Mikas 6 - Hanunuu

Ti Bangdan Panginuun Laban sa manga Israilita

¹ Magkun si Mikas: Patingihi niyu ti pagkumnun Panginuun sa kanyu manga Israilita: “Malu, tultulan niyu kanyu kasaba, padnugan niyu sa manga bantud ag manga tagudtud kanyu sarabihun.

² Ag kamu pag manga bantud, mapag-un pag manga patakinan kalibutan, patingihi niyu ti bangdan Panginuun laban sa manga Israilita kay manga nasakupan.”

³ Magkun ti Panginuun, “Manga nasakupan niku, hintay ti nabwat niku pag kadautan sa kanyu? Pinakurianan aw lugud niku kamu? Saguta niyu aku.

⁴ Ipinalwas waya ngani niku kamu sa Ihiptu, nu naan kamu pag binwat panawuhun. Pinili niku sida ni Muysis, ni Aarun, ag ni Miryam hampay giyahan kamu.

⁵ Manga nasakupan niku, alalahana diman niyu sinugu ni Hari Balak taga Muab si Balaam kay anak ni Biyur kuntay saadi kamu. Dapat pinabagaw niku si Balaam manga papalad sa kanyu. Alalahana diman niyu nu kabitay niku kamu inawatan katpung sa kanyu maglakaw ginan sa Sitim tugka sa Gilgal. Alalahana niyu inda pag manga nangyari hampay maalaman niyu kuntay irinibri niku kamu.”

⁶ Sinmagut ti usa ka Israilita, “Unu ti ihandug niku sa Panginuun, ti Diyus sa langit, nu mansamba aku sa kanya? Mansagda aw aku ibun baka bilang handug pagsunugun?

⁷ Makabaya aw nguna ti Panginuun nu handugan niku siya linibu-libu karanidu ag magralapwas pag lana ulibu? Ihandug aw nguna niku sa kanya kang anak panganay bilang kabaydanan niku manga kasalanan?”

⁸ Sinmagut si Mikas: “Tinudluan yi kita Panginuun nu hintay ti mayad. Inda ti gustu niya buwatun nita: Buwatun nita ti matadlung, palabihun nita ti maawaun sa iba ag pagmapinakumbabaun kita sa pagsunud sa kanta Diyus.”

Parusahan Panginuun ti manga Israilita

⁹ Patingihi niyu ti pagsabihun Panginuun sa banwa Hirusalim, dahil ti maggalang sa kanya imaw ti may tutuu pag kadunungan. “Kamu pag manga nibilang sa lahi ni Huda, pagtiripnan kamu sa banwa Hirusalim ag pagpatingi.

¹⁰ Daut kamu pag nasakupan! Unman niku magkalimtan ti manga tinipun niyu pag kayamanan sa daut pag paraan. Maggamit kamu madaya pag salupan. Inda pag buruwatun kang pagkadat-an.

¹¹ Balaw mahimu pabay-anan lang niku kamu sa manga pandaya niyu sa kanyu timbangan.

¹² Maapi-api kanyu mayaman pag manga tawu, ag manga pudilun kamu.

¹³ Nakan inumpisahan niku rurisun kamu bilang parusa sa kanyu manga kasalanan.

¹⁴ Mangaun kamu, dapat unman kamu mabsug; paglun-usun di kamu. Manhamnu kamu kanyu manga inani, dapat unman niyu inda mapakinabangan, dahil ipaagaw niku tunda sa kanyu manga kalaban.

¹⁵ Mananum kamu, dapat balaw kamu ti umani. Magpigis kamu manga ulibu, dapat balaw kamu ti pumakinabang kay lana. Magpigis diman kamu burak niyu manga ubas, dapat balaw kamu ti uminum kay pinigis.

¹⁶ Matupad inda sa kanyu dahil sinunud niyu ti balaw mayad pag buwat, manga surundanun, ag manga patigayun ni Hari Umri hanggan niya anak si Hari Akab. Nakan ipadamhak niku kamu; unu-unuhun kamu ag puyaan iba manga nasyun.”