Mikas 2 - Hanunuu

Pakurianan Panginuun ti Maggiit sa manga Pugri

¹ Kaawaawa kamu pag manga magpuyat para lang gumayak daut. Pagka surip pagbuwatun niyu kanyu gayak daut dahil may kakayahan kamu bumuwat tunda.

² Pag-agawun niyu ti manga tanman hanggan ti pagkaibgan niyu pag manga balay. Pagdayaun niyu ti manga tawu hampay mab-ul niyu kanda balay una hanggan kanda minana pag daga.

³ Nakan inda ti pagsabihun Panginuun sa kanyu, “Pagpatingi kamu! Paggayakun niku parusahan kamu, ag balaw gid kamu makaribri. Balaw yi kamu makapadayaw-dayaw dahil sa tunda pag udas rurisun niku kamu.

⁴ Sa ati pag sirang, puyaan kamu manga tawu sa panab-anan maruku pag sanglitan, ‘Lubus yi kami naruris! Bin-ul Panginuun kanmi manga daga bag-u inayaw sa manga maradaya.’ ”

⁵ Nakan unman yi kamu may linahi manmana sa kanyu bahagi sa udas ayaw-ayawun nasakupan Panginuun ti daga iinuli sa kanda.

⁶ Kainda, pagpatigayunun waya niyu kami. Magkumun kamu, “Danga yi kami pagpatigayuna tungkul sa tunda pag kadamhakan niyu pagsabihun, dahil balaw gid kami mangay-a.

⁷ Hayga, sinaadan aw lugud Panginuun kay lahi ni Hakub? Tabu yi aw lugud kay pasunaid? Buruwatun aw lugud niya ti magruris?” Inda kay sagut Panginuun, “Nu pagbuwatun lang niyu ti kaayadan, matanggap gid niyu kang manga taratu.

⁸ Dapat pagsalakayun niyu ga manga kalaban ti manga pugri niku pag nasakupan. Kanda isip nu muli sida sa kanda banwa ginan sa girahan ribri yi sida, dapat tunda maaw agawun niyu kanda manga kulimpay.

⁹ Pagpalayasun niyu kanda manga kababayihan ginan sa kanda manga pagmahalun pag balay. Ag pagbul-un niyu ti manga ipinakaun niku pag papalad sa kanda manga anak, nakan madura yi inda sa kanda hanggan aban.

¹⁰ Nakan kainda, pag-ighit yi kamu sitay ginan sa Israil dahil inda pag rugar unman yi makapakaun kahusayan sa kanyu. Dahil inuringan niyu inda niyu manga kasalanan. Madaut inda pag banwa ag udyi makinabangan.

¹¹ Kanyu pagkaibgan pag manugbarita imaw ti manugbarita unman may pulus, maradaya, pudilun, ag kaindaay kay pagsabihun: ‘Umabunda kamu sa intus ag sa iba waya pag manga irinmun.’ ”

Ti Itinaratu pag Kahusayan sa manga Taga Israil ag Taga Huda

¹² Magkun ti Panginuun, “Kamu pag manga nasawad nasakupan Israil ag Huda, tipunun gid niku kamu ga manga karanidu sa tudiran aw ngatay ga kaban hayup sa labuan. Mapunu manga tawu kanyu kadagaan.

¹³ Bukasan niku ti puwirtahan banwa imaw ti nagbihag sa kanyu, ag giyahan niku kamu sa kanyu pagluwas. Aku, ti Panginuun kanyu hari, ti gumiya sa kanyu.”