Matiyu 17 - Hanunuu

Si Hisus Nagtuhay Kay Histuda

¹ Pagka nakalawuy unum ka sirang, tinaban ni Hisus si Pidru hanggan sida ni Santiyagu ni Huwan magtar-ari. Sida upat nag-atag sa bantud abwat.

² Pagka sida siyun nakitan nida nagtuhay gid kay histuda ni Hisus. Kay uyahun nagsinglaw ga init, kay manga rutay ga magsiriak-siak yi sa kay kalagti.

³ Bigla nakitan nida sida ni Muysis ni Ilyas maghampang sa kan Hisus.

⁴ Nakan ngani magkun si Pidru sa kan Hisus, “Panginuun, mayad gid maaw duy kami sitay. Nu kanmu gustu, bumuwat aku tulu ka payag sitay, kay usa sa kanmu, kay usa sa kan Muysis, kay usa sa kan Ilyas.”

⁵ Sa kay di waya magbagaw hinamuyan sida masinay pag rurum. May nagbagaw ati ginan sa rurum magkun, “Inda kang pagmahalun pag Anak, siya lubus kang pagbayaun. Patingihi gid niyu siya.”

⁶ Pagka nakadnug ti manga tuludluan tunda pag bagaw, napadapa sida sa daga ag lubus sida nadala.

⁷ Dapat nagpakarani si Hisus sa kanda bag-u kay kinumit magkun, “Pagtindug duy kamu. Danga kamu magkadala.”

⁸ Pagka nagbantay sida udyi may nakitan sida nu ud si Hisus lang.

⁹ Sa kanda maglus-ug ginan sa bantud sinabi ni Hisus sa kanda magkun, “Danga dapu sabihun niyu una sa kantapu ti kanyu nakitan hanggan sa udwaya mabuhi uman ti Anak Tawu.”

¹⁰ Pinaingana siya niya manga tuludluan magkun, “Hayga duy pagkumnun manga manugtudlu Kasuguan kuntay kailangan dapu sumitay si Ilyas bag-u di ti Pinili Manugribri pag Hari?”

¹¹ Sinmagut si Hisus, “Sumitay ngani si Ilyas hampay kay ialistu ti tanan manga bagay.

¹² Dapat kang pagsabihun sa kanyu, nagsitay yi ginan si Ilyas, dapat unman nakilala siya manga tawu. Kanda binwat sa kanya ti nagustuhan nida. Katunda diman waydi pakurian nida aban ti Anak Tawu.”

¹³ Bag-u nasalman niya manga tuludluan si Huwan Manugtulbaw ti pagturunuhun ni Hisus.

Pinaayad ni Hisus ti Anak Inapuan Labang

¹⁴ Pagka sa lawud yi maan sida, kanda rinas-ugan mayamu gid pag tawu. Nagpakarani sa kan Hisus ti usa ka lalaki nagluhud sa kay atubangan magkun,

¹⁵ “Duy, kaawai gid nimu kang anak lalaki. Magkatigbak siya, masyadu magkakurian, dahil nu kas-a siya magkagpu atag sa apuy. Nu kas-a magkalagpak atag sa basad danum.

¹⁶ Kang yi dinara siya atag sa kanmu manga tuludluan, dapat unman nakaya nida paayadun.”

¹⁷ Sinabi ni Hisus magkun, “Kamu supakil pag manga tawu, manga unman may pagsarig. Kabitay kadugay kailangan aku kanyu kaibahan? Kabitay waya lugud kadugay kamu kang pagtiisan? Daraha niyu ti anak sitay tag.”

¹⁸ Pagka binagawan ni Hisus ti anak, nagluwas ginan sa kanya ti labang. Susun naayadan yi ti anak.

¹⁹ Pagka naayadan yi ti anak, nagpakarani ti manga tuludluan sa kan Hisus, nagpaingana sa kanya pagka unman may magdungug iba, magkun, “Hayga nguna duy unman nakaya nimi nipalwas ti labang?”

²⁰ Nagsagut siya magkun, “Dahil kurang duy kanyu sarig. Ungud duy kang pagsabihun sa kanyu, nu kanyu sarig ga butir mutsasa lang mana kay kadaka, mahimu sabihun niyu sa inda pag bantud, ‘Pag-ighit kawu sitay ginan’, bag-u umighit yi ngani. Nu katunda, ti tanan bagay makaya niyu mabuwat.” [

²¹ Dapat inda pag kalasi labang unman mipalwas nu unman sa panab-anan darangin ag sa unman maghandum karan-unun.]

Pinat-ama maan ni Hisus kay Kamatayan ag kay Pagkabuhi Uman

²² Pagka nagtipun sa Galiliya ti manga tuludluan, magkun si Hisus sa kanda, “Udyi dugay ti Anak Tawu ipabahala yi sa manga tawu,

²³ bag-u kanda matyun siya, dapat mabuhi maan siya sa ikatlu pag sirang.” Pagka nadnugan nida tunda, masyadu sida nagruku.

Ti Pagbayad Buhis atag sa Balay Diyus

²⁴ Pagka rinmas-ug sida ni Hisus sa Kapirnaum, nagpakarani sa kan Pidru ti manga manunukut buhis sa Balay Diyus. Pinaingana si Pidru, “Unman aw magbayad buhis atag sa Balay Diyus kanyu maisturu?” Magkun si Pidru,

²⁵ “Magbayad ay.” Pagka nagsaka siya sa balay, susun pinaingana siya ni Hisus magkun, “Hintay nguna sa kanmu isip, Simun, sa kantapu nguna pag magsukut bayad sa manga lisinsiya ag manga buhis ti manga hari sa babaw daga? Ngatay sa kanda manga anak aw ngatay sa manga iba tawu?” Nagsagut si Pidru,

²⁶ “Sa manga iba tawu duy.” Magkun si Hisus, “Nu katunda unman pagsuktan bayad kay manga anak.

²⁷ Dapat ay una katida, pag-atag kawu sa danaw, itaplik nimu kanmu banwit. Bul-a nimu ti kabag-u nimu bulay pag isda, pangangaha nimu kay bibig bag-u may makitan kawu usa ka kuwarta pilak. Bul-a nimu tunda ibayad nimu sa buhis nita duwa hampay unman sida may ikadaut sa kanta.”