Matiyu 18 - Hanunuu

Si Unu ti Lalu Mataas?

¹ Ati katpung nagpakarani sa kan Hisus kay manga tuludluan pinmaingana magkun, “Si unu nguna duy ti mataas sa kaharian langit?”

² Kan Hisus tinawag ti usa ka anak kay ipinatindug sa kanda atubangan.

³ Magkun siya, “Ungud duy kang pagsabihun sa kanyu, nu unman umanun kanyu buut ag pumarihu sa manga anak, unman gid makapasakup kamu sa kaharian langit.

⁴ Nakan ti tawu nu magpakumbaba parihu sa inda pag anak, siya yi ngani ti mataas sa kaharian langit.

⁵ Una hintay tigtanggap sa tawu mapinakumbabaun ga anak dahil sa kangku, aku yi ngap kay tinanggap.”

Ti manga Magpaturun tabug sa Kasalanan

⁶ Sinabi ni Hisus, “Dapat una si unu pag tawu ti pun-an kasalanan manga dariit anak magsarig sa kangku, mayad waya bitinan kay liug galingan batu bag-u ilagpak sa abasad pag dagat.

⁷ Masyadu makuri ti kahamtangan sitay sa babaw daga dahil sa paturun sa manga tawu tag sa kasalanan. Balaw madura hanggan aban ti manga tawu paturun tag sa kasalanan dapat madala gid masyadu kay patabgan tawu nu siya ti nagpaturun atag sa kasalanan.

⁸ “Nu kanmu kamang una lulud tigpaturun sa kanmu tabug sa kasalanan, pulda yi nimu tunda, yamtan yi. Mayad waya nu rumas-ug kawu sa langit may pulud ngatay kamang ngatay lulud, sayang waya nu kawu may duwa ka kamang, may duwa ka lulud bag-u iyamut sa udyi magkapsa pag apuy hanggan waya aban.

⁹ Nu waydi kanmu mata tigpaturun sa kanmu tabug sa kasalanan, luwata nimu yamtan yi. Mayad waya nu kawu rumas-ug sa langit buta kanmu usa ka mata. Sayang lang una kawu may duwa ka mata bag-u iyamut lang waydi sa udyi magkapsa pag apuy hanggan waya aban.”

Ti Pahalimbawa sa Karanidu Nadura

¹⁰ Sinabi ni Hisus magkun, “Ingatan niyu sa danga niyu ipasipala una lang usa sa manga dariit anak. Kang pagsabihun gid sa kanyu, ati sa langit ti manga anghil magbantay sa kanda pirmi sa atubangan niku Ama sa langit.

¹¹ Dahil nagsitay aku, ti Anak Tawu, hampay kay iribri ti manga nadura.

¹² “Hintay nguna sa kanyu isip ti buwatun usa ka tawu may usa ka gatus karanidu, nu nagtalang kay usa? Unman aw lugud kay lang tayakan ti siyampulu may siyam ka bilug karanidu magharab sa kabantudan hampay kay ligawun ti nagtalang?

¹³ Ungud duy kang pagsabihun sa kanyu, pagka nakitan niya tunda, subra gid kay kabayaan sa tunda pag usa ka bilug karanidu, balaw lang ga sa siyampulu may siyam ka bilug unman nagtalang.

¹⁴ Katunda diman, balaw gustu niku Ama sa langit midamhak una lang usa sa inda pag manga mapinakumbabaun.”

Nu Nagkasala sa Kanmu ti Kaparihu Nimu Magsarig

¹⁵ Sinabi ni Hisus magkun, “Nu kanmu patar-ari magbuwat kasalanan sa kanmu, pag-ati kawu sa kanya, hampangun nimu ag bilinan siya tungkul sa kay nabuwat kasalanan. Nu mamatingi siya sa kanmu, nabawi nimu kanmu patar-ari.

