Matiyu 22 - Hanunuu

Ti Pahalimbawa tungkul sa Pamasaruhan

¹ Nagbagaw maan si Hisus sa kanda sa manga pahalimbawa magkun,

² “Ti kaharian langit parihu ga sa usa ka hari naghanda pamasaruhan niya anak lalaki.

³ Sinugu niya kay manga panawuhun hampay kanda ban-awan yi tag sa pamasaruhan ti manga pinaalaman niya sa kabag-u. Dapat sida dayu magluwang.

⁴ Nagpasugu maan uman ti hari sa kay manga panawuhun magkun, ‘Sabiha niyu sa kang manga pinaalaman, malu ihinanda yi niku ti manga karan-unun, iniyaw yi niku kang manga tudu baka hanggan ti pinatabul pag manga ibun baka. Pagluwang yi kamu sitay sa pamasaruhan.’

⁵ “Dapat balaw sida nagsunud sa manga panawuhun. Sida ngap naglinakaw, ti usa tag sa kay tanman, ti usa nangasikasu di sa kay manga nigusyu.

⁶ Dinakup di ngap manga iba ti manga panawuhun hari kanda inunu-unu rargu ngap minatay nida.

⁷ Nakan nangisug gid ti hari. Sinugu niya ti usa ka gurupu sundalu, tinudas tunda pag manga manugmatay tawu bag-u kanda tinutdan kanda banwa.

⁸ Bag-u sinabi hari sa kay manga panawuhun, ‘Alistu yi mana ti pamasaruhan dapat unman may karampatan ti manga pinaalaman sa kabag-u.

⁹ Pag-ati maan kamu sa karsada, tabanun niyu ti tanan tawu kanyu nakitan sitay tag sa pamasaruhan.’

¹⁰ “Bag-u nag-ati yi ngani ti manga panawuhun sa manga karsada. Kanda tinipun ti tanan-tanan nida nakitan, una daut una mayad pag tawu. Nakan napnu tawu ti balay may apu pamasaruhan.

¹¹ Dapat pagka nanduaw ti hari sa manga tawu nagluwang sa pamasaruhan, may nakitan siya ati usa ka tawu kay sulung pag rutay balaw angay sa pamasaruhan.

¹² Magkun ti hari sa kanya, ‘Duy, hayga kawu nagsaka sitay balaw may sulung rutay angay sa pamasaruhan?’ Unman siya may isagut.

¹³ Bag-u sinabi hari sa manga suruguun magkun, ‘Gapusa niyu kay manga lulud hanggan kamang bag-u iyamut niyu siya tag sa madlum sa luwas. Ati sida magnguruynguyan ag mangubut kanda manga ngipun.’ ”

¹⁴ Tinapus ni Hisus kay pahalimbawa magkun, “Mayamu ti manga pinaalaman, dapat pira-pira lang ti manga napili.”

Tungkul sa Pagbayad Buhis

¹⁵ Bag-u nag-ati ti manga Parisiyu nagpululungan sida nu kabitay nida mapasalan si Hisus sa kay bagaw.

¹⁶ Nakan sinugu nida kanda manga tuludluan hanggan manga napakampi sa kan Hirudis, sinabi nida sa kan Hisus, “Maisturu, alam nimi kawu matinupadun. Pag-itudlu nimu ti buu katutuuhanan hampay tupadun manga tawu ti kagustuhan Diyus. Unman kawu magkadala una sa kantapu pag tawu, dahil kawu balaw may pag-apihun.

¹⁷ Sabiha duy nimu sa kanmi, hintay sa kanmu mag-isip, mayad nu bumuhis sa Pangulu Hari aw ngatay unman.”

¹⁸ Dapat alam di ni Hisus kanda turunu daut, nakan sinabi niya sa kanda, “Hayga aku kanyu pagsubukan, kamu pag manga magpabalhinguun.

¹⁹ Manhimalad aku kanyu pamuhis kuwarta.” Binulwat ngani nida sa kanya ti usa ka dinaryu.

²⁰ Bag-u sinabi niya sa kanda, “Kantapu pag uyahun ti mapalatan sa inda pag kuwarta, kantapu pag ngaran ti ipinirma?”

²¹ Sinmagut sida sa kanya magkun, “Sa Pangulu Hari duy inda.” Bag-u magkun si Hisus sa kanda, “Nakan ngani ipakaun lang sa Pangulu Hari ti para sa kanya. Dapat ay ipakaun niyu sa Diyus ti para sa Diyus.”

