Matiyu 3 - Hanunuu

Kay Pagtudlu ni Huwan Manugtulbaw

¹ Ati katpung pag manga sirang nagras-ug si Huwan Manugtulbaw sa pangawakawaan sa Hudiya. Nanudlu siya magkun,

² “Iampu yi niyu kanyu kasalanan, dahil udyi dugay rumas-ug yi ti kaharian langit.”

³ Inda yi ngani ti ipinadakit ni Purupita Isayas magkun, “May magtawag sa pangawakawaan kay sabi, ‘Ialistu niyu ti dalan Panginuun. Tadlunga ti dalan kay lakawan.’ ”

⁴ Si Huwan ngani may sulung rutay bulbul kamilyu may hawud paknul. Kay karan-unun manga apan ag manga daykut putyukan.

⁵ Nagdulud sa kanya ti manga tawu taga Hirusalim, una hanggan ginan sa Hudiya hanggan ginan sa libut sapa Hurdan.

⁶ Pagka inaku nida kanda manga kasalanan, kay itinulbaw sida sa sapa Hurdan.

⁷ Pagka nakitan ni Huwan aduk pag manga Parisiyu hanggan Sadusiyu ti nagdulud diman sa kay magtulbaw, magkun siya sa kanda, “Kamu ga lahi manga ulay. Si unu ti magsabi sa kanyu kuntay makapalagiw kamu sa sintinsiya Diyus aban?

⁸ Nu ungud kamu nag-ampu yi kanyu manga kasalanan, patutuuhani niyu tunda sa kanyu manga buwat.

⁹ Danga kamu mag-isip kuntay balaw kamu parusahan dahil kamu manga linahi ni Abraham. Dahil pagsabihun niku sa kanyu, una inda pag manga batu mahimu buwatun Diyus manga anak ni Abraham.

¹⁰ Taynguna maayangan yi ti wasay sa manga dalid kayu. Ti kada puun kayu nu unman magburak mayad, pukanun bag-u iyamut sa apuy.

¹¹ Tutuu kamu kang pag-itulbaw sa danum tanda sa kanyu nag-ampu sa kasalanan. Dapat ay may dumasun sa kang uryan lalu man makamaskihan sa kangku. Unman aku may karampatan magdara kay lapak. Siya di ti tumulbaw sa kanyu sa Ispiritu Banal hanggan sa apuy.

¹² Sa kay yi kamang ti pangayat paruk hampay kay rayawan ti girik-an. Tipunun niya kay tirigu sa kay balay haramnuan dapat kay dayami sunugun niya sa unman magkapsa pag apuy.”

Itinulbaw waydi si Hisus

¹³ Pagka dugay linmakaw si Hisus ginan sa Galiliya, nag-ati sa kan Huwan sa sapa Hurdan hampay siya itulbaw ni Huwan.

¹⁴ Dapat unman mana nagpasnu si Huwan. Magkun siya sa kan Hisus, “Aku kailangan itulbaw mana nimu, bati kawu ngap nagsitay sa kangku?”

¹⁵ Dapat sinmagut si Hisus magkun sa kanya, “Pasnuan lang duy nimu taynguna, dahil kainda ngani ti dapat buwatun hampay tupadun nita ti buu kagustuhan Diyus.” Bag-u pinasnuan ngani siya ni Huwan.

¹⁶ Pagka itinulbaw si Hisus, napatakas siya ginan sa danum bag-u nabukasan ti langit sa kanya ag nakitan ni Huwan ti Ispiritu Diyus ga histuda kalampati nagpakababa bag-u nangulian sa kan Hisus.

¹⁷ Bag-u may nagbagaw ginan sa langit magkun, “Inda kang pagmayadun gid pag anak, siya lubus kang pagbayaun.”