Matiyu 2 - Hanunuu

May Rinmas-ug ginan sa Butlakan Init

¹ Pagka nilusad yi si Hisus sa banwa Bitlihim sa daga Hudiya katpung hari si Hirudis, may manga madunung pag tawu nagras-ug sa Hirusalim ginan sa butlakan init.

² Namaingana sida, “Naan nguna pag iinanak ti Hari manga Hudiyu? Dahil nakitan nimi kay pamgasan sa butlakan init, nakan nagsitay kami hampay mansamba sa kanya.”

³ Pagka nadnugan inda ni Hari Hirudis, naaburidu siya hanggan ti buu Hirusalim.

⁴ Nakan tinipun niya ti tanan manga pangulu manughandug hanggan ti manga manugtudlu Kasuguan, bag-u pinaingana niya sa kanda nu naan pag ianak ti Kiristu.

⁵ Sinabi nida sa kanya magkun, “Sa Bitlihim sa daga Hudiya, dahil kainda kay isinurat purupita magkun,

⁶ ‘Kawu, Bitlihim, sa daga Huda, balaw kawu uryan sa manga un-an pag manga banwa sa Huda; dahil lumuwang aban ginan sa kanmu ti usa ka takinan. Siya yi ti mangalaga sa kang nasyun Israil.’”

⁷ Pagka nadnugan tunda ni Hirudis, pinatawag niya sa lihim ti manga madunung pag tawu bag-u pinaingana niya sa kanda mayad-mayad nu kapira gid pag linmuwang ti nakitan nida pag pamgasan.

⁸ Bag-u pinaatag niya sida sa Bitlihim. Kay waya binilinan magkun, “Pag-ati kamu, paingan-a niyu kaayad ti tungkul sa anak. Nu makitan niyu siya, pagpaalam waya sa kangku hampay aku makaatag waydi mansamba sa kanya.”

^9-10 Pagka nadnugan nida ti binagaw hari, linmakaw yi sida. Habang maglakaw sida, nakitan maan nida ti pamgasan sa butlakan init, bag-u nagbaya gid sida. Giniyahan sida pamgasan tugka sa makaras-ug sida sa ulian anak.

¹¹ Pagka nagsaka sida sa balay, nakitan nida ti anak hanggan kay ina si Marya. Nagyuk-ub sida nagsamba sa anak. Pagka binukasan nida kanda kayamanan, ipinakaun nida sa kanya kanda dara gintu, kamangyan hanggan mira.

¹² Sinabihan sida Diyus sa tagin-up, danga mag-ati lakaw sa kan Hirudis. Nakan sa kanda nuli sa kanda ulian lakaw yi sa usa ka dalan.

Nagpalagiw Sida ni Husi Tabug sa Ihiptu

¹³ Pagka ginminan yi tunda pag manga madunung pag tawu, ti usa ka anghil Panginuun napakakit sa kan Husi sa kay tagin-up magsabi, “Pagbangun kawu, daran-a yi ti anak hanggan kay ina, pagpalagiw yi kamu tag sa Ihiptu. Pag-ati dapu kamu hanggan sa ud sumabi maan aku sa kanmu, dahil hanapun ni Hirudis ti anak hampay kay matyun.”

¹⁴ Nakan sa tunda diman gid pag yabi, nagbangun si Husi ag dinara niya ti anak hanggan kay ina atabug sa Ihiptu.

¹⁵ Ati di sida sa Ihiptu hanggan sa udwaya namatay si Hirudis. Nangyari tunda hampay matupad kay bagaw Panginuun ipinadakit purupita magkun, “Tinawag niku kang anak ginan sa Ihiptu.”

Minatay ti manga Anak sa Bitlihim

¹⁶ Pagka naalaman ni Hirudis siya maaw pinudilan manga madunung pag tawu, nagalit siya masyadu. Nagsugu siya manga sundalu kay ipinamatay ti tanan manga anak lalaki sa banwa Bitlihim hanggan sa kay manga kalibut ginan sa lapsag hanggan sa duwa tugka ka timpu angay sa udas kay pinaingana sa manga madunung pag tawu.

¹⁷ Nangyari tunda hampay matupad yi ti bagaw ipinadakit ni Purupita Hirimyas magkun,

¹⁸ “May nadnugan sa banwa Rama maglulumian may magtarayagan. Paglumian ni Rakil kay manga anak, dayi malibang kay isip dahil udyi kay manga anak.”

Kanda Pagbalik maan ginan sa Ihiptu

¹⁹ Pagka namatay yi si Hirudis, ti usa ka anghil Panginuun napakakit sa kan Husi sa kay tagin-up ati sa Ihiptu.

²⁰ Magkun ti anghil, “Pagbangun kawu, daran-a nimu ti anak hanggan kay ina, pag-uli maan kamu sa daga Israil, dahil tigbak yi ti manga magkaibug mumatay sa anak.”

²¹ Binmangun ngani si Husi bag-u dinara niya ti anak hanggan kay ina atag maan sa daga Israil.

²² Dapat ay pagka naalaman ni Husi si Arkilaw maan ti maghari sa Hudiya kay ilis niya ama ni Hirudis, nadala siya nakan balaw napatarus tag sa Hudiya. Pagka sinabihan maan siya Diyus sa kay tagin-up, nag-atag siya sa daga Galiliya.

²³ Pagka rinmas-ug, ati sida pag nangulian sa banwa Nasarit, hampay matupad ti bagaw ipinadakit manga purupita magkun, “Siya aban ingarnan Nasarinu.”