²² Pagka nadnugan nida kay sagut ni Hisus, naglingut gid sida, napatawas yi lang sida.

Tungkul sa Pagkabuhi Uman

²³ May manga Sadusiyu nagpakarani sa kan Hisus. Kanda paniwala basta namatay yi ti tawu balaw yi mabuhi uman. Magkun sida sa kan Hisus,

²⁴ “Maisturu, itinudlu ni Muysis, nu mamatay ti usa ka lalaki balaw may anak, kay patar-ari kailangan mag-asawa sa buranday hampay may anak sida imaw ti makamana sa kay pinagkagurang kayamanan.

²⁵ Kaybi may pitu ka magtar-ari lalaki sitay sa kanmi. Nag-asawa ti panganay. Pagka dugay namatay siya unman may anak.

²⁶ Nakan ngani nag-asawa maan sa buranday ti ikadwa. Katida diman ti nangyari sa ikadwa, hanggan sa kay ikatlu, hanggan waya sa ikapitu.

²⁷ Pagka tabu namatay ti pitu ka lalaki hanggan ti babayi namatay diman waydi.

²⁸ Nu sa pagkabuhi uman aban kantapu pag asawa ti babayi? Kabay inasawa niya tanan-tanan tunda pag pitu ka lalaki.”

²⁹ Magkun maan si Hisus, “Unman gid duy tama kanyu pagbagawun, dahil unman niyu magkasalman ti Banal Kasuratan hanggan kay kapangyarihan Diyus.

³⁰ Dahil sa pagkabuhi uman ti manga tawu unman yi mangasawa. Parihu sida sa manga anghil sa langit.

³¹ Tungkul bay sa pagkabuhi uman manga namatay, unman aw waya lugud magkabasa niyu sa Kasuratan kay sinabi Diyus sa kanyu? Sinabi niya,

³² ‘Aku ngani ti Diyus ni Abraham, Diyus ni Isaak ag Diyus ni Hakub.’ Ti Diyus balaw Diyus manga namatay nu unman Diyus ngap manga tawu may buhi.”

³³ Pagka nadnugan manga tawu inda nadulaw sida sa kay manga tudlu ni Hisus.

Ti Pinakamahalaga pag Sugu

³⁴ Pagka nabaritaan manga Parisiyu udyi may iningay ti manga Sadusiyu sa kan Hisus sinabi, naniripnan sida.

³⁵ Bag-u ti usa ka Parisiyu madunung gid sa Kasuguan ni Muysis namaingana sa kan Hisus hampay subukun siya magkun,

³⁶ “Maisturu, sa buu Kasuguan hintay ti pinakamahalaga pag sugu?”

³⁷ Sinmagut si Hisus, “Ilubus nimu kanmu tagipusuun, kanmu karadwa hanggan kanmu pag-iisip sa kanmu pagmahal sa kanmu Panginuun Diyus.

³⁸ Inda ti pinakamahalaga pag sugu.

³⁹ Kay pangadwa magkaparihu diman sa siti, ‘Mahala nimu kanmu kaparihu tawu ga kanmu sadili.’

⁴⁰ Inda pag duwa ka sugu imaw tigsakup sa buu Kasuguan ni Muysis hanggan sa pag-itudlu manga Purupita.”

Kay Paingana ni Hisus tungkul sa kay Linahi ni Dabid

⁴¹ Tiripun di waya ti manga Parisiyu, pinaingana sida ni Hisus magkun,

⁴² “Hintay kanyu magkaalaman tungkul sa Pinili Diyus Manugribri pag Hari? Naan ginan pag linahi siya?” Kanda sagut magkun, “Sa kan Dabid ginan.”

⁴³ Magkun si Hisus, “Nu katida hayga mag-ingaran si Dabid sa kanya magkun Panginuun. Angay sa udyuk Ispiritu Banal sinabi kabay ni Dabid magkun,

⁴⁴ ‘Sinabi Panginuun sa kang Panginuun, Pagtukaw kawu sitay baliwa sa kang sikun tugka sa maipasirung niku sa kanmu ti manga kalaban nimu.’

⁴⁵ Nakan nu si Dabid yi waydi ti nag-ingaran sa kanya magkun, Panginuun, kabitay pag masabi siya kay linahi ni Dabid?”

⁴⁶ Una di usa ud may nakasagut sa kan Hisus paingana. Tunda di ginan udyi may nakabaya nakapaingana sa kanya.