Matiyu 11 - Hanunuu

Kay manga Sinugu ni Huwan Manugtulbaw

¹ Pagka nakatapus tudlu si Hisus sa kay sampulu may duwa ka tuludluan, nighit siya sa tunda ginan pag rugar ag nag-ati sa sangput pag manga banwa agud manudlu hanggan magbarita sa manga tawu.

² Nabaritaan ni Huwan Manugtulbaw sa basad pirisuhan kay manga pagbuwatun ni Hisus. Nakan ngani nagsugu si Huwan sa kay manga tuludluan,

³ hampay mamaingana sa kan Hisus magkun, “Kawu yi aw ngani duy ti itinaratu kuntay sumitay, aw ngatay kami may pag-alagdun waya iba?”

⁴ Magkun si Hisus, “Pag-uli maan kamu sa kan Huwan bag-u sabiha maan sa kanya ti kanyu nadnugan ag nakitan.

⁵ Maghiling yi ti manga buta, maglakaw yi maan ti manga pilay, naayadan ti may manga dilikadu pag sakit sa lukub, magdungug yi ti manga bungul, nabuhi maan ti manga namatay. Pag-itudlu sa manga pugri ti Mayad pag Barita.

⁶ Papaladan Diyus ti tawu unman mag-alinlangan sa kangku.”

⁷ Pagka nuli kay manga tuludluan ni Huwan, magbagaw si Hisus tag sa manga tawu tungkul sa kan Huwan magkun, “Kanyu nag-ati sa kan Huwan sa pangawakawaan hintay kanyu hinanap? Usa aw ka tawu ka bahi aynu pagtandugun durus?

⁸ Hintay ngani kanyu hinanap? Nanduaw lang aw kamu sa tawu marinu kay rutay? Ti may manga rutay marinu kabay sa ulian di manga hari.

⁹ Dapat hintay ungud kanyu hinanap? Usa aw ka purupita? Hu ngani duy. Dapat kang pagsabihun sa kanyu balaw lang purupita siya.

¹⁰ Dahil may sinabi sa Banal Kasuratan tungkul sa kan Huwan magkun, ‘Inda yi kang sinugu ipinauna sa kanmu. Ialistu niya kanmu lakawan.’”

¹¹ Ungud duy kang pagsabihun sa kanyu, sa tanan nianak unman waya may linmuwang lalu waya mahalaga sa kan Huwan Manugtulbaw. Dapat sa kaharian langit ti pinakaababa pag tawu mataas man sa kan Huwan Manugtulbaw.

¹² Ginan waya sa kay nagtudlu ni Huwan Manugtulbaw hanggan taynguna tugka, ti kaharian langit pag-unuunuhun, pag-agawun manga mag-unuunu.

¹³ Dahil hanggan sa udwaya rinmas-ug si Huwan ti tanan manga purupita hanggan ti Kasuguan nagpurupita tungkul sa manga mangyari aban sa kaharian langit.

¹⁴ Nu gustu niyu maniwala, si Huan yi ngani pag Ilyas ti pagsarigan kuntay rumas-ug.

¹⁵ Ti may tuli kailangan pagpatingi.

¹⁶ “Naan pag ipaparihu niku ti manga tawu taynguna? Parihu sida ga manga anak matukawan sa palingkihan magtawag sa kanda manga kaparihu magkun,

¹⁷ ‘Nagpalawta kami sa kanyu, dapat unman kamu nagtaruk. Nag-ambahan yi kami pabilin, dapat unman kamu nanlumi.’

¹⁸ Si Huwan nagsitay, unman siya maghandum karan-unun, unman diman siya mag-inum maisug pag irinmun bag-u magkun sida, ‘Inapuan siya labang.’

¹⁹ Pagka nagsitay aku, ti Anak Tawu, magkaun mag-inum diman bag-u pagkumnun nida, ‘Malu tunda pag tawu daluk-daluk maglangu, mag-ampud siya sa manga manunukut buhis, hanggan sa iba waya ka manga makasalanan.’ Ti pagbuwatun kadunungan Diyus imaw ti puruyba sa katutuuhanan.”

Kaawaawa ti manga Unman Nag-ampu sa kay Kasalanan

²⁰ Bag-u sinungyaw ni Hisus ti manga banwa pinakakitan niya manga buwat makadululaw dahil balaw sida nag-ampu sa kanda manga kasalanan.

²¹ Sinabi ni Hisus, “Kaawaawa kawu pag banwa Kurasin, kaawaawa kawu hanggan pag banwa Bitsayda, dahil nu abi sa banwa Tiru una sa banwa Sidun pag nabuwat ti manga makadululaw kang binwat sitay sa kanyu, dugay yi mana nanrutay saku, nagtukaw sa dapug ti manga taga ati, hampay ipakilala nida kanda nag-ampu yi sa kanda kasalanan.

²² Dapat kang pagsabihun sa kanyu, nu kaudasan yi sintinsiya aban lalu waya mabuyat kay sintinsiya Diyus sa kanyu balaw lang ga sa manga taga Tiru ag taga Sidun.

²³ Kawu pag banwa Kapirnaum, gustu aw nimu pumaabwat hanggan tugka sa langit? Unman! Idugsak ngap kawu sa ulian manga namatay. “Dahil nu abi sa Suduma pag nabuwat ti manga makadululaw kang binwat sitay sa kanyu, hanggan taynguna tugka balaw waya mana mawasak tunda.

²⁴ Dapat kang pagsabihun sa kanyu, nu kaudasan yi sintinsiya aban, lalu ngap mabuyat kay sintinsiya Diyus sa kanyu, balaw lang ga sa manga taga Suduma.”

Pagpakarani sa Kangku hampay sa Kaalwanan

²⁵ Sa ati katpung magkun si Hisus, “Magpasalamat aku sa kanmu, Amang, kawu ti Panginuun sa langit hanggan sa daga. Magpasalamat aku dahil unman ipinaalam nimu inda pag manga bagay sa manga madunung ag sa manga mapininsarun, ipinakilala ngapu nimu sa manga tawu ga anak kay tagipusuun.

²⁶ Hu ngani duy Amang, dahil katunda yi kanmu kagustuhan.”

²⁷ Pagkatapus, magkun si Hisus sa manga tawu, “Ti tanan bagay ipinabahala niku Ama sa kangku. Unman may nakakilala sa Anak nu unman ti Ama. Ag unman may nakakilala sa Ama nu unman ti Anak ag ti manga tawu gustu Anak makakilala sa Ama.

²⁸ “Pagsitay tag kamu sa kangku, kamu tanan manga purus sa kanyu tarabahu hanggan sa kanyu dara mabuyat, kamu kang paalwanun.

²⁹ Paulian niyu sa kanyu liug kang singkaw, pagpatudlu kamu sa kangku, dahil maalumanay aku ag mapinakumbabaun pag tawu bag-u makakit kamu kahusayan sa kanyu buhi.

³⁰ Dahil mayad kadara kang singkaw ag balaw mabuyat kang ipagpadara sa kanyu.”