Mikas 1 - Hanunuu

¹ Inda ti bagaw Panginuun tungkul sa Samarya hanggan sa Hirusalim. Itinultul niya inda sa kan Mikas taga Murisit katpung hari sa Huda sida ni Hutam, ni Akas ag ni Isikyas. Magkun si Mikas,

² “Pagpatingi kamu kaayad, kamu tanan pag manga tawu mag-uli sa babaw daga. Dahil kumastigus ti Panginuun Diyus laban sa kanyu ginan sa kay banal pag Balay.”

Pakurianan ti Israil ag Huda

³ Pagpatingi kamu! Lumuwang ti Panginuun ginan sa kay pag-ulian. Dumugsun siya ag lumakaw sa arabwat pag manga bantud sa kalibutan.

⁴ Ti malakawan niya pag manga bantud matunaw ga kandila nid-ut sa apuy. Ti malakawan niya pag manga ratag mangunha-kunha ga linakawan danum binmulus ginan sa madirig pag rugar.

⁵ Mangyari inda tanan dahil sa manga kasalanan nasakupan Israil ag Huda. Ti manga taga Samarya imaw ti nagpaturun sa iba pag nasakupan Israil hampay magkasala. Ag ti manga taga Hirusalim imaw ti nagpaturun sa iba pag manga nasakupan Huda hampay sumamba sa manga diyus-diyusan.

⁶ Nakan magkun ti Panginuun, “Dautun niku ti Samarya ag tanuman wadi inda manga ubas. Ililid niku kay manga batu atabug sa karatagan tugka sa makitan kay manga patakinan.

⁷ Magkararunut ti tanan histuda diyus-diyusan manga taga Samarya, ag magkarairub ti tanan ibinayad manga lalaki sa kanda naggamit manga babayi baraydan sa balay nida diyus. Nakatipun ti Samarya manga histuda diyus-diyusan sa panab-anan nida manga ibinayad sa manga babayi baraydan sa kanda balay diyus, nakan bul-un nida manga kalaban ti pilak hanggan ti gintu ipinahaklup sa manga diyus-diyusan hampay gamitun waydi nida manga kalaban pamayad sa manga babayi baraydan sa kanda balay diyus.”

⁸ Magkun waya si Mikas: Dahil sa kadamhakan Samarya, manlumi aku ag mangamiraw. Manlakaw-lakaw aku unman may lapak ag unman may rutay hampay ipakakit kang karukuan. Manwawaw aku ka daka ga simarun idu ag ga uni bukaw.

⁹ Dahil ti kadamhakan Samarya ga biyag udyi maayadan, ag pihu gid mangyari diman inda sa Huda, hanggan sa Hirusalim, ti pinakadaka pag banwa niku manga kasimanwa.

¹⁰ Manga taga Huda, danga niyu pagtultulan sa kalaban nita taga Gat ti tungkul sa aratubangun pag kadamhakan nita! Danga niyu ipakakit maglumi kamu! Ati niyu pag-ipakakit sa Bit Liapra kanyu karukuan sa panab-anan pagpalinilini sa daga!

¹¹ Manga nasakupan Sapir, bihagun kamu ag darahun uba-uba, nakan mangay-a kamu. Ti manga nasakupan Saanan magkadala magluwas sa kanda banwa hampay mangawat sa kanyu. Ti manga taga Bit Isil balaw diman makaawat sa kanyu dahil sida hanggan maglumi diman sa kadamhakan nagras-ug sa kanda.

¹² Sa tutuu, ti manga nasakupan Marut dugay yi magpatigagad umapas ti girahan. Dapat mibuyu sida dahil ipinahintulut Panginuun makaras-ug ti manga kalaban sa puwirtahan Hirusalim.

¹³ Manga nasakupan Lakis, takudan yi ti manga kalisa sa manga kabayu bag-u pagpalagiw yi kamu. Hinuwad niyu ti kasalanan binwat manga taga Israil, ag dahil sa kanyu nagsalan diman ti manga taga Siun.

¹⁴ Taynguna, manga taga Huda, pagpaalam yi kamu sa banwa Murisit Gat dahil sakupun yi sida manga kalaban. Sakupun diman ti banwa Aksib, nakan unman may masarigan awat kanyu manga hari ati ginan pag banwa.

¹⁵ Manga nasakupan Marisa, padaran-an kamu Panginuun kalaban sumakup sa kanyu. “Manga taga Huda, kanyu manga takinan pumatagu sa lukib Adulam.

¹⁶ Kanyu pagmahalun pag manga anak bul-un sa kanyu ag darahun sa iba rugar, nakan mangamiraw kamu sa kanda, ag ipakakit niyu kanyu karukuan sa panab-anan pagpakidkid parihu ga ulu uling.”