Matiyu 15 - Hanunuu

Ti Patayak Layi Kaumputan

¹ Pagka dugay may nagluwang tag sa kan Hisus manga Parisiyu hanggan manga manugtudlu Kasuguan ginan sa Hirusalim. Kanda pinaingana si Hisus magkun,

² “Hayga unman pagtupadun nimu manga tuludluan ti patayak layi nita manga kaumputan? Magkaun sida udwaya nakaugas kanda kamang.”

³ Nagsagut si Hisus magkun, “Kamu bay hayga unman magtupad sa kay sugu Diyus? Kanyu ngap pagpahalgaan ti patayak layi niyu manga kaumputan.

⁴ Sinabi Diyus, galanga nimu kanmu ama kanmu ina. Tigmuransa sa kay ama ag ina kailangan matyun gid.

⁵ Dapat ay kanyu ngap pagsabihun nu may tawu magkun sa kay ama sa kay ina, ‘Una hintay ti iawat mana niku sa kanmu kang yi ipinakaun sa Diyus,’

⁶ udyi kailangan siya maggalang sa kay ama sa kay ina. Dahil sa kanyu minana patayak layi kaumputan, unman yi ngap pagpahalgaan niyu ti Bagaw Diyus.

⁷ Manga magpabalhinguun lang kamu. Bukun ngap salan kay ipinurupita ni Isayas tungkul sa kanyu magkun, ‘Magkun ti Diyus,

⁸ Inda pag nasyun tugka lang sa bagaw kanda maggalang sa kangku, kanda tagipusuun arayu di sa kangku.

⁹ Kanda magsamba sa kangku unman may kabuluhan, dahil ti bilin tawu kanda pag-itudlu kuntay bilin Diyus.’”

Ti manga Mag-uring sa Tawu

¹⁰ Ipinakarani ni Hisus ti manga tawu sa kanya, bag-u sinabi niya sa kanda, “Pagpatingi kamu, intindiha kang pagsabihun.

¹¹ Balaw ti pag-isubu sa bibig tawu ti mag-uring sa kanya, nu ud tigluwang ngap ginan sa kay bibig imaw tig-uring sa kanya.”

¹² Nagpakarani kay manga tuludluan, magkun sida sa kanya, “Alam aw nimu duy, nahaplitan ti manga Parisiyu sa kanmu sinabi.”

¹³ Sinmagut siya magkun, “Ayitun ti kada halaman balaw itinanum niku Ama sa langit.

¹⁴ Pabay-ani niyu sida, buta pag manga manug-abat sida. Nu ti buta umabat sa kay kaparihu buta, minsan sida malagpak sa abwat.”

¹⁵ Magkun si Pidru sa kanya, “Ipaliwanag duy nimu sa kanmi ti pahalimbawa.”

¹⁶ Sinabi ni Hisus, “Kamu hanggan aw lugud unman mag-intindi?

¹⁷ Unman aw alam niyu una hintay ti pag-isubu sa bibig dayun sa tiyan ipag-ugat?

¹⁸ Dapat ay ti magluwang sa bibig ginan ngap sa tagipusuun. Tunda yi ngani ti mag-uring sa tawu.

¹⁹ Dahil ginan ngani sa tagipusuun ti manga daut pag naisipan, ti maglibun sa tawu, ti mag-uragin, ti magpamabayi, ti magpanlalaki, ti magtakaw, ti magkastigus sa bukun tutuu, ti magmuransa.

²⁰ Tunda yi ngani ti mag-uring sa tawu. Dapat nu magkaun unman nakaugas kamang angay sa patayak layi kaumputan, balaw duy makauring tunda sa tawu.”

Kay Sarig Babayi Taga Kanaan

²¹ Nighit si Hisus ati ginan, nag-atag siya sa manga rugar arani sa Tiru hanggan Sidun.

²² May usa ka babayi taga Kanaan, siyun waydi pag mag-uli. Nagluwang siya nagtawag daka sa kan Hisus magkun, “Panginuun, kawu duy ti linahi ni Dabid, kaawai nimu aku. Kang anak babayi inapuan labang, masyadu gid siya pagpakurian.”

²³ Dapat unman gid nagsagut si Hisus. Nagpakarani kay manga tuludluan magkun sa kanya, “Sabihi duy nimu siya danga yi siya sitay, maingay.”

²⁴ Magkun si Hisus, “Sinugu aku para lang sa manga karanidu nalyam sa nasyun Israil.”

²⁵ Dapat dinmulud ti babayi linmuhud sa kay atubangan ni Hisus magkun, “Awati gid duy aku.”

²⁶ Magkun si Hisus, “Unman kailangan bul-un ti karan-unun manga anak hampay ibahug sa manga idu.”

²⁷ Magkun ti babayi, “Ungud gid duy. Dapat una manga idu magkaun diman manga ragna nalagpak sa magkaun nida apu.”

²⁸ Nakan sinabi ni Hisus sa kanya, “Daka gid maaw duy kanmu pagsarig. Matupad yi ngapu kanmu paghagadun.” Siyun yi katpung pag udas inmayad kay anak.

Pinaayad ni Hisus ti Mayamu pag Tawu

²⁹ Nighit si Hisus ati ginan pag daga bag-u binmalik maan siya tag sa baybay danaw Galiliya. Nag-ati siya sa bantud bag-u tinmukaw siya.

³⁰ Naglinuwang ti masyadu mayamu tawu may taban manga pilay, manga buta, manga pingkaw, manga buyun, ag mayamu waya manga may sakit. Ipinakarani nida sa atubangan ni Hisus ag pinaayad sida tanan.

³¹ Nadulaw gid ti manga tawu, pagka nakitan nida magbagaw ti manga buyun, naayadan yi ti manga pingkaw, maglakaw yi una ti manga pilay, maghiling yi ti manga buta. Nakan nagdayaw sida sa Diyus manga taga Israil.

Pinakan-an Karan-unun ti Upat ka Libu Tawu

³² Tinawag ni Hisus kay manga tuludluan, kay sinabi, “Magkaawa aku sa inda pag manga tawu, dahil tulu yi ka sirang taynguna tugka kaibahan niku sida. Udyi sida may makaun. Dayu niku sida pauliun magkalun-us, barang nu sa dalan magpandulum yi ti mata sa lun-us.”

³³ Magkun ti manga tuludluan, “Naan duy kita sitay sa pangawakawaan pag may mab-ul karan-unun kumang-ud sa kainda kay kayamu pag manga tawu?”

³⁴ Kay paingana sa kanda, “Pira ka bilug kanyu tinapay asan?” Kay sagut nida, “Pitu duy ka bilug may manga dariit pag isda pira-pira.”

³⁵ Pinatukaw ni Hisus ti manga tawu sa daga.

³⁶ Bin-ul niya ti pitu ka tinapay hanggan ti manga isda. Pagka nakapasalamat siya sa Diyus, kay pinikapika tunda bag-u kay ipinakaun sa kay manga tuludluan. Kanda maan ipinakaun sa manga tawu.

³⁷ Nagkaun sida tanan nangabsug. Pagka kanda tinipun ti nasawad pinikapika tinapay punu ti pitu ka luwak daraka.

³⁸ Upat ka libu ka lalaki ti nagkaun purya lang sa manga babayi hanggan manga anak.

³⁹ Siyun ginan, pinauli ni Hisus ti manga tawu, bag-u siya sinmakay sa duunduun atag sa daga Magadan.