Matiyu 27 - Hanunuu

Dinara si Hisus tag sa kan Pilatu

¹ Pagka surip, nagpululungan ti tanan manga pangulu manughandug hanggan ti manga paggurangunun manga Hudiyu laban sa kan Hisus hampay siya matyun.

² Kanda pinagapus siya bag-u kanda dinara hampay ipabahala siya sa kan Gubirnadur Pilatu.

Ti Kamatayan ni Hudas

³ Pagka nakitan ni Hudas kanda nasintinsiyahan si Hisus sa kamatayan, nanisi siya sa kay nagpakampi sa kalaban. Inuli niya ti tatlumpulu ka kuwarta pilak sa manga pangulu manughandug hanggan sa manga paggurangunun sa nasyun.

⁴ Sinabi ni Hudas sa kanda, “Nagkasala gid aku. Itinudlu niku sa kalaban ti tawu hampay siya matyun madi unman may kasalanan.” Magkun sida, “Hintay kanmi labut, bahala kawu asan.”

⁵ Sinarwag yi lang ni Hudas ti manga kuwarta pilak tag sa sulud Balay Diyus. Bag-u linmakaw siya rargu nangugut.

⁶ Pinamunpun manga pangulu manughandug ti manga kuwarta pilak bag-u magkun sida, “Bawal sa Kasuguan ipauli inda pag kuwarta sa sukadan kuwarta sa Balay Diyus. Inda nakan kabaydanan sa usa ka buhi tawu.”

⁷ Pinagkasunduan nida tunda pag kuwarta ti ibili sa daga manugpanday anglit hampay kanda buwatun tunda pag daga lulubngan manga day-uhan.

⁸ Nakan ngani iningarnan nida Madugu pag Daga, hanggan taynguna tugka.

⁹ Pagka nangyari tida natupad ti bagaw ipinadakit ni Purupita Hirimyas magkun, “Bin-ul nida ti tatlumpulu ka kuwarta pilak ti kabaydanan sa usa ka buhi tawu dahil imaw kanda pahalaga manga Israilita sa kanya.

¹⁰ Bag-u ibinili nida sa daga manugpanday anglit, angay sa kay isinugu Panginuun sa kangku.”

Si Hisus sa Atubangan ni Pilatu

¹¹ Pinaatubang si Hisus sa kan Gubirnadur Pilatu. Nagpaingana ti gubirnadur sa kan Hisus magkun, “Kawu yi aw ngani ti Hari manga Hudiyu?” Nagsagut si Hisus magkun, “Hu. Kawu tunda ti may sabi.”

¹² Dapat pagka siya idinimanda manga pangulu manughandug hanggan manga paggurangunun manga Hudiyu, udyi lang siya nangingay.

¹³ Nakan ngani sinabi ni Pilatu sa kanya, “Unman aw nimu mag-adnugan kanda manga dimanda laban sa kanmu?”

¹⁴ Dapat unman nagsagut si Hisus una di. Nakan ngani lalu naglingut ti gubirnadur.

Nasintinsiyahan si Hisus sa Kamatayan

¹⁵ Kada Kapistahan sa Pag-alaala sa Karibrihan kay ugali ni Pilatu pagpalpasan ti usa ka pirisu una hintay pag pirisu ti hagadun manga tawu.

¹⁶ Ati katpung may usa ka pirisu kilala tanan tawu. Kay ngaran si Hisus Barabas.

¹⁷ Nakan pagka natipun ti manga tawu, pinaingana sida ni Pilatu magkun, “Si unu ti gustu niyu palpasan niku, ngatay si Hisus Barabas aw ngatay si Hisus ti pagkumnun Pinili Diyus Manugribri pag Hari?”

¹⁸ Dahil alam ni Pilatu maghirak sida, nakan kanda ipinabahala si Hisus sa kanya.

¹⁹ Pagka si Pilatu nakatukaw sa kay tukawan biristahan, nagpasabi kay asawa atag sa kanya magkun, “Danga kawu maglabut siyun pag tawu unman may kasalanan, dahil kis-ab yabi nakurian aku sa kang tagin-up tungkul sa kanya.”

²⁰ Ti kayamuan tawu waydi pagpakaudyukan manga pangulu manughandug hanggan manga paggurangunun manga Hudiyu hampay pamuhunun sa kan Pilatu si Barabas ti ipalpas ag si Hisus ti ipamatay.

²¹ Kas-a waya sida pinaingana gubirnadur, “Hintay kanyu gustu siyun sa duwa ti palpasan?” Kanda sagut, “Si Barabas duy.”

