Matiyu 13 - Hanunuu

Ti Pahalimbawa tungkul sa Manugpamgas

¹ Ati katpung pag sirang, nagluwas si Hisus sa balay, tinmukaw sa saruy danaw.

² Pagka siniut siya kayamuan tawu, sinmakay siya tinmukaw sa usa ka duunduun maltawan sa danum, ti manga tawu bay sa saruy di danaw.

³ Bag-u mayamu pag bagay kay itinudlu sa kanda sa manga pahalimbawa. Magkun si Hisus, “May usa ka tawu manugtanman linmakaw hampay mamamgas.

⁴ Sa kay magpamgas may binhi sinmamad sa saruy dalan. Linmuwang ti manga manuk tinabu tininduk nida tunda pag binhi sinmamad sa saruy dalan.

⁵ Kay iba nipamgas sa mabatu, ag manipis lang pag daga. Madali nagtubu ti binhi dahil manipis lang pag daga.

⁶ Dapat pagka nasinggitan masyadu gid pag init, nalayung tunda dahil unman may gamut aba.

⁷ Kay iba binhi nipamgas sa basad kadugihan. Pagka linmangba ti manga dugi, pinil-it ti binhi.

⁸ Dapat ay kay iba binhi nipamgas sa mayad pag daga nanguhay, kay butir sa kada uhay may tigmananggatus, may tig-unumpulu, may tigtatlumpulu.

⁹ Ti may tuli kailangan pagpatingi.”

Ti Turunu manga Pahalimbawa

¹⁰ Nagpakarani kay manga tuludluan sa kan Hisus nagpaingana magkun, “Hayga duy pag-ilakaw waya nimu sa pahalimbawa kanmu magpaliwanag sa manga tawu?”

¹¹ Sinmagut si Hisus, “Ipinahintulut sa kanyu ti makatau sa manga katutuuhanan unman nihayag tungkul sa kaharian langit, dapat unman ipinahintulut inda sa kanda.

¹² Ti tawu nu magsunud sa kay nadnugan pag katutuuhanan, lalu waya pakan-an siya pan-unawa. Dapat ti tawu nu unman magsunud sa katutuuhanan, una kay diit pan-unawa bul-un waya sa kanya.

¹³ Magbagaw aku sa kanda sa manga pahalimbawa dahil una magbantay sida unman waydi kumakit. Una magpatingi sida unman diman makadnug ag unman diman waydi makaintindi.

¹⁴ Nakan natupad ngani sa kanda ti ipinurupita ni Isayas magkun, ‘Una kamu magpakapatingi, unman diman kamu umintindi. Una kamu magpakabantay, unman diman kamu kumakit.

¹⁵ Maganit kay tagipusuun inda pag manga tawu. Makuri makadungug kanda manga tuli, ag ipinusik nida kanda manga mata, dahil dayu nida ibantay ngatay ipakidnug, barang makaunawa kanda tagipusuun ag bumalik sida sa kangku, ag kang paayadun.’

¹⁶ “Pinapaladan kamu Diyus, dahil maghiling kanyu manga mata, magdungug kanyu manga tuli.

¹⁷ Ungud duy kang pagsabihun sa kanyu, aduk pag manga purupita hanggan manga matadlung pag manga tawu kaybi magkaibug mana makakit sa kanyu nakitan, dapat unman nakitan nida. Magkaibug sida mana makadnug sa kanyu mag-adnugan, dapat unman nida nadnugan.”

Ti Paliwanag sa Pahalimbawa tungkul sa Manugpamgas

¹⁸ Magkun si Hisus, “Patingihi niyu ti kahulugan pahalimbawa tungkul sa manugpamgas.

¹⁹ Ti manga magpatingi sa tudlu tungkul sa kay paghari Diyus bag-u unman diman kanda naintindihan parihu sida sa binhi sinmamad sa saruy dalan. Pagka rinmas-ug si Satanas pag-agawun niya ti ipinamgas ginan sa kanda tagipusuun.

²⁰ Ti ipinahalimbawa sa binhi nipamgas sa mabatu ag manipis pag daga, tunda ngani ti manga nagpatingi sa Bagaw Diyus bag-u masulung mana kanda naisipan susun yi kanda tinanggap.

²¹ Dapat maaw unman nidna tunda sa kanda tagipusuun, nakan unman sida dinmugay. Pagka rinmas-ug ti manga kakurian, ti manga pag-unuunu dahil sa Bagaw Diyus, bigla lang inmalinlangan.

