Matiyu 7 - Hanunuu

Tungkul sa Magpihu sa Daut sa Mayad Nita Kaparihu

¹ Magkun si Hisus, “Danga pagpihua niyu ti daut ti mayad niyu kaparihu hampay balaw waydi kamu pihuun Diyus nu daut nu mayad.

² Dahil pihuun kamu Diyus angay sa kanyu magpihu sa iba nu daut nu mayad. Kanyu gamitun pag panukat sa iba imaw diman pag panukat ti gamitun Diyus sa kanyu.

³ Hayga mag-akitan nimu ti paruk sa mata nimu patar-ari dapat unman pagbatiun nimu ti batang sa kanmu sadili mata?

⁴ Kabitay pag masabi nimu sa kanmu patar-ari, ‘Abala duy kang bul-un ti paruk sa kanmu mata’, bag-u may batang diman ngapu kanmu mata.

⁵ Magpabalhinguun lang kawu kuntay mayad. Bul-a dapu ti batang sa kanmu mata, bag-u humiling yi kawu mayad hampay mab-ul nimu kanmu patar-ari paruk.

⁶ “Danga niyu ipakaun sa manga idu ti manga bagay ibinukud para sa Diyus. Danga waydi niyu iyamut tag sa manga babuy kanyu manga bulawan, dahil tatatataan lang nida bag-u pabalikan kamu banahutun sa kagat.”

Paghagad, Paghanap, Pagtaragham

⁷ Magkun si Hisus, “Paghagad kamu sa Diyus hampay pakan-an kamu. Paghanap kamu sa Diyus hampay makakit. Pagbukasan ti sabian sa una hintay tigtaragham.

⁸ Dahil ti tawu nu maghagad pakan-an, ti tawu nu maghanap may makitan siya. Nu may tawu magtaragham, bukasan ti sabian.

⁹ Pakan-an aw niyu batu kanyu anak nu maghagad tinapay?

¹⁰ Pakan-an aw niyu lugud siya ulay nu maghagad isda?

¹¹ Madi kamu manga makasalanan, madunung diman kamu magpakaun mayad pag pakaun sa kanyu manga anak, lalu waya kanyu Ama sa langit madunung gid. Ipakaun gid niya ti manga marinu pag pakaun sa manga maghagad sa kanya.

¹² “Nakan ngani buwatun niyu sa kanyu kaparihu ti kanyu gustu kanda buwatun sa kanyu. Inda yi ngani ti kahulugan Kasuguan ni Muysis ag ti kahulugan tudlu manga Purupita.”

Ti Diit pag Sabian

¹³ Magkun si Hisus, “Pagsaka kamu sa diit pag sabian. Dahil daka ti sabian ag laun pagka dalan atabug sa kadamhakan. Tunda ti paglakawan mayamu tawu.

¹⁴ Dapat diit lang ti sabian ag makuri pag dalan tabug sa buhi, balaw mayamu pag tawu ti maglakaw siti pag dalan.”

Makilala ti Tawu sa Kay manga Buwat

¹⁵ Magkun si Hisus, “Pag-aman kamu sa manga pudilun pag purupita. Magpakarani sida sa kanyu ga bilang karanidu kanda histuda dapat nu sa kay tutuu sida ga manga maisug pag simarun idu.

¹⁶ Makilala niyu sida sa kanda manga buwat. May maputi aw lugud burak ubas ngatay igus sa puun kayu madugi?

¹⁷ Nu mahal pag puun kayu, pihu marinu waydi kay burak. Dapat nu alangan ti puun kayu, alangan diman waydi kay burak.

¹⁸ Dayu mahimu magburak daut nu mayad pag puun kayu. Nu daut kay puun kayu dayu waydi bumurak mayad.

¹⁹ Ti kada puun kayu nu unman magburak mayad, pukanun yi lang bag-u iyamut sa apuy.

²⁰ Nakan ngani makilala diman waydi niyu ti manga pudilun pag purupita sa kanda manga buwat.”

Una ginan sa Kabag-u unman Nakilala Niku Kamu

²¹ Magkun si Hisus, “Balaw tanan-tanan tig-ingaran sa kangku magkun, ‘Panginuun, Panginuun’, rumas-ug sa kaharian langit, nu unman tunda lang pag manga tawu ti magtupad sa kagustuhan niku Ama sa langit.

²² Sa ati katpung aban pag kaudasan mayamu ti sumabi sa kangku magkun, ‘Panginuun, Panginuun, unman aw sa kanmu ngaran kami nagpurupita? Sa kanmu diman ngaran pag nagpalwas kami manga labang ag nagbuwat kami mayamu makadululaw.’

²³ Bag-u sabihun niku sa kanda magkun, ‘Una ginan sa kabag-u unman nakilala niku kamu. Pagpakarayu kamu ginan sa kangku, kamu manga magbuwat daut.’ ”

Duwa ka Tawu Magpatindug Balay

²⁴ Sinabi ni Hisus, “Nakan ngani ti kada tawu nu magpatingi ag magtupad sa kang manga bagaw, parihu siya ga usa ka tawu madunung gid, nagbungsud kay balay sa babaw batu.

²⁵ Nag-uran daka, nagbaha, hinampak mabisug pag bagyu ti balay, dapat unman nagba dahil nakabungsud inda sa babaw batu.

²⁶ Ti kada tawu magpatingi sa kang bagaw bag-u unman pagtupadun niya, parihu siya ga tawu balaw may intindi, nagbungsud kay balay sa baras.

²⁷ Pagka inmuran mabisug ag binmaha, ag hinmamapak ti mabisug pag bagyu sa balay, nagba inda ag lubus nawayak.”

Kay Kamaskihan ni Hisus

²⁸ Pagkatapus itinudlu ni Hisus inda pag manga bagaw, nadulaw ti manga tawu sa kay tudlu.

²⁹ Dahil nagtudlu siya ga usa ka tawu may karampatan, balaw ga kanda manugtudlu Kasuguan.