Matiyu 28 - Hanunuu

Kay Pagkabuhi Uman ni Hisus

¹ Pagka nakalawuy ti Sirang Pamahari, pagka magpanhanag-hanag yi sa sirang Duminggu, nag-ati si Marya Magdalina hanggan ti usa ka Marya hampay duawan ti tinaguktukan batu.

² Kadaka naglinug mabisug, dahil linmuwang ginan sa langit ti usa ka anghil Panginuun, nag-ati sa tinaguktukan batu bag-u ipinaligid niya kay talakup ginan sa sabian tinaguktukan batu. Pagka binukasan yi, siti yi ngap pag tinmukaw siya sa babaw talakup batu.

³ Kay histuda bilang ga kilat kay pagkasilaw, kay rutay ga burak kay pagkalagti.

⁴ Sa subra pag dala sa anghil tinakigan ti manga guwardiya, ga namatay yi sida.

⁵ Magkun ti anghil sa manga babayi, “Kamu duy danga magkadala, dahil alam niku paghanapun niyu si Hisus ti ipinaku sa kurus.

⁶ Unman siya sitay dahil siya nabuhi yi uman parihu diman sa kay sinabi. Abala kamu pagbantay ngani kamu sa kay nagpaulian.

⁷ Pag-ati kamu kadali sabiha niyu sa kay manga tuludluan magkun, siya nabuhi uman ginan sa kamatayan. Siya umuna sa kanyu tabug sa Galiliya. Makitan niyu siya ati. Tandai niyu kang sinabi sa kanyu.”

⁸ Ginminan ti manga babayi madali gid sa tinaguktukan batu may kadalaan may daka waydi pag kabayaan. Nagpalalagiwan sida hampay kanda itultul sa kay manga tuludluan.

⁹ Bag-u bigla nasulang ngap manga babayi si Hisus. Nagsabi siya sa kanda, “Pagmasulung gid duy kamu.” Nagpakarani sida sa kanya hiniyaptan nida kay manga lulud kanda sinamba siya.

¹⁰ Bag-u sinabi ni Hisus sa kanda, “Danga duy kamu magkadala, pag-ati yi kamu sabihi niyu kang manga patar-ari, pag-atag sida sa Galiliya, ati pag makitan nida aku.”

Ti Barita manga Guwardiya

¹¹ Pagka linmakaw ngani ti manga babayi, ti iba guwardiya nag-ati sa banwa, itinultul nida sa manga pangulu manughandug ti tanan manga nangyari.

¹² Nakan pagka tinipun pangulu manughandug ti manga paggurangunun manga Hudiyu, namululungan sida bag-u nagpakaun sida daka pagka kuwarta sa manga sundalu nagguwardiya.

¹³ Bag-u kanda binilinan sida magkun, “Sabihun lang niyu, ‘Pagka yabi kami naturug nagluwang kay manga tuludluan, kanda tinakaw kay bangkay ni Hisus.’

¹⁴ Nu abi maalaman gubirnadur, bahala kami maghampang sa kanya hampay kamu balaw maisugan niya.”

¹⁵ Nakan tinanggap manga guwardiya ti kuwarta, kanda tinupad ti manga itinudlu sa kanda. Tunda pag barita naalaman ngani tanan manga Hudiyu hanggan taynguna tugka.

Sinugu ni Hisus Kay Sampulu may Usa ka Tuludluan

¹⁶ Ti sampulu may usa ka tuludluan nag-atag sa Galiliya sa bantud kay itinudlu ni Hisus sa kanda.

¹⁷ Pagka nakitan nida si Hisus nagyuk-ub sida nagsamba sa kanya, madi ti iba magsalawahan di.

¹⁸ Nagpakarani si Hisus bag-u sinabi niya sa kanda magkun, “Ipinakaun sa kangku ti tanan karampatan sa langit hanggan sa babaw daga.

¹⁹ Nakan pag-ati kamu buwata niyu tuludluan niku ti tanan linahi tawu. Itulbaw niyu sida ipasakup sa ngaran Ama, Anak, hanggan Ispiritu Banal.

²⁰ Tudluan niyu sida hampay tumupad sa tanan manga isinugu niku sa kanyu. Danga kalimtan niyu aku pirmi kaibahan niyu hanggan waya sa katapusan panahun.”