Nihimyas 1 - Hanunuu

¹ Inda ti tultulanun tungkul sa manga binwat ni Nihimyas kay anak ni Hakalyas. Katpung ikasiyam pag bulan, sa bulan Kislib, sa ika-20 pag timpu katpung kay maghari ni Artasirsis sa Pirsiya, ati aku sa may alad batu banwa Susa.

Ti Darangin ni Nihimyas para sa Hirusalim

² Nag-ati sa kangku ti usa sa manga patar-ari niku, si Hanani, ginan sa Huda kaibahan ti pira ka manga lalaki. Pinaingana niku sida tungkul sa Hirusalim hanggan sa manga Hudiyu nakabalik ginan sa pagkabihag sa Babilunya.

³ Sinmagut sida, “Magkakurian gid ti manga nakabalik sa Huda, pagpuyaan sida manga tawu sa palibut nida. Ag tugka taynguna, daut waya ti alad batu Hirusalim hanggan sunug kay manga sabian inda.”

⁴ Pagka nasaydan niku tida, tinmukaw aku ag nanlumi. Pira ka sirang magpanrukuan aku, unman maghandum karan-unun, hanggan nandarangin sa atubangan Diyus sa langit.

⁵ Magkun aku, “Panginuun, Diyus sa langit, makamaskihan kawu ag makadululaw pag Diyus. Pagtupadun nimu kanmu kasunduan may pagmahal sa manga magmahal sa kanmu ag magtupad sa kanmu manga sugu.

⁶ Aku kanmu manugsirbi magdarangin sirang yabi para sa nasakupan Israil kanmu manga manugsirbi. Patingihi aku ag saguta kang darangin. Pag-ipaburayhaw niku sa kanmu ti manga kasalanan nimi manga Israilita, hanggan kang manga kasalanan ag ti manga kasalanan niku manga ginurang.

⁷ Masyadu daut kanmi binwat laban sa kanmu. Unman nimi tinupad kanmu manga sugu ag manga surundanun ipinakaun nimu sa kanmi sa panab-anan ni Muysis kanmu manugsirbi.

⁸ “Alalahana duy nimu kanmu sinabi kaybi sa kan Muysis magkun: ‘Nu kamu pag manga Israilita balaw magmatinupadun sa kangku, wayakun niku kamu sa tuhay-tuhay pag manga nasyun.

⁹ Dapat nu bumalik kamu sa kangku ag tumupad sa kang manga sugu, una magkarawayak waya kamu sa arayu pag rugar, tipunun maan niku kamu sa rugar pinili niku hampay paggalangun aku.’

¹⁰ “Kami kanmu manga manugsirbi ag nasakupan kanmu irinibri sa panab-anan nimu kamaskihan ag kabisugan.

¹¹ Panginuun, patingihi kang darangin, kanmu manugsirbi, hanggan ti darangin iba waya nimu manga manugsirbi magbaya sa maggalang sa kanmu. Pakan-i aku taynguna panalu sa kang turunu sa hari. Ag kaayadan mana kay ipakakit niya sa kangku.” Ati katpung, aku ti tagatunghul intus sa hari.