Matiyu 8 - Hanunuu

Pinaayad ni Hisus ti Usa ka Tawu may Dilikadu pag Sakit sa Lukub

¹ Pagka naglus-ug si Hisus ginan sa bantud, nagkuyug sa kanya ti kayamuan tawu.

² Nagpakarani sa kanya ti usa ka tawu may dilikadu pag sakit sa lukub, nagluhud sa kay atubangan magkun, “Panginuun, nu gustu nimu, paayadun duy nimu aku sa kang dilikadu pag sakit sa lukub agud malumpiyu aku.”

³ Nagkupa si Hisus sa kanya magkun, “Gustu gid niku. Pagmaayadan yi kawu.” Susun yi nadura kay sakit sa lukub.

⁴ Binilinan siya ni Hisus magkun, “Danga pagsabiha nimu inda una sa kantapu pag tawu. Pag-atag kawu, pagpakakit kawu sa manughandug. Bag-u pagpakaun kawu handug sa Diyus angay sa kay ibinilin ni Muysis, bilang usa ka puruyba sa manga tawu nag-ayad yi kawu.”

Kay Nagpaayad sa Suruguun Kapitan

⁵ Pagka rinmas-ug si Hisus sa banwa Kapirnaum, napakarani sa kanya ti usa ka kapitan manga sundalu taga Ruma, nagpakihampang sa kanya magkun,

⁶ “Duy, kang suruguun masyadu yi kay sakit, mahuwayan siya sa kanmi balay, masyadu yi ngap magkakurian.”

⁷ Magkun si Hisus, “Asan tag duy aku sa kanyu ag paayadun niku siya.”

⁸ Dapat ay nagsagut ti kapitan magkun, “Duy, unman aku may karampatan magpaati sa kanmu atag sa kang balay. Bagawa yi lang nimu bag-u umayad yi kang suruguun.

⁹ Alam niku dahil aku sa sirung karampatan manga pinunu ag aku diman hanggan may manga sundalu sa sirung niku karampatan. Nu pagsabihun niku sa usa ka sundalu, ‘Pag-ati kawu’, umati ngani siya. Nu pagsabihun niku sa usa, ‘Abala kawu’, magpakarani siya. Nu kang pagsabihun sa kang suruguun, ‘Buwata nimu inda’, buwatun yi niya.”

¹⁰ Nadulaw si Hisus pagka nadnugan niya ti bagaw kapitan ag sinabi niya sa manga tawu magkuyug sa kanya magkun, “Ungud duy kang pagsabihun sa kanyu, unman aku may nakitan kainda kadaka kay pagsarig sa nasyun Israil.

¹¹ Tandai niyu mayamu waya ti rumas-ug ginan sa butlakan hanggan ginan sa isalpan hampay dumulud atag sa karan-an kasaru nida ni Abraham, ni Isaak hanggan ni Hakub sa kaharian langit.

¹² Dapat mayamu sa manga linahi ni Israil manga sakup mana sa kaharian Diyus tulakun ngap tag sa luwas sa kaduluman. Ati aban sida manlulumian ag man-ngararutan kanda manga ngipun.”

¹³ Magkun si Hisus sa kapitan, “Pag-uli yi kawu. Angay sa kanmu pagsarig mangyari diman tunda kanmu paghagadun.” Ati diman katpung nag-ayad ti suruguun kapitan.

Mayamu kay Pinaayad ni Hisus

¹⁴ Nag-atag si Hisus sa kay balay ni Pidru. Nakitan niya ati kay manugang ni Pidru maigyaan ga natahun apuy yi kay bilug.

¹⁵ Hiniyaptan ni Hisus kay kamang bag-u nahumpawan kay init bilug. Pagka nahumpawan, nagbangun siya ag nanhayin karan-unun sa kan Hisus.

