 ka lalaki manga takinan manga magtal-anakan; si Amasay kay anak ni Asaril (si Asaril kay anak ni Asay; si Asay kay anak ni Misilimut; si Misilimut kay anak ni Imir);

¹⁴ ti manga kaibahan ni Amasay 128 ka lalaki may manga kakayahan. Kanda pinagkatakinan si Sabdiyil kay anak ni Hagidulim.

¹⁵ Ginan sa manga Libita: si Simaya kay anak ni Hasub (si Hasub kay anak ni Asrikam; si Asrikam kay anak ni Hasabya; ag si Hasabya kay anak ni Buni);

¹⁶ si Sabitay ag si Husabad, imaw ti duwa ka takinan manga Libita, ti manga piniyaran mandumara sa manga buruwatun sa luwas Balay Diyus,

¹⁷ Si Matanyas kay anak ni Mika (si Mika kay anak ni Sabdi, ag si Sabdi kay anak ni Asap). Si Matanyas ti magpanguna sa manga manugkanta sa magkanta darangin ag pasalamat. Si Bakbukya kaibahan ni Matanyas. Si Abda kay anak ni Samwa. (Si Samwa kay anak ni Hidutun.)

¹⁸ May 284 tanan ti manga Libita mag-uli sa Hirusalim, ti banal pag banwa.

¹⁹ Ginan sa manga guwardiya manga sabian Balay Diyus: si Akub ag si Talmun, hanggan kanda manga kaibahan manga 172 ka lalaki guwardiya.

²⁰ Kay iba pag manga Israilita, hanggan manga manughandug ag manga Libita, nangulian sa manga daga minana nida sa kanda manga ginurang sa tuhay-tuhay pag manga banwa sa Huda.

²¹ Dapat ti manga suruguun sa Balay Diyus pagpangunahan nida ni Siha ni Gispa ati pag nangulian sa tagudtud Upil.

²² Ti pinagkatakinan manga Libita sa Hirusalim si Usi kay anak ni Bani. (Si Bani kay anak ni Hasabya; si Hasabya kay anak ni Matanyas; ag si Matanyas kay anak ni Mika.) Si Usi usa sa manga linahi ni Asap, ti manugkanta sa Balay Diyus.

²³ Ti hari ti magsugu sa manga manugkanta tungkul sa manga buruwatun nida kada sirang.

²⁴ Si Pitahiya kay anak ni Misisabil, usa sa manga linahi ni Sira kay anak ni Huda, imaw ti kinatawan banwa Israil sa hari Pirsiya.

²⁵ Kay iba pag manga nasakupan Huda nangulian sa manga banwa arani sa kanda manga daga. Kay iba sa kanda nangulian sa Kiryat Arba, sa Dibun, sa Hikabsiil, hanggan sa manga baryu sa sangput inda pag manga banwa.

²⁶ Ti iba sa kanda nangulian sa Hisuwa, sa Mulada, sa Bit Pilit,

²⁷ sa Hasar Suwal, sa Biirsiba hanggan sa manga baryu sa sangput inda.

²⁸ May imaw diman sa kanda nangulian sa Siklag, sa Mikuna hanggan sa manga baryu sa sangput inda,

²⁹ sa In Rimun, sa Sura, sa Harmut,

³⁰ sa Sanwa, sa Adulam, ag sa manga baryu sa sangput inda pag manga banwa. Ti iba waya gid sa kanda nangulian sa Lakis hanggan sa arani manga katanmanan, ag sa Asika hanggan sa manga baryu sa sangput inda. Nakan nangulian ti manga tawu sa Huda ginan sa Biirsiba tugka sa Luung Bin Hinum.

³¹ Ti iba pag manga nasakupan Binhamin nangulian sa Giba, sa Mikmas, sa Aya, sa Bitil ag sa manga baryu sa sangput inda.

³² Ti iba sa kanda nangulian sa Anatut, sa Nub, sa Ananiyas,

³³ sa Hasur, sa Rama, sa Gitaim,

³⁴ sa Hadid, sa Sibuyim, sa Nibalat,

³⁵ sa Lud, sa Unu, hanggan sa Luung manga Manugbuwat.

³⁶ Ti iba pag manga Libita nangulian sa Huda ipinatahan kaibahan ti manga nasakupan Binhamin.