Nahum 3 - Hanunuu

Kaawaawa ti Ninibi

¹ Kaawaawa ti daka pag banwa Ninibi. Kay manga nasakupan manmamatay tawu, ag manga pudilun sida. Mayamu kanda manga pinangaghas kasiyunan sa iba, unman sida magkaduraan talaluhun.

² Girahun gid sida nida kalaban. Masaydan nida ti lagitis manga latigu sa manga kabayu, ti magkarayakaan manga gulung manga kalisa, ti talagalpakan manga lulud manga kabayu, hanggan ti dalaguldulan manga kalisa.

³ Makitan nida ti magsugud manga manugkabayu, ti magsinglaw manga baladaw hanggan manga bangkaw, ag ti subra mayamu manga namatay nagtumpuk. Mag-iritakid waya ti manga sundalu sa manga namatay.

⁴ Mangyari inda sa Ninibi dahil parihu siya sa babayi pauman-uman magpabili kay sadili bilug. Maggarya siya hanggan maggayuma. Nakan magkagarya niya ti manga nasyun agud pumasakup sa kanya.

⁵ Taynguna, ti Panginuun Makamaskihan magkumun, “Pagpatingi kamu manga taga Ninibi! Kalaban niku kamu! Nakan pakay-ahun niku kamu sa atubangan manga nasyun hanggan manga kaharian parihu sa babayi kinalunkun kay rutay tugka sa ulu ag nakitan kay kauyaan.

⁶ Kadat-an niku kamu parihu sa usa ka tawu tinaplakan paruk. Nakan mamantay sa kanyu ti manga tawu ag yagtingun.

⁷ Ti tanan makakit sa kanyu manlaklak ag sumabi, ‘Nadaut yi ti Ninibi. Unman may manlumi ngatay may mamasulung sa kanya.’ ”

⁸ Mas mayad aw lugud ti Ninibi kaysa banwa Tibis arani sa may Sapa Nilu? Inda pag sapa ti pinagkaalad batu Tibis imaw ti pinagkapanangga.

⁹ Ti Itiyupya hanggan ti buu Ihiptu ti pagsarigan kabisugan Tibis, ag kay isip niya pumirmaminti inda hanggan aban. Ti Put ag ti Libya kakampi niya pag manga nasyun.

¹⁰ Dapat maaw binihag diman kay manga nasakupan ag dinara sa iba rugar. Pinanrunut kanda dariit manga anak sa manga dalan. Ginapus tarikada kanda bantug pag manga nasakupan ag hinuray hampay buwatun manga suruguun sa panab-anan lunggungan.

¹¹ Katunda diman sa kanyu manga taga Ninibi, bumaliw kamu parihu sa langu unman may alam nu hintay ti magpangyari. Girahun diman kamu niyu kalaban ag manhanap kamu paratag-an sa balaw kamu madakup.

¹² Ti tanan may alad batu pag manga banwa niyu bumaliw parihu sa puun igus ti un-an pag manga burak lutu yi; ag nu haluun magkararagdag kay manga burak ag mahimu yi kan-un.

¹³ Bantayi niyu kanyu manga sundalu; ga manga babayi sida! Ti manga talakup sabian niyu banwa magkarairub, nakan maalwan yi inda suldun niyu manga kalaban.

¹⁴ Pag-alistu yi kamu sa pagras-ug niyu manga kalaban. Pagtipun yi kamu danum. Papag-unun niyu kanyu manga alad batu sa sangput niyu banwa. Pagbuwat kamu manga daga pinaganit ag kaayada niyu inda pag manga alad batu.

¹⁵ Dapat ati ngapu sa kanyu ulian magkaramatay kamu sa apuy hanggan sa baladaw, parihu sa tanman pagrugpuan manga apan. Nag-aduk kamu parihu sa manga apan!

¹⁶ Pinayamu niyu kanyu manga manugnigusyu subra waya sa manga pamgasan sa langit. Dapat bumaliw sida ga manga apan igu natabu ti manga tanum maglayang yi tag sa arayu.

¹⁷ Kanyu manga guwardiya hanggan manga takinan ga apan yi kay kayamu, mag-apun sa manga alad batu nu maramig ti panahun. Dapat nu magsinggit yi ti init, maglayang sida tag sa arayu ag unman may alam nu naan tabug sida.

¹⁸ Hari sa Asirya, magkaramatay kanmu manga takinan. Magkarawayak kanmu nasakupan sa manga kabantudan, ag unman may manipun sa kanda.

¹⁹ Bumaliw kawu parihu sa tawu nabiyagan balaw yi magkaayadan. Ti tanan makabarita sa kanmu nadangtan mamalakpak sa kabayaan, dahil sida tanan nakalakaw sa kanmu kahigpitan.