Mikas 3 - Hanunuu

Sinungyaw ni Mikas ti manga Takinan ag manga Purupita

¹ Magkun si Mikas, “Pagpatingi kamu manga takinan Israil ag Huda! Balaw aw kamu ti dapat magpatupad katadlungan?

^2-3 Dapat dayu kamu sa mayad ag gustu niyu ti daut. Pag-unuunuhun niyu kang manga kasimanwa; bilang ga paghilapun niyu sida ag pagbul-an nayi kanda manga but-ul, pagkatapus pagtuktukun kanda manga but-ul ag paggurutun ti manga nayi ag pagtamaun bag-u pagkan-un.

⁴ Sa udas parusahan kamu, manhagad kamu awat sa Panginuun, dapat balaw niya kamu awatan. Pabay-anan niya kamu dahil sa kanyu daut pag manga buwat.

⁵ “Inda waydi ti pagsabihun Panginuun tungkul sa manga purupita magdaya sa kay manga nasakupan, magtaratu mayad pag kahamtangan sa manga magsagpun sa kanda, dapat pagpadalaun nida sa kadamhakan ti dayu magsagpun sa kanda.

⁶ Dahil pinaumang niyu kang manga nasakupan, udyi kamu magkaimaw pangakakitun ag balaw yi kamu makahula. Ga sa basad madlum kamu unman may mag-akitan.

⁷ Mangay-a gid kamu pag manga purupita ag manga manughula. Manaklub kamu kanyu uyahun sa masyadu pag kay-a, dahil unman yi kamu may pahayag matanggap ginan sa Diyus.

⁸ “Dapat aku pag-ulianan di Ispiritu Panginuun imaw ti mag-ayaw sa kangku kapangyarihan hampay maipatupad niku ti katadlungan, ag mag-ayaw sa kangku mabisug nalub-anan hampay masabi sa nasakupan Israil ag Huda kuntay nagsalan sida.

⁹ “Pagpatingi kamu, manga takinan Israil ag Huda! Pagdayuun niyu ti katadlungan ag pagbaliskadun niyu ti katutuuhanan.

¹⁰ Pag-ipatindug niyu ti Siun, ti banwa Hirusalim, sa daut pag paraan. Alistu kamu manmatay basta mipatindug lang niyu inda.

¹¹ Pagkampihan niyu sa hukuman ti manga magpakaun suhul sa kanyu. Ag kamu pag manga manughandug magtudlu lang nu pagbayadan. Katunda diman kamu pag manga purupita, maghula lang kamu nu may kuwarta. Magsarig waya kamu awatan Panginuun, dahil magkun kamu, ‘Kaibahan di nimi ti Panginuun. Nakan unman may una hintay pag kadautan ti rumas-ug sa kanmi.’

¹² Nakan dahil sa kanyu dautun ti Siun, ti banwa Hirusalim. Bumaliw parihu sa inaradu tanman, ag bumaliw tumpuk manga nagkarapugdak batu. Ag bumaliw kapuruan ti bantud nabungsudan Balay Diyus.”