²² Tunda waydi pag nipamgas sa madugihan ipinahalimbawa sa tawu magpatingi sa Bagaw Diyus dapat makasadili siya sa manga bagay sa babaw daga, mairibgun yi siya sa manga kayamanan, nakan ti Bagaw Diyus udyi may rugar sa kay tagipusuun, udyi binmurak.

²³ Ti nipamgas sa mayad pag daga ipinahalimbawa sa manga magpatingi sa Bagaw Diyus bag-u kanda pag-intindihun. Nagburak sida may tigmananggatus, may tig-unumpulu, may tigtatlumpulu.”

Ti Pahalimbawa tungkul sa manga Ilamnun Nagtubu sa Matiriguhan

²⁴ Itinultul diman ni Hisus inda pag pahalimbawa sa kanda magkun, “Ti kaharian langit kainda nangus: may tawu nagpamgas mayad pag binhi sa kay tanman.

²⁵ Pagka sa yabi naturug ti manga tawu, rinmas-ug kay kalaban, sinabugan niya manga ilamnun ti tanman bag-u linmakaw.

²⁶ Pagka tinmubu ti tirigu namurak yi, nabuhi hanggan ti manga ilamnun.

²⁷ Nakan nagpakarani kay manga panawuhun sa kanya magkun, ‘Unman aw duy mayad pag binhi kanmu ipinamgas sa kanmu tanman? Bati hayga duy may manga ilamnun kainda?’

²⁸ Nagsagut siya, ‘Usa ka kalaban ti may buwat tunda.’ Pinaingana siya niya manga panawuhun magkun, ‘Kanmu aw gustu duy ayitun nimi ti manga ilamnun?’

²⁹ Sinmagut siya, ‘Danga duy barang maayit hanggan ti tirigu.

³⁰ Pabay-ani lang niyu parihu magdaka hanggan sa ud tig-arani. Sa udas tig-arani aban sabihun niku sa manga manug-ani, “Tumpuka dap niyu ti manga ilamnun bag-u bugkusa niyu hampay sunugun sa apuy. Bag-u tipuna niyu ti tirigu sa kang balay haramnuan.” ’ ”

Ti Pahalimbawa sa Butir Mutsasa

³¹ Usa waya ka pahalimbawa kay itinultul ni Hisus sa kanda magkun, “Ti kaharian langit ga butir mutsasa. May tawu nagtanum usa ka butir mutsasa sa kay tanman.

³² Pinakadiit gid tunda sa tanan binhi. Dapat ay pagka dugay ti mutsasa linmangba pinakaabwat sa tanan pag urupiun. Mag-apun ti manga manuk sa magkahamyan pag sanga.”

Ti Pahalimbawa tungkul sa Pamadaka sa Tinapay

³³ Nagtultul si Hisus usa maan ka pahalimbawa magkun, “Ti kaharian langit parihu ga pamadaka sa tinapay ilinakay babayi sa tulu ka pulak arina bag-u naglabtug kay buu pinkul arina.”

Ti Paggamit ni Hisus sa manga Pahalimbawa

³⁴ Inda tanan kay itinudlu ni Hisus sa manga tawu. Tanan-tanan kay tudlu sa kanda pasay pahalimbawa.

³⁵ Katunda kay binwat niya hampay matupad ti Bagaw Diyus kay ipinadakit purupita magkun, “Bumagaw aku sa kanda sa manga pahalimbawa. Ipakilala niku sa kanda ti manga unman ipinaburayhaw ginan waya sa pagkalalang kalibutan.”

Ti Kahulugan Pahalimbawa sa manga Ilamnun

³⁶ Bag-u pinauli ni Hisus ti kayamuan tawu, ag pagka nagsaka siya sa kay balay, nagpakarani kay manga tuludluan magkun sa kanya, “Ipaliwanag duy nimu sa kanmi kay kahulugan pahalimbawa tungkul sa manga ilamnun sa tanman.”

³⁷ Sinabi ni Hisus magkun, “Ti magpamgas mayad pag binhi imaw ti Anak Tawu.

³⁸ Ti tanman imaw yi ti kalibutan. Ti mayad pag binhi imaw yi ti manga tawu pagharian Diyus. Ti manga ilamnun imaw waydi ti manga tawu pagharian diyablu.