²² Sinabi ni Pilatu sa kanda, “Nu katunda, hintay ti buwatun sa kan Hisus ti pagkumnun Pinili Diyus Manugribri pag Hari?” Sinmagut sida tanan, “Papakuan nimu sa kurus!”

²³ Nagpaingana maan si Pilatu, “Hayga, hintay pag kadautan kay binwat niya?” Dapat lalu waya gid kanda irininggit, “Ipaku siya sa kurus!”

²⁴ Pagka naintindihan ni Pilatu udyi siya may mabuwat, bagay lalu ngap magulu ti manga tawu, namab-ul siya danum, nangugas kay kamang sa atubangan manga tawu magkun, “Unman aku may saragtun sa kay kamatayan inda pag tawu. Bahala duy kamu.”

²⁵ Sinmabi di gid maan ti manga tawu, “Saragtun nimi hanggan nimi manga anak kay kamatayan niya.”

²⁶ Bag-u pinalpasan ni Pilatu si Barabas, dapat ipinagaruti niya si Hisus, bag-u ipinakaun sa sundalu hampay ipaku sa kurus.

Pag-away-awayun manga Sundalu si Hisus

²⁷ Bag-u dinara manga sundalu gubirnadur si Hisus tabug sa balay gubirnadur, ag tinipun nida ti kayamuan sundalu sa kay libut ni Hisus.

²⁸ Linkasan siya bag-u kanda pinakulimpayan rutay marara.

²⁹ Sinulapid nida ti dugihan bag-u kanda ipinasangbaw sa kay ulu ni Hisus ga sangbaw hari, ipinahiyaput nida ti bahi anyamu sa kay sikun pag kamang. Bag-u ti kada usa sa kanda nagluhud sa atubangan ni Hisus, kanda sinabi, “Pagmasulung kawu, Hari manga Hudiyu.”

³⁰ Ag kanda pinamug-anan siya. Bin-ul nida ti anyamu ginan sa kay kamang bag-u kanda ibinakul sa kay ulu.

³¹ Pagka nakatapus kanda mag-away, bin-ul maan nida ti kulimpay marara, pinasulungan nida kay sadili rutay bag-u kanda yi ipinalwas hampay ipaku sa kurus.

Ipinaku si Hisus sa Kurus

³² Pagka magluwas sida sa banwa, nakitan nida ti usa ka lalaki kay ngaran si Simun taga Sirini. Ipinalugus nida ipinapas-an sa kanya kay kurus ni Hisus.

³³ Rinmas-ug sida sa daga kay ngaran Gulguta (kay kahulugan, ga but-ul ulu pag rugar.)

³⁴ Bag-u pinakan-an nida si Hisus intus may libug apdu. Dapat pagka natigsiman niya balaw nanginum siya.

³⁵ Pagka kanda ipinaku siya sa kurus, inayaw-ayaw nida kay manga rutay alinaban waya nida sa lunggungan.

³⁶ Bag-u tinmukaw sida siyun hampay kanda bantayan si Hisus.

³⁷ Isinurat sa kay tungud ulu ti dimanda laban sa kanya magkun, “Inda si Hisus ti Hari manga Hudiyu.”

³⁸ Ati katpung duwa ka tulisan kay kadungan ni Hisus ipinaku waydi sa kurus, ti usa sa sikun baliwa pag kurus, kay usa sa wala baliwa pag kurus.

³⁹ Ti manga maglawuy siyun nagmuransa diman waydi sa kan Hisus, nagtuknatukna kanda ulu,

⁴⁰ magkun, “Unman aw kawu ti mangguba Balay Diyus bag-u ipatindug uman sa sulud tulu ka sirang? Nu kawu ngani ti Anak Diyus ribrihan nimu taynguna kanmu sadili bilug. Pagdugsun yi ginan sa kurus.”

⁴¹ Hinangalhangal diman siya manga pangulu manughandug, manga manugtudlu Kasuguan hanggan manga paggurangunun manga Hudiyu. Kay sabi nida,

⁴² “Irinibri niya ti iba dapat unman kaya niya iribri kay sadili. Bukun aw siya ti Hari Israil? Pagdugsun lang siya taynguna sa kurus bag-u maniwala kami sa kanya.

⁴³ Magsarig siya sa Diyus. Nu tutuu siya pagbayaun Diyus kailangan iribri niya siya. Sinabi niya kabay kuntay siya Anak Diyus.”

⁴⁴ Kumun diman ti ihinangalhangal sa kanya manga tulisan kay kadungan niya ipinaku sa kurus.

