Matiyu 12 - Hanunuu

Tungkul sa Sirang Pamahari

¹ Ati katpung sa Sirang Pamahari nakasabuk sida ni Hisus sa matiriguhan. Linun-us kay manga tuludluan, nakan naggutul sida uhay tirigu bag-u kinaun nida kay butir.

² Pagka nakitan manga Parisiyu magkun sida sa kan Hisus, “Bantayi duy nimu ti pagbuwatun nimu manga tuludluan. Bawal tunda sa Sirang Pamahari.”

³ Sinabi ni Hisus sa kanda magkun, “Unman aw lugud binasa niyu ti binwat ni Dabid pagka linun-us siya hanggan kay manga kaibahan?

⁴ Nagsaka siya sa Balay Diyus nagkaun siya hanggan kay manga kaibahan tunda pag tinapay ti ibinugtang ipinakaun sa atubangan Diyus. Bawal sa Kasuguan nu dapat unman sida nagsalan kan-un nida tunda pag tinapay dahil ti manga manughandug lang ti mahimu kumaun tunda.

⁵ Ag unman waya aw lugud niyu nabasa sa Kasuguan ni Muysis kuntay sa kada Sirang Pamahari ti manga manughandug sa Balay Diyus maglabag sa Kasuguan tungkul sa Sirang Pamahari, dapat unman sida nagsalan?

⁶ Pagsabihun niku sa kanyu may lalu waya mahalaga man sitay balaw lang ga Balay Diyus.

⁷ Nu maintindihan lang niyu inda pag Bagaw Diyus magkun, ‘Kang gustu pagmaawaun kamu, ag balaw kailangan niku kanyu hayup kanyu matyun ihandug sa kangku,’ balaw mana niyu sabihun may kasalanan ti unman nagkasala.

⁸ Dahil ti Sirang Pamahari sa sirung kapangyarihan Anak Tawu.”

Ti Tawu Pilay kay Kamang

⁹ Nighit si Hisus ati ginan, ag nag-ati siya sa simbahan manga Hudiyu.

¹⁰ May usa ka tawu ati pilay kay kamang. May manga tawu diman siyun kanda gustu tiidan si Hisus. Nakan pinaingana nida siya magkun, “Angay aw sa Kasuguan ti magpaayad nu Sirang Pamahari?”

¹¹ Nagsagut si Hisus magkun, “Una si unu sa kanyu ti may karanidu usa ka bilug bag-u nu nalagpak tunda atag sa bubun nu sa Sirang Pamahari unman aw lugud kay bawiun?

¹² Lalu mahalaga man ti usa ka tawu sa karanidu. Nakan ngani angay ngap sa Kasuguan ti magbuwat mayad nu sa Sirang Pamahari.”

¹³ Bag-u sinabi ni Hisus atag sa tawu magkun, “Hunatan duy kanmu kamang.” Kay ngani ihinunat kay kamang, nag-ayad yi ngap parihu maan sa kay usa.

¹⁴ Nagluwas ti manga Parisiyu ginan sa simbahan manga Hudiyu, nagpululungan sida nu kabitay pag ipamatay nida si Hisus.

Ti Pinili pag Suruguun

¹⁵ Alam di ni Hisus ti gayak manga Parisiyu nakan nighit siya siyun ginan. Aduk pag tawu ti kinmuyug sa kanya. Kay pinaayad niya ti tanan may manga sakit.

¹⁶ Dapat kay ibinandu sa manga tawu kay pinaayad magkun, “Danga patultulan sa iba nu si unu aku.”

¹⁷ Nangyari tunda hampay matupad ti Bagaw Diyus kay ipinadakit ni Purupita Isayas magkun,

¹⁸ “Inda yi kang suruguun, siya kang gid pinili, kang gid pagmahalun, lubus kang pagbayaun. Ilubus niku sa kanya kang Ispiritu Banal, pihuun niya ti tanan nasyun tawu nu daut nu mayad.

¹⁹ Unman siya paradibati. Maalumanay siya humampang, unman mag-adnugan sa manga dalan kay magbagaw,

²⁰ Unman niya puldun ti tigbi nu nahapay. Unman diman pus-an niya ti sulu una magrapyung, hanggan sa udwaya manalu kay katadlungan.

²¹ Ag ti manga tawu sa tanan pag nasyun sumarig sa kanya.”

Si Hisus ag si Biilsibul

²² Ati katpung dinara atag sa kan Hisus ti usa ka lalaki buta buyun waya paman, inapuan labang. Pinaayad ni Hisus tunda pag tawu, magbagaw yi maghiling.

²³ Nadulaw ti tanan tawu magkun, “Inda yi aw nguna kay linahi ni Dabid?”

²⁴ Dapat ay pagka nadnugan manga Parisiyu, magkun sida, “Makapalwas manga labang tunda pag tawu dahil may kapangyarihan siya ginan sa kan Biilsibul, ginan sa hari manga labang.”

²⁵ Alam di ni Hisus kanda pag-isipun, nakan kay sinabi sa kanda magkun, “Marangga ti kada kaharian nu udyi magkarausa maglalabanan wadi. Mawayak yi ti banwa una ti magtal-anakan nu udyi magkarasunduan kay manga tawu sa kanda ginan nangarawayan.

²⁶ Nu abi si Satanas magpalwas sa kay manga nasakupan, pagkalabanun ngap niya kay sadili, pihu mawayak kay kaharian.

²⁷ Nu abi aku magpalwas manga labang sa kapangyarihan ni Biilsibul, si unu lugud ti nagpakaun kapangyarihan sa kanyu manga tuludluan hampay makapalwas manga labang? Kanda ngap pagbuwatun imaw ti puruyba kuntay kamu salan.

