Matiyu 23 - Hanunuu

Amanan ti manga Manugtudlu Kasuguan ag ti manga Parisiyu

¹ Pagka dugay sinabi ni Hisus sa manga tawu hanggan sa kay manga tuludluan,

² magkun, “Ti manga manugtudlu Kasuguan hanggan ti manga Parisiyu imaw ti pagsarigan pag manga manugpaliwanag tungkul sa Kasuguan ni Muysis.

³ Nakan buwata niyu kanda pag-itudlu, tupada kanda manga pag-isugu. Dapat danga niyu paghuwada kanda ugali dahil unman kanda pagtupadun kanda pag-itudlu.

⁴ Kanda pag-ipatupad sa kanyu ti makuri pag kasuguan, dapat sida ngap ti unman magtupad tunda.

⁵ Lunsay pakakit-kakit lang sa manga tawu kanda buwat. Paglapadun nida kanda kulimpay pandarangin. Ag hampay ipakakit nida kuntay matutum kanda pagsarig, pag-ipaaba nida kay paraway-raway sa sidsid nida kulimpay.

⁶ Nu may karan-an kanda gustu makatukaw sa marinu pag tukawan, ag nu sa simbahan kanda gustu tumukaw sa tukawan ihinanda sa may kangaranan.

⁷ Kay gustu nida paggalangun sida manga tawu nu maglakaw sa palingkihan. Kanda gustu pag-ingarnan sida magkun, ‘Maisturu.’

⁸ “Dapat kamu danga pagpaingarni maisturu. Dahil usa lang kanyu Maisturu, kamu tanan magtar-arian.

⁹ Danga yi pag-ingarni ‘Ama’ una si unu pag tawu sitay sa babaw daga dahil usa lang kanyu ama, imaw yi ti Ama sa langit.

¹⁰ Danga kamu pagpaingarni, ‘Amu,’ dahil usa lang kanyu amu, imaw yi ti Pinili Diyus Manugribri pag Hari.

¹¹ Ti lalu mataas sa kanyu imaw ngap ti sumirbi sa kanyu.

¹² Una si unu nu magpalabaw-labaw ipaababa ngap Diyus, dapat ay tigpakumbaba imaw ngap ti pahalgaan Diyus.”

¹³ Sinabi ni Hisus, “Kaawaawa kamu pag manga manugtudlu Kasuguan hanggan manga Parisiyu, magpabalhinguun lang kamu! Bilang ga tinalakpan niyu ti sabian hampay ti manga tawu dayu makasulud sa kaharian langit. Kamu dayu magsulud sa kaharian langit bag-u kanyu waya pag-amparahun ti manga magkaibug magsulud ati.

¹⁴ “Kaawaawa kamu pag manga manugtudlu Kasuguan hanggan manga Parisiyu, magpabalhinguun lang kamu! Pagtabuhun niyu ti kasiyunan manga buranday dapat magpadayaw-dayaw diman kamu sa kanyu magdarangin araba. Dahil sa katida lalu waya mabuyat aban pag parusa sa kanyu!

¹⁵ “Kaawaawa kamu pag manga manugtudlu Kasuguan hanggan manga Parisiyu, magpabalhinguun lang kamu! Magsakay kamu sa sarakyan sa dagat magpalibut-libut kamu sa bilug kalibutan hampay magpanggarya kamu sa una lang usa ka balaw Hudiyu tabug sa surundanun Hudiyu. Pagka nagarya yi niyu lalu ngap kanyu pagpabuywun tag sa kadautan sa impirnu.

¹⁶ “Kaawaawa kamu buta pag manga manug-abat. Pag-itudlu niyu nu sa kay magsumpa paghinangbitun tawu ti Balay Diyus unman may pulus kay sumpa. Dapat nu paghinangbitun niya ti gintu sa Balay Diyus kailangan tupadun gid niya kay isinumpa.

¹⁷ Manga buta kamu, manga luku-luku. Hintay ti lalu mahalaga, ngatay ti gintu aw ngatay ngap ti Balay Diyus kay haramnuan gintu para sa Diyus?

¹⁸ Pagsabihun diman niyu nu sa kay magsumpa paghinangbitun tawu ti surunugan manga handug tabug sa Diyus unman may pulus kay sumpa. Dapat kailangan tupadun gid niya kay isinumpa nu paghinangbitun niya ti handug sunugun sa surunugan tabug sa Diyus.

¹⁹ Manga buta kamu, hintay nguna ti lalu mahalaga, ngatay ti handug aw ngatay ti harandugan ngap tigpakilala kahulugan manga handug tabug sa Diyus.

²⁰ Nakan ngani, nu paghinangbitun tawu ti surunugan, hininangbit niya hanggan ti manga handug sa Diyus pagsunugun siti.

