Mikas 4 - Hanunuu

Ti Kasuguan Panginuun Makapakaun Kahusayan

¹ Sa manga uryan aban pag sirang, ti bantud nabungsudan Balay Diyus Panginuun bumaliw pinakamahalaga gid sa tanan pag bantud. Manlinuwang ataytag ti manga tawu ginan sa tuhay-tuhay pag nasyun.

² Kumumun sida, “Atag yi kita sa bantud Panginuun, sa Balay Diyus, ti Diyus ni Hakub. Tudluan niya kita ati kay manga buruwatun hampay sundun nita.” Nakan mangululi ti manga tawu gin sa Siun, ti banwa Hirusalim, dara ti Kasuguan Panginuun.

³ Bag-u sa panab-anan niya Kasuguan, pagkarausahun niya ti mayamu nasyun, hanggan ti makapangyarihan pag manga nasyun sa arayu. Nakan balaw yi man-girirahan ti manga nasyun, ag balaw yi sida mamaantigu manga sundalu panggira. Buwatun yi lang nida sudsud aradu kanda manga talibung, ag buwatun karit panabas kanda manga bangkaw.

⁴ Ti kada tawu tumukaw sa sirung nida tanum ubas hanggan igus unman may pagkadalaan. Pihu gid matupad inda dahil sinabi mismu Panginuun Makamaskihan.

⁵ Una waya sundun manga tawu kanda manga diyus-diyusan, kami parargu di gid sumunud sa Panginuun nimi Diyus hanggan aban.

Mag-uli yi sa Kanda Banwa ti manga Israilita

^6-7 Magkun ti Panginuun, “Sa ati pag sirang, tipunun niku kang manga pinarusahan pag manga nasakupan niku. Sida ga manga karanidu pilay namululagan. Ti manga nasawad sa kanda buwatun niku makapangyarihan pag nasyun. Ag humari aku sa kanda sa Bantud Siun taynguna ginan hanggan aban.

⁸ Ti Siun, ga abwat pag bantayaw barantayan sa manga hayup, bumaliw makapangyarihan maan. Inda pag banwa, pag-ingarnan diman Hirusalim, imaw maan ti manguna sa tanan banwa Israil ga kaybi.

^9-10 “Manga nasakupan Siun, taynguna hayga kamu mag-arunghung ga babayi magkaanak yi? Asan di waya waydi kanyu manga hari, buhi waya kay manga tagapatigayun. Malu, mamabaring-baring kamu sa sakit ga babayi magkaanak yi, dahil udyi dugay tayakan niyu kanyu banwa bag-u mangulian kamu sa mapadang, bag-u darahun kamu sa Babilunya. Dapat ay iribri niku kamu ati sa kanyu manga kalaban.

¹¹ Mayamu nasyun ti nagkarausa hampay lumaban sa kanyu. Magkun sida, ‘Pakay-ahun nita ti Siun! Bag-u bantayan nita sida sa makakaray-a nida pag kahamtangan.’

¹² Dapat ay unman may alam inda pag manga nasyun sa kang pag-isipun. Balaw nida magkasalman kang gayak, tipunun niku sida hampay parusahan, ga manga uhay tipunun hampay uyasun sa girik-an.

¹³ “Manga nasakupan Siun, pag-alistu kamu ag rurisa lubus niyu kanyu manga kalaban ga maggiuk tirigu. Dahil buwatun niku kamu ga manga tudu baka may baul pag manga sungay ag may manga kuku galang. Runutun niyu ti mayamu nasyun, ti nagkarausa hampay labanan kamu. Ti inaghas nida pag manga kayamanan sa panab-anan paggiit handugan niyu sa kangku, ti Panginuun buu kalibutan.”