Matiyu 14 - Hanunuu

Kay Kamatayan ni Huwan Manugtulbaw

¹ Ati katpung, si Hirudis ti hari Galiliya. Nakadnug siya barita tungkul sa kan Hisus.

² Magkun siya sa kay manga may kangaranan, “Tunda pag tawu imaw yi si Huwan Manugtulbaw binuhi uman, nakan may kamaskihan siya magbuwat manga makadululaw.”

³ Ati katpung, ipinadakup ni Hirudis si Huwan bag-u ipinirisu dahil sa kan Hirudiyas, kay asawa niya patar-ari ni Pilipi.

⁴ Sinabi nakan ni Huwan sa kan Hirudis, “Unman mahimu umagaw kawu sa asawa nimu patar-ari.”

⁵ Nakan gustu mana ni Hirudis ipamatay si Huwan, dapat magkadala siya sa manga kayamuan Hudiyu, dahil kilala nida purupita si Huwan

⁶ Pagka nagras-ug ti sirang kay pag-alalahanun ni Hirudis kay kapanganakan, nagsayaw sa atubangan manga bisita ti anak babayi ni Hirudiyas. Binaya gid ni Hirudis ti daraga.

⁷ Nakan isinumpa niya ipakaun niya sa daraga una hintay kay hagadun.

⁸ Sa udyuk niya ina sinabi daraga, “Gustu niku taynguna yi kanmu ipakaun duy sa kangku kay ulu ni Huwan Manugtulbaw sa basad pinggan.”

⁹ Nagruku gid ti hari, dapat dahil kay sumpa nadnugan niya manga bisita, nagsugu siya hampay ipakaun sa daraga kay hinagad.

¹⁰ Nakan ipinapulud niya kay liug ni Huwan sa pirisuhan.

¹¹ Isinukad nida sa pinggan ti ulu bag-u ipinakaun sa daraga. Dinara maan daraga tag sa kay ina.

¹² Pagka rinmas-ug kay manga tuludluan ni Huwan, bin-ul nida kay bangkay, kanda ilinbung. Bag-u nag-ati sida sa kan Hisus ibinarita nida ti nangyari.

Pinakan-an Karan-unun ti Lima ka Libu Tawu

¹³ Pagka nakadnug si Hisus kanda barita, nagsakay siya sa duunduun nag-ati siya usa-usa atag sa pangawakawaan. Pagka naalaman manga tawu, naglakaw sida ginan sa manga banwa, nag-usig sida sa kanya.

¹⁴ Pagka dinmugsun si Hisus sa duunduun ati sa baybay, nakitan niya ti kayamuan tawu. Naawa gid siya sa kanda, pinaayad niya ti may manga sakit sa kanda.

¹⁵ Pagka malambung yi, nagpakarani sa kan Hisus kay manga tuludluan magkun, “Pangawakawaan duy inda pag rugar ag arani yi magkapsa ti init. Suguun duy nimu ti manga tawu atag sa manga baryu hampay makabili sida kanda karan-unun.”

¹⁶ Sinabi ni Hisus, “Unman duy kailangan sida umatag. Kamu yi ngap ti pagpakaun karan-unun sa kanda.”

¹⁷ Magkun sida, “Unman may karan-unun kita sitay nu unman lima lang ka bilug tinapay, duwa lang ka isda.”

¹⁸ Sinabi ni Hisus, “Daran-a niyu sitay tag.”

¹⁹ Pagka pinatukaw niya ti kayamuan tawu sa babaw ilamnun, bin-ul niya ti lima ka tinapay ag ti duwa ka isda. Nagtangda siya sa langit, nagpasalamat sa Diyus. Bag-u pinikapika niya ti manga tinapay bag-u ipinakaun niya sa manga tuludluan, kanda maan ipinakaun sa manga tawu.

²⁰ Nagkaun sida tanan-tanan nangabsug. Bag-u tinipun niya manga tuludluan kay subra, kanda isinukad sa luwak, sampulu may duwa waya ka luwak punu manga pinikapika tinapay.

²¹ Manga lima ka libu ka lalaki ti nagkaun tuhay waya ti manga babayi manga anak.

Naglakaw si Hisus sa babaw Danum

²² Kadaka dinalidali ipinasakay ni Hisus kay manga tuludluan sa duunduun ag ipinauna tag sa baliw dipay danaw bag-u pinauli niya ti kadamlan tawu.

²³ Pagka nuli yi ti manga tawu, usa-usa wadi si Hisus nag-ati sa bantud hampay mandarangin. Hanggan di yabi siya usa-usa ati sa bantud.

²⁴ Dapat ay ti duunduun sa karaw-an danaw pagpakahampakun balud, dahil pagsarungsungun durus.

²⁵ Pagka tag yi magkasurip, nag-usig si Hisus sa kanda lakaw sa babaw danum.

²⁶ Pagka nakitan siya niya manga tuludluan maglakaw sa babaw danum nadala gid sida ag nagringgit magkun, “Hilum mamaw!”

²⁷ Dapat kadaka binmagaw si Hisus sa kanda, “Pagmatutum kanyu naisipan, aku di. Danga magkadala kamu.”

²⁸ Nagsagut si Pidru, “Panginuun, nu tutuu kawu yi gid asan, paasantaga aku sa kanmu sa babaw danum.”

²⁹ Magkun si Hisus, “Abala kawu.” Dinmugsun si Pidru ginan sa duunduun linmakaw ngani sa babaw danum atag sa kan Hisus.

³⁰ Dapat pagka nakitan niya mabisug ti bagyu, nadala siya. Pagka siya mag-italnud yi sa danum, nagtawag siya magkun, “Panginuun, bawia nimu aku.”

³¹ Bag-u ihinunat ni Hisus kay kamang ag hiniyaptan niya si Pidru. Magkun si Hisus, “Kawu duy diit lang maaw kanmu sarig. Hayga kawu nag-alinlangan?”

³² Pagka sinmakay sida sa duunduun, hinmubung yi ti durus.

³³ Nagdayaw sa kanya kay manga tuludluan sa duunduun magkun, “Tutuu kawu yi ngani ti Anak Diyus.”

Pinaayad ni Hisus ti may manga Sakit sa Daga Ginisarit

³⁴ Pagka sida nagdipay yi sa danaw, nagdugsun sida sa duunduun ati sa daga Ginisarit.

³⁵ Nakilala yi si Hisus manga taga ati ag susun yi ibinarita nida sa manga tawu sa kanda palibut pag manga rugar kay pagras-ug ni Hisus. Nakan dinara nida atag sa kanya ti tanan may manga sakit.

³⁶ Nanhagad sida pahintulut sa kan Hisus hampay makaigpil ti may manga sakit sa sidsid niya balukas sadsad. Ti tanan nakaigpil naayadan yi.