²¹ Nu paghinangbitun tawu ti Balay Diyus, hininangbit niya ti balay hanggan ti mag-uli siyun.

²² Nu paghinangbitun tawu ti langit, hininangbit niya ti kaharian Diyus hanggan tig hari.

²³ “Kaawaawa kamu pag manga manugtudlu Kasuguan hanggan manga Parisiyu, magpabalhinguun lang kamu! Dahil kamu magpakaun ikasampulu manga pamanglu sa upi hanggan tanan manga urupiun, dapat unman niyu pagtupadun ti mas mahalaga pag sugu tungkul sa katadlungan hanggan sa maawaun ag matinupadun. Dahil magpakampi kamu sa kadautan, unman kamu maawaun, unman diman matinupadun. Balaw salan kamu sa kanyu magpakaun ikasampulu, dapat danga waydi niyu paglimti pagtupada ti mas mahalaga pag manga sugu.

²⁴ Kamu duy buta pag manga manug-abat. Pagsaraun niyu ti alukhuk sa kanyu irinmun dapat pagtulnun lang niyu ti kamilyu.

²⁵ “Kaawaawa kamu pag manga manugtudlu Kasuguan hanggan manga Parisiyu, magpabalhinguun lang kamu! Paglumpiyuhun niyu ti manga dayu habig ungut hanggan taya, dapat ti sa sulud punu kayagtingan, dahil sa kanyu maramuun ag kanyu daut naisipan.

²⁶ Kamu buta pag manga Parisiyu, lumpiyuha dapu niyu ti sa sulud ungut hampay malumpiyu diman waydi hanggan kay habig.

²⁷ “Kaawaawa kamu pag manga manugtudlu Kasuguan hanggan manga Parisiyu, magpabalhinguun lang kamu! Kamu ga manga lubung pininturahan malagti, marinu mana sa luwas dapat ti sa sulud punu ngap but-ul manga namatay hanggan kayagtingan.

²⁸ Katida ngani kamu, sa magbantay lang tawu manga mayad yi gid kamu, dapat nu sa ungud pasay yi kamu magpabalhinguun lang, manga labag ngap kamu sa Kasuguan.”

²⁹ Sinabi ni Hisus magkun, “Kaawaawa kamu pag manga manugtudlu Kasuguan hanggan manga Parisiyu, magpabalhinguun lang kamu! Pag-ipatindug niyu ti manga balay kalubngan manga purupita, kanyu pagparinuun maan ti kalubngan manga tawu matadlung kanda ugali kaybi.

³⁰ Magkun kamu, ‘Nu abi kami buhi lang ati katpung sa kaapu-apuhan, balaw nimi inawatan sida sa kanda magmatay sa manga purupita.’

³¹ Sa kanyu sinabi tunda, pag-akuun ngap niyu kamu linahi manga nagmatay sa manga purupita.

³² Hala, tapusa yi lang niyu ti inumpisahan niyu ginurang kaybi.

³³ “Kamu ga manga ulay, linahi manga udtu adlaw. Kabitay kamu pag makaiwas sa sintinsiya tabug sa impirnu?

³⁴ Nakan ngani magsugu aku manga purupita atabug sa kanyu, manga madunung pag tawu hanggan manga manugtudlu. Matyun niyu aban ti iba, kay iba ipaku niyu sa kurus, kay iba garutihun niyu aban sa kanyu manga simbahan, kanyu unu-unuhun sa kabanwa-banwahan.

³⁵ Nakan ngani mitama gid sa kanyu ti kaparusahan sa nagmatay sa manga matadlung pag manga tawu sa bilug kalibutan ginan waya sa nanmatay sa kan Abil hanggan sa nanmatay sa kan Sakaryas ti anak ni Barakyas, kanyu minatay sa tab-anan Balay Diyus ag surunugan hayup handug sa Diyus.

³⁶ Ungud duy kang pagsabihun sa kanyu, ti parusa sa tanan inda mitama sa inda pag manga tinubu tawu.”

Kay Pagmahal ni Hisus sa Hirusalim

³⁷ Sinabi ni Hisus, “Hirusalim, Hirusalim, pagpanmatyun nimu ti manga purupita, pagbatuhun nimu ti manga sinugu Diyus tabug sa kanmu. Kapira yi ginan kang hinanap ti manga mag-uli sa kanmu sulud, hampay kang likumun, parihu ga inaan manuk mag-ukub sa kay manga butu, dapat dayu di ngap kamu.

³⁸ Bantayi niyu ti Balay Diyus asan tinayakan yi, udyi mag-uli asan kay apu.

³⁹ Pagsabihun niku sa kanyu udyi gid niyu aku makitan hanggan sa udwaya rumas-ug pag udas nu kanyu sabihun magkun, ‘Dayawun ti magras-ug sa ngaran Panginuun.’ ”