¹⁶ Dapat nu unman siya magpaniwala sa kanmu, tumaban waya kawu usa una duwa ka tawu hampay ti tanan hinampangan niyu balaw mapahimudil nu duwa ngatay tulu ti nakadnug.

¹⁷ Nu unman siya maniwala sa kanda, sabiha yi nimu sa iglisya. Nu unman gid siya maniwala sa iglisya, ipaparihu nimu siya sa manga unman magsarig sa Diyus ag sa manga manunukut buhis.

¹⁸ “Ungud duy kang pagsabihun sa kanyu, ti ginapus niyu sitay sa babaw daga, gapusun hanggan sa langit. Ti linbadan niyu sitay sa babaw daga, lubadan hanggan sa langit.

¹⁹ “Ungud duy kang pagsabihun sa kanyu, nu ti duwa sa kanyu sitay sa babaw daga magkausa sa una hintay pag bagay kanyu idarangin, tupadun tunda sa kanyu niku Ama sa langit.

²⁰ Dahil una naan nu may duwa una tulu ka tawu magtiripun ag magpasakup sa kangku, siyun diman aku kaibahan nida.”

Tungkul sa Suruguun Unman Madunung Magpatawad sa Kaparihu

²¹ Nagpakarani si Pidru nagpaingana sa kan Hisus magkun, “Panginuun, manga pira ka pagpatawad niku sa kang patar-ari nu paulit-ulit siya magkasala sa kangku? Pitu aw duy ka pagpatawad?”

²² Nagsagut si Hisus magkun, “Balaw kang pagkumnun tugka lang sa pitu, nu unman pitumpulu ka pitu ngap ka pagpatawad.

²³ Dahil ti kaharian langit kainda nangus. Inisip usa ka hari pabayadun niya kay manga panawuhun may utang sa kanya.

²⁴ Kay kabag-u dinara tag sa kanya ti usa ka tawu may utang minilyun pisus.

²⁵ Pagka siya unman may ibayad, nagbilin kay amu ipabili siya hanggan kay manga asawa, manga anak hanggan ti tanan nida kasiyunan hampay makabayad sa kay utang.

²⁶ Napadapa, nanuyu inda pag tawu sa atubangan niya amu magkun, ‘Pakan-i waya duy aku rugar. Bayadan di niku ti tanan inutang niku sa kanmu.’

²⁷ Naawa gid kay amu sa tunda pag panawuhun nakan pinauli yi siya sa kay balay, ag pinatawad siya sa kay manga utang.

²⁸ “Dapat ay sa kay mag-uli tunda pag panawuhun nagkabta sa kay kaparihu panawuhun may utang sa kanya lima ka gatus pisus. Dinusmugan niya tunda pag tawu kinuga kay tubug dungan kay bagaw magkun, ‘Pagbayad kawu kanmu utang.’

²⁹ Napadapa nanuyu siya sa atubangan niya kaparihu panawuhun magkun, ‘Pakan-i duy nimu aku rugar, bayadan di niku ti tanan inutang niku sa kanmu.’

³⁰ Dapat unman nagpayag kay kinautangan. Bagkus ngap ipinapirisu niya hanggan sa ud makabayad.

³¹ “Pagka nakitan niya manga kaparihu panawuhun ti nangyari, masyadu sida nagruku. Nag-ati sida sa kanda amu, kanda isinumbung ti tanan nangyari.

³² Nakan ipinab-ul siya niya amu. Magkun kay amu, ‘Kawu luku gid maaw pag panawuhun. Pinatawad yi niku kanmu utang tanan-tanan dahil kawu nanuyu sa kangku.

³³ Unman aw lugud kailangan maawa diman kawu sa kanmu kaparihu panawuhun ga kang diman naawa sa kanmu?’

³⁴ Nangisug gid kay amu, nakan ipinapirisu ti panawuhun hampay pakurian siya hanggan sa ud mabayadan niya kay utang.

³⁵ Katunda diman waydi kay buwatun sa kanyu niku Ama sa langit nu balaw lubusan patawadun niyu kanyu patar-ari.”