Matiyu 9 - Hanunuu

Pinaayad ni Hisus ti Tawu Lunu

¹ Sinmakay si Hisus sa duunduun, nagdipay atag sa baliw pangpang danaw naparargu tag sa kay sadili banwa.

² Pagras-ug niya ati, may manga tawu nagras-ug may yayung usa ka tawu lunu mahuwayan sa kay igyaan. Pagka nakitan ni Hisus kanda daka pag sarig, sinabi niya sa tawu lunu, “Pagmatutum duy kanmu naisipan. Pinatawad yi kanmu manga kasalanan.”

³ May manga manugtudlu Kasuguan ati. Ikinutub nida sa kanda tagipusuun magkun, “Palabi-labihun inda pag tawu laban sa Diyus.”

⁴ Dapat alam di ni Hisus kanda pagkutubun, nakan sinabi niya magkun, “Hayga kamu magkutub daut?

⁵ Hintay nguna ti madali sabihun, ngatay pinatawad yi kanmu manga kasalanan, aw ngatay sabihun pagtindug yi kawu paglakaw yi.

⁶ Taynguna patutuuhanan niku sa kanyu sa panab-anan pagpaayad sa tunda pag tawu lunu kuntay aku ti Anak Tawu may kamaskihan sitay sa babaw daga agud patawadun ti manga may kasalanan.” Bag-u sinabi niya sa tawu lunu, “Pagtindug yi kawu daran-a yi kanmu igyaan, pag-uli yi kawu.”

⁷ Nagtindug ngani tunda pag tawu bag-u nuli yi tag sa kay balay.

⁸ Pagka nakitan manga tawu tunda, nadala sida ag nagdayaw sa Diyus sa nagpakaun katunda pag karampatan sa manga tawu.

Kay Nagtawag ni Hisus sa kan Matiyu

⁹ Nighit si Hisus siyun ginan pag rugar. Sa kay maglakaw nakitan niya ti usa ka tawu kay ngaran si Matiyu, matukawan sa panukutan buhis. Magkun si Hisus sa kanya, “Pagkuyug kawu sa kangku.” Nagtindug si Matiyu bag-u kinmuyug yi ngani sa kan Hisus.

¹⁰ Pagka sa kan Matiyu balay si Hisus hanggan kay manga tuludluan magkaun, linmuwang diman ti mayamu pag manga manunukut buhis hanggan ti manga makasalanan, nagsaru sa karan-an.

¹¹ Pagka nakitan manga Parisiyu kanda magsararuhan, pinaingana nida kay manga tuludluan ni Hisus magkun, “Hayga magsaru kanyu maisturu sa manga manunukut buhis hanggan sa manga makasalanan?”

¹² Nadnugan ni Hisus kanda paingana, nagsagut siya magkun, “Ti may sakit imaw ti may kailangan sa manugbulung. Nu unman may sakit unman diman waydi may kailangan sa manugbulung.

¹³ Paglakaw yi kamu, isipun niyu inda kay pagkumnun Diyus, ‘Kang gustu pagmaawaun kamu ag balaw kanyu handug.’ Nagsitay aku hampay butungun ti manga makasalanan, balaw ti manga matadlung.”

Pinaingana si Hisus tungkul sa Unman Maghandum Karan-unun

¹⁴ Nagras-ug sa kan Hisus kan Huwan Manugtulbaw pag manga tuludluan. Magkun sida, “Hayga duy may ugali kami hanggan ti manga Parisiyu unman maghandum karan-unun. Bati kanmu manga tuludluan unman may ugali katida?”

¹⁵ Sinmagut si Hisus magkun, “Mahimu aw nguna maruku ti binan-awan sa pamasaruhan nu kaibahan waya nida ti lalaki ipinasaru? Dapat aban bul-un siya ginan sa kanda. Nu udyi siya sa kanda bag-u di unman manhandum karan-unun sida.

¹⁶ “Uman may tawu maglupun bag-u rutay sa daan pag rutay. Barang ti bag-u pag lupun gumisi ngap sa kay daan pag rutay linupnan bag-u umamat dumaka kay gisi.

¹⁷ Unman may magsukad bag-u intus ubas sa daan pag manga paknul pag sukadan. Nu abi katunda ti buwatun, mabusni ti manga paknul, mauyang ti intus ubas ag madaut yi lang ti manga sukadan. Ti mayad isukad ti bag-u intus ubas sa bag-u pag manga paknul pag sukadan agud parihu kay kadugay.”

