Matiyu 24 - Hanunuu

Tungkul sa Pagguba Balay Diyus

¹ Nagluwas si Hisus sa Balay Diyus. Paraginanun yi siya nagpakarani sa kanya kay manga tuludluan, pag-itudlu nida sa kanya kay karinu pag pinangalap Balay Diyus.

² Dapat magkun siya, “Makitan aw niyu ti pinangalap tunda? Ungud duy kang pagsabihun sa kanyu, nu rumas-ug ti kaudasan, unman may masawad batu sa kay kaparihu babaw batu, tanan-tanan magkarapugdak yi lang.”

Manga Kakurian hanggan Pag-unuunu

³ Si Hisus ati sa bantud manga Ulibu. Sa kay matukawan siyun pagka unman may nakadnug iba, pinaingana siya niya manga tuludluan magkun, “Pagtultul duy kawu sa kanmi nu kapira nguna tunda pag mangyari. Hintay kay tanda aban nu arani yi kanmu pagbalik hanggan kay katapusan kalibutan?”

⁴ Nagsagut si Hisus magkun, “Pag-aman gid kamu hampay kamu balaw mapatalang una hintay pag tawu.

⁵ Dahil mayamu ti sumitay mag-apu kang ngaran magsabi, ‘Aku ti Pinili Diyus Manugribri pag Hari.’ Mayamu kanda patalangun aban.

⁶ May madnugan kamu aban manga barita tungkul sa gira una sa arani una sa arayu. Dapat danga kamu magkaaburidu. Pihu mangyari tunda, dapat balaw waya tunda ti katapusan.

⁷ Manlalabanan ti parihu banwa, hanggan ti parihu kaharian. May lun-us, may manga linug sa tuhay-tuhay pag rugar.

⁸ Ti tanan tunda imaw yi ti umpisa di waya manga kakurian.

⁹ “Sa ati pag manga sirang aban, dakpun kamu hampay pakurian ag matyun. Kagalitan kamu tanan tawu dahil sa kanyu pakiusa sa kangku.

¹⁰ Mayamu ti umalinlangan sa kanda pagsarig bag-u mangalagalitan sa usa kag sa usa. Pumakampi ti iba sa kalaban bag-u itudlu ngap nida kanda kaparihu.

¹¹ Mayamu aban ti pumabalhinguun kuntay purupita bag-u patalangun nida ti kayamuan.

¹² Yumamu gid aban ti kadautan nakan ti kayamuan tawu manramig kay pagmahal.

¹³ Dapat tigpakarig-un hanggan tugka sa katapusan imaw ti maribri.

¹⁴ Itudlu dapu sa bilug kalibutan ti Mayad pag Barita tungkul sa kay paghari Diyus hampay lalu maalaman tanan nasyun. Bag-u di rumas-ug ti katapusan.”

Ti Lapastangan unman may Kaparihu

¹⁵ Magkun si Hisus, “Makitan niyu aban mangyari sa Balay Diyus ti lapastangan unman may pumarihu imaw ti pagsabihun ni Purupita Danyil. (Kailangan intindihun manga manugbasa).

¹⁶ Pagka mangyari tunda, ti manga tawu sa Hudiya pagpalagiw yi tabug sa kabantudan.

¹⁷ Ti sa luwas danga yi mag-isip mam-ul waya manga butang sa sulud balay.

¹⁸ Ti sa tanman danga yi mag-isip muli waya mam-ul kulimpay.

¹⁹ Kaawaawa ti manga magbuduy hanggan magpasusu sa anak ati katpung pag kaudasan.

²⁰ Pagdarangin kamu hampay sa kanyu katpung magpalagiw balaw mitama sa tigraramig hanggan Sirang Pamahari.

²¹ Dahil ati katpung aban ti manga tawu makalakaw sa subra yi gid pag kakurian unman waya nalakawan manga tawu ginan waya sa pagkalalang kalibutan hanggan waya taynguna tugka, dayi malakawan maan hanggan waya aban.

²² Nu unman padag-udun di Diyus aban tunda pag udas kakurian, unman may tawu maribri. Dapat dahil ngani sa kay manga pinili, padag-udun Diyus tunda pag udas kakurian.

²³ “Nu may magsabi sa kanyu magkun, ‘Inda yi ngani ti Pinili Diyus Manugribri pag Hari’, aw ngatay, ‘Asan ngap siya’, danga kamu magpaniwala.

²⁴ Dahil may pumabalhinguun aban kuntay siya yi ngani ti Pinili Diyus Manugribri pag Hari. May lumuwang manga pudilun pag purupita. Pumakakit sida manga makadululaw pag tanda hanggan manga lilingutan pag manga buwat hampay nu mahimu lang, patalangun nida hanggan ti manga pinili Diyus.

²⁵ Tandai gid niyu, dahil udwaya nangyari tunda, ipinasandam yi niku daan sa kanyu.

²⁶ “Nakan ngani nu sabihun nida sa kanyu, ‘Ati siya sa pangawakawaan’, danga kamu mag-ati. Nu sabihun nida, ‘Ati siya sa sulud-sulud’, danga kamu magpaniwala.