²⁸ Nu bay Ispiritu Diyus ti nagpakaun kapangyarihan sa kangku hampay magpalwas manga labang, kay ibug sabihun rinmas-ug yi sa kanyu kay maghari Diyus.

²⁹ “Nu mabisug pag tawu ti may puun balay, kabitay may makasaka sa siti pag balay hampay umagaw kay butang nu unman gapusun dapu niya kay apu mabisug, bag-u mahimu siya sumaka umagaw kay butang.

³⁰ “Ti unman pabliwa sa kangku, kalaban yi ngap niku. Ti unman umawat sa kangku sa kang magpatipun, imaw ti magwatak.

³¹ Nakan ngani kang pagsabihun sa kanyu, patawadun di Diyus ti manga tawu una hintay kanda kasalanan una kanda magmuransa, dapat unman patawadun ti tawu magmuransa sa Ispiritu Banal.

³² Una si unu ti bumagaw laban sa Anak Tawu may patawad di dapat ti tawu nu magbagaw laban sa Ispiritu Banal udyi patawadun, una sa kainda katpung pag panahun una hanggan waya aban.”

Sa kay di Burak pag Mag-akitan

³³ Magkun si Hisus, “Nu isipun niyu ti puun kayu mayad hanggan kay burak mayad diman. Nu bay isipun niyu alangan ti puun kayu, daut diman hanggan kay burak. Dahil ginan sa burak pag makilala kay puun nu daut nu mayad.

³⁴ Kamu ga linahi manga udtu adlaw. Kabitay pag masabi niyu ti mayad pag manga baragawun nu kamu ngap daut. Dahil nu hintay ti hinamnu tawu sa kay tagipusuun imaw diman kay pagbagawun.

³⁵ Nu mayad pag tawu mayad diman pag bagaw kay pagbulwatun dahil punu kaayadan kay tagipusuun. Nu daut pag tawu daut waydi kay pagbagawun dahil punu kadautan kay tagipusuun.

³⁶ “Pagsabihun niku sa kanyu nu kaudasan sintinsiya aban may kapanagutan ti manga tawu sa kada bagaw kay binagaw unman may kabuluhan.

³⁷ Dahil ginan sa kanmu bagaw pag makilala kawu unman may kasalanan. Ginan diman sa kanmu bagaw pag mapihu kanmu kadautan.”

Maghanap Sida Makadululaw Buwat ni Hisus

³⁸ May manga manugtudlu Kasuguan ag manga Parisiyu magkun sa kan Hisus, “Maisturu, pakakitan nimu kami usa ka tanda kawu sugu Diyus?”

³⁹ Magkun si Hisus, “Daut kamu pag manga tawu unman magtupad sa Diyus. Maghanap kamu tanda dapat unman pakakitan tanda purya lang sa nangyari ati katpung sa kan Purupita Hunas.

⁴⁰ Nu kabitay si Hunas sa sulud tulu ka yabi tulu ka sirang sa basad tiyan laun pag isda, katunda diman ti Anak Tawu aban sa tinaguktukan batu sa sulud tulu ka yabi tulu waydi ka sirang.

⁴¹ Pagka kaudasan sintinsiya aban kumastigus ti manga taga Ninibi laban sa kanyu. Dahil ti manga taga Ninibi nag-ampu nagpatawad sa kanda manga kasalanan pagka sida nakadnug kan Hunas itinudlu, dapat balaw di ga kan Hunas ti nagsitay kainda sa kanyu.

⁴² Sa ati katpung pag udas aban ti Rayna ginan sa salatan baliwa kumastigus laban sa kanyu, dahil nagluwang siya ginan sa puun langit hampay patingihan kay kadunungan ni Sulumun. Dapat balaw di ga kan Sulumun ti nagsitay kainda sa kanyu.”

Kay Pagbalik Labang

⁴³ Magkun si Hisus, “Pagka linmuwas ginan sa usa ka tawu ti labang, maglakaw siya sa manga tigangan daga maghanap kay paraharyan. Nu unman may makitan,

⁴⁴ mag-isip siya sa kay sadili magkun, mag-uli yi maan aku sa balay niku inighitan. Sa kay pagras-ug niya nakitan niya unman maaw may apu, pinarisan marayaw ti balay.

⁴⁵ Nakan mag-ati siya magtaban pitu waya maan ka labang daut man sa kanya. Magsulud sida mangulian ati. Nakan ngani makuri man masyadu balaw lang ga kaybi kay uryan pag kahamtangan tunda pag tawu kay inapuan. Katunda diman ti mangyari aban sa tunda pag daut pag lahi.”

Kay Ina hanggan Kay manga Patar-ari ni Hisus

⁴⁶ Magbagaw waya si Hisus sa kayamuan tawu, nagras-ug kay ina, kay manga patar-ari. Mag-alagad sida sa luwas balay, gustu nida mihampang sa kanya.

⁴⁷ May nagsabi sa kanya magkun, “Asan duy sa luwas balay kanmu ina hanggan kanmu manga patar-ari, gustu nida mihampang sa kanmu.”

⁴⁸ Dapat sinabi ni Hisus sa nagbarita sa kanya magkun, “Hintay nguna kang ina, si unu nguna kang manga patar-ari?”

⁴⁹ Itinudlu niya kay manga tuludluan magkun, “Inda yi ngani kang ina, kang manga patar-ari.

⁵⁰ Dahil una si unu pag tawu ti magtupad sa kagustuhan niku Ama sa langit, siya gid kang patar-ari lalaki, kang patar-ari babayi, kang ina.”