Ti Pagkamatay ni Hisus

⁴⁵ Bag-u nagdulum ti init sa bilug kalibutan ginan sa karaw-an sirang hanggan tugka palis ti init.

⁴⁶ Pagka arani yi palis ti init, nagtawag si Hisus magkun, “Ili, Ili, lima sabaktani?” Kay ibug sabihun, “Diyus niku, Diyus niku, hayga pinabay-anan nimu aku?”

⁴⁷ Manga matindugan siyun nakadnug sa kay bagaw ni Hisus. Magkun sida, “Magtawag maaw siya sa kan Ilyas.”

⁴⁸ Madali nalagiw ti usa sa kanda bag-u binmuul siya ispungha kay binasa maaslum pag intus bag-u ipinauli sa pudpud anyamu bag-u pinasupsup sa kan Hisus.

⁴⁹ Dapat sinabi manga iba, “Pag-alagad dapu, bantayan nita nu ngatay lumuwang si Ilyas hampay iribri siya.”

⁵⁰ Nagtawag maan daka si Hisus bag-u naugtasan arup.

⁵¹ Bigla nagisi sa karaw-an ti limbun rutay sa Balay Diyus ginan sa tungud sadsad sa sirung. Naglinug, nan-girini ti manga batu.

⁵² Nabukasan ti manga lubung. Nabuhi maan uman ti mayamu manga matadlung ginan sa kamatayan.

⁵³ Napalwas sida ginan sa kalubngan. Pagka nabuhi uman si Hisus sinmulud sida sa sakup sa Diyus pag banwa. Mayamu tawu ati ti nakakit sa kanda.

⁵⁴ Pagka nadnugan nida ti linug ag pagka nakitan nida ti nangyari, nadala masyadu ti kapitan hanggan ti manga sundalu kaibahan niya magbantay sa kan Hisus. Magkun sida, “Tutuu ungud Anak Diyus inda.”

⁵⁵ Siyun diman ti mayamu pag babayi magbantay ginan sa arayu. Ginan waya sa Galiliya nagkuyug sida sa kan Hisus nagsirbi sa kanya.

⁵⁶ Minsan sa kanda si Marya Magdalina hanggan si Marya kay ina nida ni Santiyagu, ni Husi hanggan kay ina nida ni Huwan, ni Santiyagu, ti manga anak Sibidiyu.

Kay Naglubung sa kan Hisus

⁵⁷ Pagka maghugut marukirum, rinmas-ug ti usa ka mayaman taga Arimatiya kay ngaran si Husi, tuludluan diman ni Hisus.

⁵⁸ Nag-ati siya sa kan Pilatu bag-u hinagad niya ti bangkay ni Hisus. Nakan ibinilin ni Pilatu magkun pakan-an ti bangkay sa kanya ni Hisus.

⁵⁹ Bin-ul ni Husi ti bangkay, kay sinaput sa pisahan rutay linu,

⁶⁰ bag-u ipinauli niya sa kay bag-u ipinabuwat pag para sa kay sadili tinaguktukan batu. Pagka nipauli yi niya bag-u ipinaligid niya ti usa ka laun pag batu tag sa kay sabian, bag-u siya nuli.

⁶¹ Siyun diman si Marya Magdalina hanggan ti usa waya ka Marya matukawan sa kay tupad tinaguktukan batu.

Ti manga Guwardiya sa Tinaguktukan Batu

⁶² Pagka nasurip sirang yi magdasun sa sirang nida maghanda sa Kapistahan, nagminsan ti manga pangulu manughandug hanggan ti manga Parisiyu nag-ati sa kan Pilatu.

⁶³ Sinabi nida, “Naalaala duy nimi pagka siya buhi waya, sinabi tunda pag magpanaguabi magkun, nu lawuy tulu ka sirang mabuhi siya uman.

⁶⁴ Pabantayi duy kaayad-ayad ti tinaguktukan batu hanggan sa ikatlu pag sirang. Barang umati kay manga tuludluan, barang kanda takawun kay bangkay bag-u kanda sabihun sa manga tawu magkun, ‘Nabuhi uman siya.’ Inda abi pagdaya subra waya sa kabag-u.”

⁶⁵ Nagsabi si Pilatu sa kanda, “Pagbuul kamu manga guwardiya, pabantayi niyu kaayad-ayad ti tinaguktukan batu angay sa kanyu kaya.”

⁶⁶ Nakan ngani nag-ati sida sa tinaguktukan batu, bag-u sa magbantay manga guwardiya siniradu nida ti sabian hampay pihu unman may gumaraw.