Matiyu 19 - Hanunuu

Kay Tudlu ni Hisus tungkul sa Magtarayakan

¹ Pagka nakatapus si Hisus tunda pag manga paliwanag, nighit siya ginan sa Galiliya, nag-ati tabug sa daga Hudiya, dipay sapa Hurdan.

² Dinasun siya kayamuan tawu, bag-u pinaayad niya ati ti may manga sakit.

³ May manga Parisiyu nagpakarani sa kan Hisus, pinaingana nida sa pahaluksu magkun, “Angay aw nguna sa Kasuguan ni Muysis nu tayakan lalaki kay asawa una diit daka pag kabagayan?”

⁴ Nagsagut si Hisus, “Unman aw lugud magkabasa niyu sa Kasuratan magkun, ‘Sa kabag-u linalang sida Diyus lalaki ag babayi.’

⁵ Magkun siya, ‘Inda kay dahilan nu hayga tayakan lalaki kay ama hanggan kay ina, hampay pumausa ti lalaki sa kay asawa, dahil sida inusa yi.’

⁶ Balaw yi sida duwa, nu unman usa yi lang. Nakan ti pinausa Diyus, danga pagbulaga tawu.”

⁷ Pinaingana maan siya manga Parisiyu, “Bati hayga may bilin si Muysis pakan-an lalaki kay asawa kasuratan sa kanda magtarayakan, nu tulakun yi ti babayi.”

⁸ Magkun si Hisus, “Dahil sa maganit gid waydi kanyu tagipusuun, pinasibut-an yi lang kamu ni Muysis tulakun niyu kanyu asawa babayi. Dapat balaw katida ginan sa kabag-u pagka linalang Diyus ti tawu.

⁹ Nakan ngani kang pagkumnun sa kanyu, una si unu pag lalaki ti magtulak sa kay asawa nu unman ginan sa panlalaki bag-u mangasawa uman sa iba, nanguragin yi siya. Manguragin diman ti lalaki nu mangasawa sa babayi ginan yi sa asawahan.”

¹⁰ Sinabi niya manga tuludluan sa kanya, “Nu katunda ti kahamtangan lalaki sa kay asawa, mayad yi lang nu udyi nag-asawa.”

¹¹ Nagsagut si Hisus, “Unman tanan makatanggap tunda pag manga adal, nu unman tunda lang pag manga tawu ti ihinanda Diyus.

¹² Dahil may tuhay-tuhay pag dahilan nu hayga may manga lalaki unman makaasawa. Kay iba dahil sa kanda pagkatawu. Kay iba dahil sa binwat iba tawu sa kanda, nakan sida unman makaasawa. May manga tawu diman dayu mag-asawa angay sa kanda pagsirbi sa kaharian langit. Ti tawu nu makatanggap tunda kailangan tanggapa niya.”

Pinapaladan ni Hisus ti manga Anak

¹³ May manga nagdara manga anak tabug sa kan Hisus hampay kup-an sida niya kamang kay idarangin. Dapat sinungyaw sida manga tuludluan.

¹⁴ Dapat ay magkun si Hisus, “Pabay-ani duy niyu ti manga anak magpakarani sa kangku, danga yi niyu pag-irangi. Dahil ti ga manga anak imaw ti pagharian Diyus.”

¹⁵ Kinup-an ngani niya kamang ti manga anak. Bag-u nighit siya.

Ti Lalaki Mayaman

¹⁶ May lalaki napakarani sa kan Hisus namaingana magkun, “Maisturu, hintay nguna duy pag kaayadan kang buwatun hampay makatanggap aku buhi unman may katapusan?”

¹⁷ Nagsagut si Hisus magkun, “Hayga aku kanmu pagpaingan-un nu hintay ti mayad? Usa lang ti mayad, unman yi may tuhay waya nu unman ti Diyus. Nu gustu nimu makatanggap buhi, tupada nimu ti manga kasuguan.”

¹⁸ Nagpaingana siya, “Hintay gid nguna pag manga kasuguan?” Nagsagut si Hisus magkun, “Danga kawu maglibun sa kanmu kaparihu, danga kawu magpanguragin, danga kawu magtakaw, danga kawu magpudil sa kanmu magkastigus.

¹⁹ Galanga nimu kanmu ama kanmu ina. Mahala nimu kanmu kaparihu tawu ga kanmu diman pagmahal sa kanmu sadili.”

²⁰ Magkun ti kan-akan, “Nasunud yi duy niku tunda tanan-tanan. Hintay waya duy ti kailangan niku buwatun?”

²¹ Magkun maan si Hisus, “Nu kanmu gustu udyi kawu may kakurangan sa kay magbantay Diyus, pag-ati kawu, pabilihan nimu kanmu kasiyunan bag-u ayaw-ayawa nimu sa manga pugri kay kabilyanan. Nu matupad nimu tunda, magkaimaw kawu kayamanan sa langit. Bag-u pagsitay maan kawu pagkuyug sa kangku.”

²² Pagka nadnugan kan-akan inda pag bagaw, maruku kay nighit dahil masyadu gid siya mayaman.

²³ Magkun si Hisus sa kay manga tuludluan, “Pungud duy kang pagsabihun sa kanyu, makuri gid pumasakup ti manga mayaman sa kaharian langit.

²⁴ Kang waya pagsabihun sa kanyu, malpus waya ti kamilyu sumuyuk sa sulat dayum, makuri man ti mayaman magpasakup sa kay maghari Diyus.”

²⁵ Pagka nasaydan nida inda, lalu nadulaw kay manga tuludluan, nakan nagpaingana sida magkun, “Nu katida si unu nguna ti makaribri?”

²⁶ Tinurun sida ni Hisus bag-u kay sinabi magkun, “Dayu ngani inda mabuwat tawu, dapat mabuwat di Diyus ti tanan kabagayan.”

²⁷ Bag-u magkun si Pidru, “Malu duy kami inda, tinayakan yi nimi kanmi ulian bag-u kami kinmuyug sa kanmu. Hintay nguna kanmi matanggap?”

²⁸ Sinabi ni Hisus sa kanda magkun, “Ungud duy kang pagsabihun sa kanyu, nu aku, ti Anak Tawu, tumukaw yi aban sa karampatan maghari sa bag-u pag daga, kamu pag sampulu may duwa ti nagkuyug sa kangku, makatukaw diman waydi sa karampatan hampay makapihu sa sampulu may duwa ka linahi Israil nu daut nu mayad.

²⁹ Una si unu ti magtiis magtayak sa kay ulian, sa kay manga patar-ari lalaki, sa kay patar-ari babayi, sa ama sa ina, sa kay manga anak una sa kay daga dahil sa kay magpasakup sa kangku, makatanggap siya usa ka gatus maan kay tulus, makamana waya siya tutuu pag buhi unman may katapusan.

³⁰ Dapat mayamu ti nag-una mauryan. Mayamu ti nauryan umuna.”