Mikas 7 - Hanunuu

Ti Kadautan manga Israilita

¹ Magkun si Mikas, “Kaawaawa aku! Ga tawu aku magkalun-us maghanap manga nasawad burak ubas ngatay igus dapat ay unman aku may nakitan una di usa.

² Ti ibug niku sabihun, unman yi aku may nakitan tawu sa Israil matinupadun sa Diyus. Udyi may nasawad tawu matadlung. Ti kada usa maghanap paraan hampay matyun kay kasimanwa, ga tawu mag-alistu suduk sa bulayun niya pag hayup.

³ Antigu sida magbuwat kadautan. Ti manga takinan ag manga talaghusay magtanggap upa. Magsunud lang sida sa gustu manga tawu bantug ag may kapangyarihan. Magkarausa sida hampay baliktadun ti katadlungan.

⁴ Ti pinakamayad sa kanda parihu lang sa ilamnun unman may pakinabang. Rinmas-ug yi ti kaudasan parusa Diyus sa inda pag manga tawu, ga kay binagaw sa panab-anan manga purupita ga manga guwardiya sa bantayaw. Rinmas-ug yi ti kaudasan nida pagkalitu.

⁵ “Dahil sa lantap yi ti kadautan, danga yi kamu magpaniwala sa kanyu kaparihu una sa kanyu kakilala. Pagdahan kamu sa kanyu pagsabihun sa iba una sa kanyu pagmahalun pag asawa.

⁶ Dahil sa kainda katpung, ti anak lalaki udyi maggalang sa kay ama, ti anak babayi maglaban sa kay ina, ti umagad babayi maglaban diman sa kay manugang babayi. Ti kalaban usa ka tawu kay yi kasunu balay.

⁷ “Dapat aku sumarig di sa Panginuun niku Diyus. Mag-alagad aku sa kanya hampay iribri niya aku. Ag pihu patingihan niya kang darangin.”

Iribri Panginuun ti manga Israilita

⁸ Magkun ti manga Israilita, “Balaw dapat kita surugun nita manga kalaban. Dahil una nadiyaan kita, bumangun di maan kita. Una sa madulum kita, ti Panginuun kanta sulu.

⁹ Dahil nagkasala kita sa Panginuun, kailangan nita agwantahun kay parusa sa kanta tugka sa kampihan niya kita ag pakan-an katadlungan. Makitan nita kay pagribri sa kanta sa panab-anan pagdara niya sa kanta tag sa karayawan.

¹⁰ Makitan inda nita manga kalaban ag mangay-a sida. Dahil pagpuyaan nida kita kaybi. Magkun sida, ‘Naan yi ti Panginuun niyu Diyus?’ Udyi dugay makitan nita ti kadamhakan nida. Bumaliw sida ga lutuk tatatataan sa karsada.”

¹¹ Magkun si Mikas sa manga taga Hirusalim, “Rumas-ug ti sirang ipatindug maan niyu kanyu manga alad batu, ag lalu dumaka kanyu magkaakupahan daga.

¹² Sa tunda diman pag manga kaudasan, umatag sa kanyu ti manga tawu ginan sa Asirya hanggan sa manga banwa Ihiptu, bag-u ginan sa Ihiptu tugka sa Sapa Iyupratis, hanggan ginan sa ararayu pag manga rugar.

¹³ Bumaliw mapanglaw pag rugar ti manga nasyun sa kalibutan dahil sa kadautan manga mag-ulian siyun.”

Magdarangin ti manga Israilita Kaawai Sida Diyus

¹⁴ Magdarangin ti manga Israilita magkun, “Panginuun, bantayan nimu kami kanmu manga nasakupan parihu sa magbantay manug-alaga sa kay manga karanidu. Ti manga daga sa kanmi palibut may marinu pag pasturan, dapat kami magkabuhi sa pangawakawaan kami-kami lang. Padakaa maan nimu kanmi magkaakupahan daga tugka sa Basan ag sa Gilyad parihu ga kaybi.

¹⁵ Pagpakakit kawu sa kanmi manga makadululaw ga kanmu diman binwat katpung ipinalwas nimu kami sa Ihiptu.

¹⁶ Inda makitan manga nasyun ag mangay-a sida madi makapangyarihan sida. Ag udyi sida mamatingi aw ngatay mamagaw manga pamuya sa kanmi.

¹⁷ Manyapang sida sa daga ga ulay dahil sa masyadu pag kay-a. Pabulwat sida sa ukang daga pagtakigan sa dala sa kanmu, Panginuun nimi Diyus.

¹⁸ Udyi may tuhay Diyus parihu sa kanmu. Pinatawad nimu ti kasalanan nasawad nimu pag manga nasakupan kanmu magkaapu. Balaw magpirmaminti kanmu pangagalit hanggan aban dahil magbaya di kawu magmahal sa kanmi.

¹⁹ Kaawaan di maan nimu kami ag bul-un nimu ti tanan nimi manga kasalanan. Tat-an nimu inda ag iyamut sa kaabasad-basadan dagat.

²⁰ Ipakakit nimu kanmu pagmahal ag matinupadun sa kanmi sa manga linahi ni Abraham hanggan ni Hakub, parihu sa kanmu itinaratu sa kanda kaybi.”