Matiyu 4 - Hanunuu

Pagtuksuhun mana si Hisus

¹ Bag-u dinara Ispiritu Banal si Hisus atabug sa pangawakawaan hampay tuksuhun siya diyablu.

² Unman siya naghandum karan-unun sa sulud upatpulu ka sirang may upatpulu ka yabi. Pagka lawuy upatpulu ka sirang linun-us siya.

³ Nagpakarani yi ti manugtuksu, magkun sa kan Hisus, “Nu kawu ungud ti Anak Diyus, bagawi tunda pag manga batu hampay bumaliw tinapay.”

⁴ Dapat sinmagut si Hisus magkun, “Isinurat sa Banal Kasuratan magkun, ‘Balaw lang sa karan-unun pag mabuhi ti tawu nu unman sa kada bagaw Diyus.’”

⁵ Bag-u tinaban siya diyablu tag sa Hirusalim sa banal pag banwa, ati sa pinakaabwat pag bahagi Balay Diyus.

⁶ Ag magkun siya sa kan Hisus, “Nu kawu ti Anak Diyus, palagpak kawu atag sa sirung. Dahil nisurat sa Banal Kasuratan magkun, ‘Bilinan Diyus kay manga anghil hampay alagaan kawu. Sambutun nida kawu hampay balaw madayaan kanmu lulud sa batu.’”

⁷ Sinabi maan ni Hisus sa kanya, “Nisurat diman sa Banal Kasuratan magkun, ‘Danga pagsubuki nimu ti Diyus imaw kanmu Panginuun.’ ”

⁸ Tinaban maan siya diyablu tag sa usa ka bantud abwat gid, pinausdung siya nakitan niya ti tanan manga kaharian sa babaw daga hanggan kanda kadayawan.

⁹ Sinabi diyablu sa kan Hisus, “Ti tanan tunda kanmu nakitan kang ipakaun sa kanmu, nu kawu lumuhud sumamba sa kangku.”

¹⁰ Bag-u sinabi ni Hisus sa kanya, “Pagpakarayu kawu, Satanas, dahil nisurat sa Banal Kasuratan, ‘Sambahun nimu ti Diyus imaw kanmu Panginuun. Siya lang kanmu sirbihan.’ ”

¹¹ Bag-u tinayakan diyablu si Hisus bag-u nagras-ug ti manga anghil kanda inalagaan siya.

Nag-umpisa si Hisus Kay Buruwatun sa Galiliya

¹² Pagka nadnugan ni Hisus si Huwan dinakup yi, nag-ati siya sa Galiliya.

¹³ Nighit siya ginan sa Nasarit bag-u nag-ati sa banwa Kapirnaum ag ati pag nangulian. Inda pag banwa sa saruy danaw Galiliya, sakup daga Sabulun hanggan Niptali.

¹⁴ Nangyari tunda hampay matupad ti bagaw ipinadakit ni Purupita Isayas magkun,

¹⁵ “Ti daga Sabulun hanggan ti daga Niptali lalawyan atabug sa danaw, ati waya inda baliwa sa dipay Hurdan. Inda pag manga rugar sakup Galiliya ulian manga balaw Hudiyu.

¹⁶ Ti manga tawu nitukmud sa basad kaduluman may makitan aban daka pag rayaw. Ti manga tawu sa sirung kapangyarihan kamatayan pakan-an ngap karayawan.”

¹⁷ Siyun ginan nag-umpisa yi si Hisus magtudlu. Magkun siya, “Iampu yi niyu kanyu manga kasalanan, dahil arani yi ti kaharian langit.”

Pinili ni Hisus ti Upat ka Manug-isda hampay Kay Tuludluan

¹⁸ Sa kay maglakaw sa saruy danaw Galiliya, nakitan ni Hisus si Simun, imaw ti pagkumnun si Pidru, hanggan kay patar-ari si Andiris. Manug-isda sida. Pag-itaplak nida kanda sarap sa danaw.

¹⁹ Sinabi niya sa kanda, “Pagkuyug kamu sa kangku bag-u buwatun niku kamu manugtaban sa tawu.”

²⁰ Kadaka kanda tinayakan kanda manga sarap bag-u nagkuyug ngani sida sa kanya.

²¹ Sa kay maglakaw maan ni Hisus, nakitan niya ti duwa waya ka magtar-ari, si Santiyagu hanggan si Huwan kan Sibidiyu manga anak. Sa duunduun sida kaibahan kanda ama si Sibidiyu, pagputikan nida kanda manga sarap. Tinawagan waydi ni Hisus sida.

²² Kadaka tinayakan nida kanda duunduun hanggan kanda ama bag-u kinmuyug sida sa kan Hisus.

Kay manga Buruwatun ni Hisus

²³ Pinalibut ni Hisus ti buu daga Galiliya, magtudlu siya sa manga simbahan manga Hudiyu. Magtultul siya Mayad pag Barita tungkul sa kay maghari Diyus. Magpaayad siya una hintay pag sakit manga tawu kanda mag-adnugan sa kanda ginhawa.

²⁴ Pagka ilinantag ti barita tungkul sa kanya sa buu daga Sirya, dinara manga taga Sirya tag sa kanya ti tanan may manga mag-adnugan, ti manga magkakuri sa kanda manga sakit tuhay-tuhay hanggan ti inapuan manga labang, ti manga magkatigbak hanggan ti manga lunu bag-u kay pinaayad sida.

²⁵ May nagkuyug sa kanya lubus kagadhan tawu ginan sa Galiliya, ginan sa Dikapulis, ginan sa Hirusalim hanggan ginan sa Hudiya, hanggan ginan waya sa dipay sapa Hurdan.