Matiyu 16 - Hanunuu

Hinagadan Tanda si Hisus

¹ May nagpakarani sa kan Hisus manga Parisiyu hanggan Sadusiyu. Gustu nida pasalanun si Hisus nakan hinagadan nida siya magpakakit tanda ginan sa langit.

² Dapat sinabi ni Hisus magkun, “Pagka malambung yi magkun kamu, ‘Magpandangga ti langit, uminit aldaw.’

³ Pagka surip-surip kanyu pagsabihun, ‘Umuran taynguna dahil mag-aguhum ti langit.’ Magkakilala di niyu ti lakaw panahun, dapat unman maaw niyu makilala ti manga tanda taynguna pag udas.

⁴ Daut kamu pag manga tawu sa inda pag tinubu tawu, unman matinupadun sa Diyus. Maghanap aw kamu tanda? Dapat unman pakakitan kamu tanda purya lang sa nangyari sa kan Hunas.” Bag-u kay tinayakan yi lang sida siyun.

Ugali manga Parisiyu manga Sadusiyu

⁵ Pagka nagdipay sa danaw ti manga tuludluan, nalimtan nida magdara tinapay.

⁶ Magkun si Hisus sa kanda, “Pag-aman kamu sa pamadaka sa tinapay manga Parisiyu manga Sadusiyu.”

⁷ Bag-u nagharampangan ti manga tuludluan magkun, “Unman kita may dara tinapay nakan sinabi niya tunda.”

⁸ Alam di ni Hisus nakan pinaingana niya sida, “Hayga kamu magharampangan unman may tinapay? Kurang maaw kanyu sarig.

⁹ Udwaya aw lugud kamu nakaintindi? Nalimtan aw lugud niyu sa kang nagpika-pika lima ka tinapay hampay pakan-an ti lima ka libu tawu. Pira ka luwak tinapay kay subra kanyu tinipun?

¹⁰ Katunda diman ti pitu ka tinapay para sa upat ka libu tawu. Pira ka luwak daraka punu manga tinapay ti sinmubra kanyu tinipun?

¹¹ Unman aw lugud niyu naintindihan kang pagsabihun bukun tungkul sa tinapay. Pag-aman kamu sa pamadaka sa tinapay manga Parisiyu hanggan manga Sadusiyu.”

¹² Bag-u naintindihan nida kay pagsabihan maaw sida pag-aman sa tudlu manga Parisiyu hanggan manga Sadusiyu ag bukun sa pamadaka lang sa tinapay.

Kay Ipinakilala ni Pidru si Hisus

¹³ Sa kay pagras-ug ni Hisus sa banwa Sisariya Pilipus, pinaingana niya kay manga tuludluan magkun, “Hintay ti hantup manga tawu nu si unu ti Anak Tawu?”

¹⁴ Nagsagut sida, “Magkun ti iba sa kanda kawu si Huwan Manugtulbaw. Magkun maan ti manga iba, si Ilyas kawu. May magsabi waya kawu si Hirimyas, aw ngatay usa sa manga purupita.”

¹⁵ Nagpaingana si Hisus sa kanda, “Nu sa kanyu waydi, hintay kanyu isip nu si unu aku?”

¹⁶ Sinmagut si Simun Pidru magkun, “Kawu duy ti Kiristu, ti Pinili Diyus Manugribri pag Hari, ti Anak Diyus buhi.”

¹⁷ Nagsabi si Hisus sa kanya, “Pinapaladan kawu duy, Simun anak ni Hunas, dahil inda pag katutuuhanan unman tawu ti nagpakilala sa kanmu nu unman kang Ama sa langit.

¹⁸ Kang pagsabihun sa kanmu, kawu si Pidru, kay ibug sabihun batu. Sa babaw inda pag batu ipatindug niku kang iglisya. Una ti kapangyarihan kamatayan unman makapanalu sa iglisya niku.

¹⁹ Ipakaun niku sa kanmu ti manga susi pamukas sa kaharian sa langit. Ti kanmu ginapus sa babaw daga, gapusun diman sa langit. Ti kanmu linbadan sa babaw daga, lubadan diman waydi sa langit.”

²⁰ Bag-u mahigpit gid binilinan ni Hisus kay manga tuludluan danga pagsabiha una sa kantapu kuntay siya ti Pinili Diyus Manugribri pag Hari.

Pinat-ama ni Hisus Kay Kamatayan hanggan Kay Pagkabuhi Uman

²¹ Siyun ginan ipinaalam yi ni Hisus sa kay manga tuludluan kailangan siya umati sa Hirusalim. Pagka ati pakurian siya masyadu manga paggurangunun manga Hudiyu, manga pangulu manughandug hanggan manga manugtudlu Kasuguan bag-u kanda ipamatay siya. Dapat sa ikatlu pag sirang mabuhi maan siya uman.

²² Magkun si Pidru sa kan Hisus, “Abala dapu duy kawu.” Bag-u tinamyaw niya si Hisus magkun, “Danga mana ipahintulut Diyus tunda. Panginuun, dayu gid mangyari tunda sa kanmu.”

²³ Napasrangu si Hisus sa kan Pidru magkun, “Pagpakarayu yi kawu, Satanas! Mag-ampara kawu sa kang turunu. Ti kanmu pag-isipun bukun angay sa Diyus nu unman angay lang sa tawu.”

²⁴ Bag-u sinabi ni Hisus sa kay manga tuludluan, “Nu may tawu magkaibug magkuyug sa kangku, paglimti niya ti angay sa kay sadili, pas-ana kay kurus bag-u pagkuyug sa kangku.

²⁵ Nu ti tawu magkaibug magpakalawig kay kinabuhi, maduraan ngap siya buhi. Dapat ay una hintay ti nabul-an kay kinabuhi dahil sa kangku, siya yi ngapu makamana buhi.

²⁶ Hintay lugud ti makinabangan tawu una maapu niya ti bilug kalibutan, nu kay kinabuhi ti kabaydanan? Hintay ti ibayad tawu hampay bawiun maan niya kay buhi?

²⁷ Dahil udyi dugay bumalik yi ti Anak Tawu may mamaski pag kapangyarihan niya Ama, kaibahan niya kay manga anghil. Ati katpung pag udas gantihan niya ti kada tawu angay sa kay binwat.

²⁸ Ungud duy kang pagsabihun sa kanyu, ti iba sa kanyu sitay dayu mamatay hanggan sa udwaya makitan nida aku, ti Anak Tawu, humiyaput yi sa kay karampatan maghari.”