³⁹ Tunda ngani pag kalaban ti nagsabug manga ilamnun imaw yi ti diyablu. Ti udas tig-arani imaw yi ti katapusan kalibutan. Ti manga anghil ti umani.

⁴⁰ Nu kabitay pag tipunun ti manga ilamnun bag-u sunugun, katunda ti mangyari aban katpung katapusan kalibutan.

⁴¹ Suguun Anak Tawu kay manga anghil, agud tipunun nida sa luwas niya kaharian ti tanan magpaturun tabug sa kasalanan hanggan ti tanan magbuwat kadautan;

⁴² bag-u iyamut sida sa maglabdaban pag apuy. Ati sida pag man-nguruynguyan ag mangubut kanda manga ngipun.

⁴³ Ti manga matadlung rumayaw ga init sa kaharian nida Ama. Ti may tuli kailangan pagpatingi.”

Ti Mataguan pag Yaman

⁴⁴ Magkun si Hisus, “Ti kaharian langit parihu sa yaman nakalubung sa usa ka tanman. Nakutkut tunda usa ka tawu bag-u kay dap maan tinabunan. Sa daka pag kabayaan niya nag-ati siya ipinabili niya ti tanan niya pag kasiyunan bag-u kay binili tunda pag tanman.”

Ti Mahalaga pag Batu sa Manlut

⁴⁵ Magkun si Hisus, “Kumun diman ti kaharian langit parihu sa usa ka manugnigusyu maghanap sa manga mahalaga pag manga batu sa manlut.

⁴⁶ Pagka nakakit siya usa ka batu sa manlut subra gid kay halaga, nag-ati siya ipinabili niya ti tanan niya pag kasiyunan bag-u kay binili tunda pag batu sa manlut.”

Ti Sarap

⁴⁷ Magkun si Hisus, “Ti kaharian langit parihu diman sa usa ka daka pag sarap tinaktak sa dagat, nakablay tuhay-tuhay pag isda.

⁴⁸ Pagka napnu kanda ginuyud tag sa saruy. Nanurukaw ti manga tawu hampay piliun ti manga isda. Ti manga mayad pag isda isinukad nida sa buyug, dapat ayinmut nida ti unman may kabuluhan.

⁴⁹ Katunda diman ti mangyari aban pagka katapusan yi kalibutan. Rumas-ug ti manga anghil, ipablag nida ti manga makasalanan sa manga magpasakup sa Diyus.

⁵⁰ Bag-u iyamut nida ti manga makasalanan sa labdaban pag apuy. Ati sida pag man-nguruynguyan ag mangubut kanda manga ngipun.”

May Bag-u may Daan pag Kayamanan

⁵¹ Kay pinaingana ni Hisus magkun, “Naintindihan yi aw niyu inda kay kahulugan tanan-tanan?” Magkun sida, “Hu ngani duy, naintindihan nimi.”

⁵² Magkun siya sa kanda, “Nakan ngani ti kada manugtudlu Kasuguan nu tuludluan siya sa kaharian langit, parihu siya sa usa ka may puun balay bumulwat manga bag-u pag bagay may daan ginan sa kay hamnuan.”

Unman Tinanggap si Hisus manga Taga Nasarit

⁵³ Pagka tinultul ni Hisus tunda pag manga pahalimbawa, nighit siya ati ginan.

⁵⁴ Nag-ati siya sa kay kinadak-anan pag banwa, bag-u nanudlu siya sa kanda ati sa simbahan manga Hudiyu. Naglingut ti manga tawu pagka nakadnug sa kanya. Magkun sida, “Naan ginan pag nakatau inda pag tawu kay kadunungan? Kabitay pagbuwatun niya inda pag manga makadululaw?

⁵⁵ Unman aw anak siya panday? Unman aw kay ngaran niya ina si Marya? Unman aw sida ni Santiyagu, ni Husi, ni Simun, ni Hudas kay manga patar-ari lalaki?

⁵⁶ Unman aw sitay diman pag mag-uli kay manga patar-ari babayi? Naan ginan pag bin-ul niya inda pag kakayahan?”

⁵⁷ Nag-alinlangan gid sida sa kanya. Nakan sinabi ni Hisus sa kanda, “Ti purupita paggalangun di una naan, purya lang sa kay sadili banwa hanggan sa kay manga katawuhan.”

⁵⁸ Unman siya may binwat ati mayamu pag manga makadululaw dahil sa unman sida magpaniwala.