²⁷ Nu kabitay ti kilat kay kabisug kay magbalagit ginan sa butlakan hanggan isalpan, katunda diman waydi kay pagsitay Anak Tawu.

²⁸ “Nu naan ti may buyuk, ati diman waydi pag magkatigsun ti manga uwak.”

Sa Pagsitay Anak Tawu

²⁹ Sinabi ni Hisus magkun, “Ati katpung aban nu nakalawuy yi tunda pag kakurian, susun dumulum ti init, dayi maninggit ti bulan, mangalagpak ti manga pamgasan ginan sa langit, ti manga bagay sa panungaan langit daga matandug ag magkalabalyuhan sa panungaan langit daga.

³⁰ Bag-u makitan nida sa langit ti tanda Anak Tawu. Manrukuan di ti tanan nasyun sa babaw daga nu makitan nida ti Anak Tawu rumas-ug napadara sa rurum ginan sa langit may kamaskihan hanggan daka pag kadayawan.

³¹ Suguun niya kay manga anghil may budyung daka hampay tipunun nida ti manga pinili Diyus ginan sa upat ka puun durus, ginan sa bilug kalibutan.”

Pahalimbawa sa Puun Igus

³² Sinabi ni Hisus magkun, “Intindiha niyu kang pag-iadal tungkul sa puun igus. Pagka nanugbuk, nanlabung kay manga sanga, alam niyu arani yi ti abagat.

³³ Katunda diman waydi nu makitan niyu tunda pag manga mangyari tanan-tanan, alam yi niyu udyi dugay ti kaudasan pagras-ug niya, arani yi gid.

³⁴ Ungud duy kang pagsabihun sa kanyu, dayu mamatay inda pag manga tinubu tawu hanggan sa ud matupad inda tanan-tanan kang sinabi.

³⁵ Madura di aban ti langit hanggan ti daga, dapat kang manga bagaw dayu pumalya.”

Unman may Tawu Umalam sa Kaudasan Pagras-ug Panginuun

³⁶ Sinabi ni Hisus magkun, “Dapat unman may tawu umalam nu kapira tunda pag mangyari aban una kay sirang, una kay udas. Unman may makaalam una manga anghil sa langit, una paman ti Anak. Ti Ama lang ti makaalam tunda.

³⁷ Kay pagras-ug Anak Tawu parihu aban sa kay nangyari sa nagkagunaw kaybi sa ati katpung sa kan Nuwi.

³⁸ Ati katpung magkaun mag-inum diman ti manga tawu, magpangarasawa ag pag-ipaasawa hanggan sa udwaya nagsakay si Nuwi sa kay barku.

³⁹ Nagras-ug ti gunaw unman nida namalayan, inanud sida tanan-tanan. Katunda diman ti mangyari aban sa kay pagras-ug Anak Tawu.

⁴⁰ Sa ati pag manga sirang, may duwa ka lalaki magtarabahu sa tanman, bul-un kay usa, tayakan kay usa.

⁴¹ May duwa ka babayi mag-arawatan sa maggaling, bul-un kay usa, tayakan kay usa.

⁴² Nakan pag daan kamu alistu, dahil unman niyu alam ti sirang ngatay udas pagras-ug niyu Panginuun.

⁴³ Tandai gid niyu inda, nu alam lang may puun balay nu kabitay ti yabi kay pagras-ug mananakaw, umulug mana siya hampay balaw pabay-anan niya kay balay suldun mananakaw.

⁴⁴ Nakan ngani kailangan pirmi kamu alistu dahil rumas-ug ti Anak Tawu pagka udyi kanyu pag-isipun.”

May Panawuhun Matinupadun

⁴⁵ Sinabi ni Hisus magkun, “Ti panawuhun nu matinupadun ag mapininsarun imaw ti pagpiyaran niya amu hampay pakan-an niya karan-unun kay kaparihu manga panawuhun, may bahaw, may yabas, may yapun.

⁴⁶ Masulung tunda pag panawuhun nu maras-ugan siya magtupad sa kay buruwatun sa kay pagbalik niya amu.

⁴⁷ Ungud duy kang pagsabihun sa kanyu, iintirga niya amu sa kanya ti tanan kasiyunan.

⁴⁸ Dapat nu alangan tunda pag panawuhun, mag-isip yi siya sa kay sadili, dugay waya bag-u bumalik kang amu.

⁴⁹ Bag-u binakul yi niya kay kaparihu manga panawuhun. Bin-ul niya kay manga ampud bag-u nanginuman may sumsuman sida.

⁵⁰ Bumalik kay amu tag sa tunda pag panawuhun sa sirang unman pag-isipun niya kuntay rumas-ug kay amu ati katpung ag sa udas unman niya naalaman.

⁵¹ Barian yi siya sa parusa niya amu, iminsan yi sa manga magpabalhinguun. Ati sida magnguruynguyan ag mangubut kanda manga ngipun.”