Binuhi Uman ti Usa ka Anak ag Pinaayad ti Usa ka Babayi

¹⁸ Magbagaw waya si Hisus sa manga tawu, rinmas-ug ti usa ka magpamahala sa simbahan manga Hudiyu. Nanluhud siya sa atubangan ni Hisus magkun, “Bag-u bag-u lang duy namatay kang anak babayi. Dapat nu kumuyug kawu sa kangku ag kup-an siya nimu kamang. Pihu duy mabuhi siya.”

¹⁹ Nagtindug si Hisus, nagkuyug ngani siya hanggan kay manga tuludluan.

²⁰ Nagdasun sa kay uryan ti usa ka babayi. Sulud sampulu may duwa yi ka timpu kay pagsulgan. Nagdulud sa kay aday-an nag-igpil sa kay sidsid rutay ni Hisus.

²¹ Dahil pag-isipun niya, “Nu maigpilan lang niku kay rutay pihu gid aku maayadan.”

²² Napalisud si Hisus. Pagka nakakit sa babayi magkun siya, “Pagmatutum kam naisipan duy, pinaayad yi kawu nimu sarig.” Susun nag-ayad yi ngani ti babayi.

²³ Pagka rinmas-ug si Hisus sa balay pinunu, nakitan niya ti manga manugpalawta hanggan ti kayamuan tawu mag-iringayan.

²⁴ Magkun siya, “Pagluwas yi kamu. Balaw tigbak ti anak, turug lang.” Kanda lang pagkasarin-an si Hisus.

²⁵ Dapat ay pagka linmuwas ti manga tawu, nagsaka siya, hiniyaptan niya ti anak sa kay kamang bag-u binmangun tunda.

²⁶ Sa tanan rugar sa kay palibut nibantug ti barita tungkul sa nangyari ati katpung.

Maghiling yi ti Duwa ka Tawu Buta

²⁷ Pagka nighit maan si Hisus siyun ginan pag rugar, may nagkuyug sa kanya duwa ka lalaki buta. Magtawag sida magkun, “Kawu duy ti linahi ni Dabid, kaawai nimu kami.”

²⁸ Pagka sinmaka yi si Hisus sa balay, nagpakarani sa kanya ti manga buta. Pinaingana sida ni Hisus magkun, “Magpaniwala aw kamu mabwat niku inda?” Kanda sagut magkun, “Hu ngani duy, magpaniwala gid kami.”

²⁹ Hinikap niya kanda manga mata bag-u kay sabi magkun, “Pagmangyari sa kanyu angay sa kanyu pagsarig.”

³⁰ Bag-u maghiling yi ngani sida. Mahigpit kay binilinan sida magkun, “Danga pagsabiha niyu inda una sa kantapu pag tawu.”

³¹ Dapat ay pagka sida siyun ginan linmakaw, nagtultul ngap sida sa manga tawu sa tanan manga rugar tungkul sa kan Hisus.

Nagbagaw maan ti Buyun

³² Pagka linmakaw maan tunda pag duwa ka lalaki, dinara manga tawu tag sa kan Hisus ti usa ka tawu inapuan labang, pamabuyun.

³³ Pagka ipinalwas niya ti labang, nagbagaw yi ti tawu ag sinabi nida, “Una kaybi ginan unman may nakitan katida sa Israil.”

³⁴ Dapat sinabi manga Parisiyu, “Takinan manga labang ti nagpakaun kapangyarihan sa kanya hampay makapalwas sa manga labang.”

Maawaun si Hisus

³⁵ Pinalibut ni Hisus ti manga banwa hanggan ti manga baryu, magtudlu siya sa manga simbahan manga Hudiyu. Magtultul siya Mayad pag Barita tungkul sa kay maghari Diyus. Magpaayad siya una hintay pag sakit manga tawu kanda mag-adnugan sa kanda ginhawa.

³⁶ Pagka nakitan niya ti duru gid pag manga tawu, naawa siya sa kanda dahil sida magkaaburidu unman may manuggiya, ga manga karanidu unman may manug-alaga.

³⁷ Nakan sinabi niya sa kay manga tuludluan magkun, “Abunda ti aranyun, dapat kurang ti manga manug-ani.

³⁸ Nakan idarangin niyu sa Panginuun, siya ti may puun aranyun, hampay suguun niya ti manga manug-ani sa kay aranyun.”