Nahum 1 - Hanunuu

¹ Ti tultulanun sa inda pag ribru tungkul sa Ninibi. Inda ti ipinasandam Panginuun sa kan Nahum taga Ilkus.

Ti Pangagalit Diyus sa manga Taga Ninibi

² Balaw magkaibug ti Panginuun Diyus mansamba ti manga tawu sa tuhay pag manga diyus. Galit siya sa kay manga kalaban ag balusan niya sida.

³ Balaw siya madali magkagalit, dapat makamaskihan gid siya ag pihu parusahan niya ti nagkasala. Nu maglakaw siya maghagunung ga bagyu mabaskug. Ti manga rurum ga galbuk lang mag-asbuk sa kay manga lulud.

⁴ Sa kay lang bagaw magkak-at ti manga dagat una ti manga sapa, ag magkarubay ti manga pananum sa Basan, hanggan sa Bantud Karmilu ag sa Libanun.

⁵ Sa kay atubangan magkahalu ti kalibutan, hanggan ti manga bantud, una ti manga tawu sa kalibutan pagtakigan.

⁶ Hintay waydi ti umagwanta sa kay masyadu pag pangagalit? Nu magkagalit siya ga magbuga siya apuy, una manga batu magkarapugdak sa kay atubangan.

⁷ Mayad ti Panginuun; marig-un siya pag darangpan sa udas kakurian, ag pag-alagaan niya ti magdangup sa kanya.

⁸ Parihu siya sa mabisug pag baha manabu manruris sa kay manga kalaban. Bukadun niya kay manga kalaban tugka sa mamatay niya sida.

⁹ Manga taga Asirya, una hintay kanyu pag-isipun daut laban sa nasakupan Panginuun, duraun di tunda Panginuun, ag balaw yi maulit.

¹⁰ Parihu kamu sa manga langu masabudan sa dugihan pag halaman. Rurisun gid kamu parihu sa magtutud dayami.

¹¹ Ti usa sa kanyu manga takinan nag-isip daut laban sa nasakupan Panginuun. Daut kay pag-ipatigayun.

¹² Inda ti pagsabihun Panginuun sa manga taga Huda: “Una mayamu ag mabisug kanyu kalaban manga taga Asirya, rurisun niku sida hanggan sa matabu. Una kaybi pinakurian niku kamu udyi niku inda ulitun.

¹³ Nakan taynguna palpasan niku kamu ginan sa kapangyarihan manga taga Asirya.”

¹⁴ Inda ti pagsabihun Panginuun sa manga taga Asirya: “Duraun niku kanyu manga linahi ag dautun niku kanyu manga diyus-diyusan kayu ngatay galang sa balay niyu diyus. Ialistu yi niku kanyu manga lulubngan dahil balaw yi kamu kailangan mabuhi.”

¹⁵ Bantayi niyu manga taga Huda! May magras-ug manugbarita ginan sa manga kabantudan manultul mayad pag barita hanggan kahusayan sa kanyu rugar. Nakan idaus niyu kanyu manga pista ag tupada niyu kanyu manga taratu sa Panginuun. Dahil ti daut pag nasyun Asirya balaw yi gid gumira sa kanyu, dahil rurisun sida tanan.