Mikas 5 - Hanunuu

¹ Manga taga Hirusalim, alistuhan niyu kanyu manga sundalu, dahil nasangputan yi kamu manga kalaban. Bakulun nida sugkud ti uyahun takinan Israil.

Ti Ipinangaku pag Takinan ginan sa Bitlihim

² Magkun ti Panginuun, “Bitlihim Iprata, una usa kawu sa pinakadiit pag banwa Huda, ginan sa kanmu pag tawu ti sumirbi sa kangku bilang takinan sa Israil. Kay manga kaumputan bantug kaybi sa un-an pag panahun.”

³ Nakan ti nasakupan Israil ipahintulut Panginuun sa kanda manga kalaban tugka sa ilusad babayi magpabaring-baring sa sakit ti lapsag lalaki mandumara sa Israil. Bag-u kay manga kasimanwa inda pag takinan imaw ti bumalik sa kanda kaparihu Israilita.

⁴ Dumarahan niya ti nasakupan Israil sa panab-anan kabisugan ag kamaskihan Panginuun. Parihu siya sa usa ka manug-alaga karanidu. Nakan mangabuhi sida may kahusayan dahil galangun manga tawu sa buu kalibutan kay kapangyarihan.

⁵ Pakan-an niya mayad pag kahamtangan kay manga nasakupan. Nu girahun manga taga Asirya kanta nasyun ag suldun ti mapag-un pag bahagi nita banwa, labanan nita sida sa pangunguna nita manga anad pag takinan.

Karibrihan ag Kadamhakan

⁶ Taluhun nida ag sakupun ti Asirya, ti rugar ni Nimrud, sa panab-anan nida manga armas. Nakan iribri nida kita nu girahun manga taga Asirya kanta nasyun.

⁷ Ti manga nasawad pag Israilita bumaliw papalad sa mayamu nasyun. Bumaliw sida parihu sa manga tun-ug ag uran pag-ipakaun Panginuun hampay tumubu ti manga tanum. Pumaniwala sida sa Diyus ag balaw sa tawu.

⁸ Dapat dumara diman sida kadamhakan sa manga nasyun. Bumaliw sida parihu sa liyun maisug magduksul sa manga hayup sa katalunan ag sa manada manga karanidu sa pasturan. Nu magduksul ti liyun, pagtukbun niya kay magkablay bag-u pagkan-un, ag balaw makaribri sa kanya.

⁹ Manalu ti manga Israilita laban sa kanda manga kalaban. Rurisun nida sida tanan.

Rurisun Panginuun ti manga Pagsarigan manga Israilita

¹⁰ Magkun ti Panginuun, “Sa ati pag sirang, ipamatay niku kanyu manga kabayu ag dautun niku kanyu manga kalisa.

¹¹ Dautun niku kanyu banwa hanggan ti manga may alad batu pag banwa.

¹² Dautun niku kanyu manga anting-anting ag madura kanyu manga panhirian.

¹³ Balaw yi kamu mansamba sa manga tawu-tawu hanggan sa aramirawan pag manga batu kanyu binwat, dahil dautun niku inda tanan.

¹⁴ Dautun diman kanyu manga tulduk tanda diyusa si Asira. Ag wayakun niku kanyu manga banwa.

¹⁵ Sa kang masyadu pangagalit, bumalus aku sa manga maglaban sa kangku pag nasyun.”