Nihimyas 10 - Hanunuu

¹ Ti un-an nagpirma si Gubirnadur Nihimyas kay anak ni Hakalyas, ag si Sidikyas.

^2-8 Ti nagpirma pag manga manughandug sida ni Siraya, ni Asariyas, ni Hirimyas, ni Pasur, ni Amaryas, ni Malkiyas, ni Hatus, ni Sibanyas, ni Maluk, ni Harim, ni Mirimut, ni Ubadyas, ni Danyil, ni Ginitun, ni Baruk, ni Misulam, ni Abyas, ni Miyamin, ni Maasiyas, ni Bilgay ag ni Simaya.

^9-13 Ti manga Libita nagpirma sida ni Hisuwa kay anak ni Asanyas, ni Binuy ginan sa magtal-anakan ni Hinadad, ni Kadmiyil, ni Sibanyas, ni Hudiyas, ni Kilita, ni Pilayas, ni Hanan, ni Mika, ni Rihub, ni Hasabyas, ni Sakur, ni Siribya, ni Sibanyas, ni Hudiyas, ni Bani ag ni Bininu.

^14-27 Ti manga takinan nagpirma sida ni Parus, ni Pahat Muab, ni Ilam, ni Satu, ni Bani, ni Buni, ni Asgad, ni Bibay, ni Aduniyas, ni Bigbay, ni Adin, ni Atir, ni Isikyas, ni Asur, ni Hudiyas, ni Hasum, ni Bisay, ni Harip, ni Anatut, ni Nibay, ni Magpiyas, ni Misulam, ni Hisir, ni Misisabil, ni Saduk, ni Hadwa, ni Pilatyas, ni Hanan, ni Anayas, ni Husyas, ni Hananiyas, ni Hasub, ni Haluhis, ni Pilha, ni Subik, ni Rihum, ni Hasabna, ni Maasiyas, ni Ahiyas, ni Hanan, ni Anan, ni Maluk, ni Harim, ag ni Baana.

Ti Kasunduan

²⁸ Ti iba waya pag nasakupan Israil, hanggan ti manga manughandug, manga Libita, manga guwardiya sa sabian Balay Diyus, manga manugkanta, manga suruguun sa Balay Diyus, hanggan ti tanan napablag sa manga day-uhan mag-uli sa kanmi daga hampay sumunud sa Kasuguan Diyus, hanggan kanda manga asawa ag manga anak may intindi yi,

²⁹ nagsumpa kaibahan nimi manga takinan, kuntay kanmi tupadun ti Kasuguan ipinakaun Diyus sa panab-anan niya manugsirbi si Muysis. Nagsumpa diman kami tanggapun nimi ti saad Diyus nu balaw nimi matupad kanmi itinaratu kuntay sundun ti tanan sugu hanggan manga surundanun Panginuun nimi Diyus.

³⁰ Nagtaratu kami balaw nimi pahintulutan makaasawa kanmi manga anak sa manga day-uhan mag-uli sa kanmi daga.

³¹ Nagtaratu diman kami kuntay balaw kami mamili nu ipabili manga day-uhan kanda tirigu ngatay una hintay pag manga pag-ipabili sa Sirang Pamahari ngatay sa iba banal pag sirang. Ag kada ikapitu pag timpu, balaw kami mananum sa kanmi daga, bag-u balaw yi nimi suktun ti manga nakautang sa kanmi.

³² Nagtaratu waya gid kami kuntay tupadun nimi ti sugu pumakaun kami kada timpu upat ka guhit pilak para sa buruwatun sa Balay Diyus nimi Diyus.

³³ Nakatigana inda para sa tinapay pag-isagda sa atubangan Diyus, sa manga handug pagsunugun hanggan manga handug pagkilala sa Panginuun pag-isagda sirang-sirang, sa manga handug para sa Sirang Pamahari, para sa Pista Lapus Lati, ag sa iba waya pag manga pista, hanggan sa iba waya manga banal pag handug parihu sa handug sa paglumpiyu pag-ihandug hampay malukat ti nasakupan Israil sa kanda manga kasalanan. Paggamitun diman inda pag kuwarta sa iba waya pag manga pangangailangan sa Balay Diyus nimi Diyus.

³⁴ Nanlunggungan kami tanan, hanggan ti manga manughandug nimi ag manga Libita, hampay maalaman nimi nu kapira pag mandara pamagba ti kada magtal-anakan kada timpu hampay gamitun sa manga handug sa harandugan Panginuun nimi Diyus, angay sa nakasurat sa Kasuguan.

³⁵ Nagtaratu diman kami kuntay darahun nimi kada timpu sa Balay Diyus Panginuun ti un-an pag ani nimi tanman hanggan ti un-an pag burak nimi tanum.

³⁶ Darahun diman nimi sa manga manughandug magsirbi sa Balay Diyus nimi Diyus kanmi panganay pag anak lalaki, hanggan ti un-an anak nimi manga baka, karanidu, ag kambing, angay sa nakasurat sa Kasuguan.

³⁷ Nagtaratu waya gid kami kuntay darahun nimi sa manga manughandug ti pinakamarinu pag kalasi nimi arina hanggan iba waya pag manga handug bilang pagkilala sa Panginuun, hampay ipauli sa haramnuan sa Balay Diyus. Darahun diman nimi ti pinakamayad nimi pag manga burak kayu, hanggan ti pinakamarinu pag irinmun intus ag lana ulibu. Darahun diman nimi sa manga Libita ti ikasampulu nimi manga patubas, dahil sida ti maglikum manga ikasampulu sa tanan banwa may manga katanmanan. Nu manlikum manga ikasampulu ti manga Libita,

³⁸ pag-ibahan sida manga manughandug ginan sa lahi ni Aarun. Ag ti ikasampulu nalikum darahun manga Libita sa haramnuan sa Balay Diyus nimi Diyus.

³⁹ Ti manga Israilita, hanggan yi ti manga Libita kailangan magdara manga handug tirigu, irinmun ubas, hanggan lana ulibu sa haramnuan nu naan pag nakapauli ti manga kagamitan Balay Diyus hanggan nu naan mag-ulian ti magsirbi pag manga manughandug, ti manga guwardiya manga sabian Balay Diyus, hanggan ti manga manugkanta. Nakan nagtaratu kami balaw nimi pabay-anan ti Balay Diyus nimi Diyus.