Nahum 2 - Hanunuu

Ti Pagkaruris Buu Ninibi

¹ Manga taga Ninibi, paggirahun yi kamu niyu manga kalaban manwayak sa kanyu. Nakan pabantayi niyu kanyu manga alad batu banwa hanggan diman kanyu manga dalan! Tipunun niyu kanyu manga sundalu ag humanda kamu sa paggira!

² Dahil una kanyu rinuris ti Israil hanggan ti Huda parihu sa nagkaramatay manga pananum ubas, ibalik di Panginuun ti kapangyarihan Israil.

³ Marara ti panangga hanggan ti rutay manga sundalu kalaban niyu. Ag sa udas maggira sida magsinglaw kanda manga galang kalisa ag magkararadkadan kanda manga kabayu.

⁴ Maghagunung kanda manga kalisa sa manga karsada, mag-atabug ag mag-ataytag sa manga palasa. Magrayaw inda parihu sa sulu hanggan magkislap parihu sa kilat.

⁵ Pagsuguun hari ti manga takinan manga sundalu. Mag-iridapa waya sida sa masyadu mag-apura makapakarani sa kanyu manga alad batu hampay paulian pandung panangga para sa manga sundalu manugdaut sa alad batu niyu.

⁶ Bumukas ti manga puwirtahan niyu banwa baliwa sa may sapa ag madaut kanyu balay hari.

⁷ Itinagka yi bihagun kamu ag darahun sa iba rugar. Man-ngayung kanyu manga panawuhun babayi ga manga kalampati habang pagtaptapun nida kanda dubdub sa subra karukuan.

⁸ Ti manga tawu magpalagiw ginan sa Ninibi ga danum lang magbulus ginan sa nabuswang tambung. Ti manga magpalagiw pagpabalikun nida manga kaibahan dapat unman yi gid may nagbalik.

⁹ Kamu pag manga manuggira sa Ninibi, pamul-a niyu ti manga pilak ag gintu sa inda pag banwa punu kayamanan.

¹⁰ Maruris, madaut, ag mamanglaw yi ti Ninibi! Nakan pagkulbaan ti manga mag-uli siyun; pagtakigan kanda manga tuud hanggan kanda tanan bilug, ag magpanlapsi yi sida tanan.

^11-12 Ti Ninibi parihu sa lukib pag-ulian usa ka magtal-anakan liyun. Unman gid may makagaraw sa kanda ati sa lukib. Pagmatyun ag paggus-abun liyun kay bulay ag pag-iayaw sa kay kaparihu hanggan sa kay manga anak. Pagpun-un niya manga binulay kay ulian lukib. Dapat taynguna, ti Ninibi rurisun yi.

¹³ Dahil magkun ti Panginuun Makamaskihan, “Pagpatingi kamu manga taga Ninibi! Kalaban niku kamu! Nakan sunugun niku kanyu manga kalisa ag mamatay kanyu manga sundalu sa labanan. Amparahun yi niku kanyu magpandahas sa kalibutan. Balaw yi kamu makapadara manga manugbarita sa iba manga nasyun agud makabarita sa kanda nu hintay kanyu pagkaibgan ipabuwat sa kanda.”