¹⁶ Tunda pag yabi mayamu tawu sinuldan manga labang ti dinara tag sa kan Hisus. Usa lang ka pagbagaw ni Hisus, nagluwas yi ti manga labang. Pinaayad niya ti tanan may mag-adnugan sa kay bilug.

¹⁷ Binwat niya tunda hampay matupad ti bagaw ipinadakit ni Purupita Isayas magkun, “Bin-ul niya kanta manga kalumuyan, Pinaayad niya kanta manga mag-adnugan.”

Tungkul sa Magsunud sa kan Hisus

¹⁸ Pagka nakitan ni Hisus ti manga kayamuan tawu sa kay palibut, isinugu niya sa kay manga kaibahan pag-alistu, sida dumipay atag sa baliw pangpang.

¹⁹ May nagpakarani sa kanya usa ka manugtudlu Kasuguan magkun sa kanya, “Maisturu, kumuyug aku sa kanmu una kawu naan tabug.”

²⁰ Magkun si Hisus sa kanya, “May ulian ti manga simarun idu sa manga basad lukib, may pugad ti manga manuk, dapat aku, ti Anak Tawu, unman may paraharyan.”

²¹ Usa maan ka tuludluan magkun sa kan Hisus, “Panginuun, mag-uli dap duy aku agud manlubung sa kang ama.”

²² Dapat magkun si Hisus sa kanya, “Pagkuyug kawu sa kangku, ipiyar nimu sa unman may manga buhi ti lumubung sa manga namatay.”

Inampara ni Hisus ti Untug

²³ Sinmakay si Hisus sa duunduun, kaibahan niya kay manga tuludluan.

²⁴ Bag-u kadaka naghuyup ti mabisug pag untug sa danaw, ga matabunan yi balud kanda duunduun. Dapat si Hisus turug di.

²⁵ Nagpakarani sida sa kan Hisus bag-u kanda pinulaw magkun, “Panginuun, iribri nimu kami, malunud yi ay duy kita.”

²⁶ Magkun si Hisus sa kanda, “Hayga lugud kamu magkadala, diit maaw kanyu pagsarig.” Bag-u tinmindug si Hisus ag nagbagaw, kay inampara ti untug hanggan ti humbak danaw. Bigla nagkalma.

²⁷ Naglingut kay manga kaibahan magkun, “Hintay nguna pag tawu inda, hayga magpaniwala sa kanya una ti durus una ti humbak danum?”

Pinaayad ti manga Inapuan Labang

²⁸ Pagka rinmas-ug si Hisus sa baliw dipay danaw, sa daga manga Gadarinu, sinulang siya duwa ka tawu inapuan manga labang. Ginan sida sa manga kalubngan. Masyadu paman sida maisug pag manga tawu, nakan udyi may makalakaw siyun pag dalan.

²⁹ Nagringgit sida magkun, “Hintay kanmu labut sa kanmi, kawu pag Anak Diyus? Nagsitay aw lugud kawu hampay kami kanmu pakurian una udwaya udas sintinsiya?”

³⁰ Sa kanda luwas may maglingaun kadamlan babuy.

³¹ Nanuyu sa kanya ti manga labang magkun, “Nu kami kanmu ipalwas, pahintuluti nimu kami sumulud sa kadamlan babuy.”

³² Sinabi ni Hisus sa kanda, “Pag-ati kamu.” Nakan nagluwas ngani sida sa duwa ka tawu, nag-atag sida sa manga babuy bag-u nangras ti manga babuy sa palagiw naglinuksu sa yangpas danaw nagkalalimus sa danum.

³³ Nagpinalagiw kay manug-alaga sa babuy. Pagka rinmas-ug sida sa banwa, itinultul nida ti tanan nangyari sa manga babuy hanggan sa duwa ka tawu sinuldan labang.

³⁴ Naglinuwang ti tanan taga banwa nagsulang sa kan Hisus. Pagka nakitan nida si Hisus, pinakihampangan nida siya magkun, “Pag-ighit yi kawu sitay pag daga.”