Matiyu 10 - Hanunuu

Ti Sampulu may Duwa ka Tuludluan

¹ Tinawag ni Hisus kay sampulu may duwa ka tuludluan, pinakan-an niya sida karampatan hampay pumalwas manga labang ag hampay pumaayad sa manga tawu una hintay pag sakit kanda mag-adnugan sa kanda ginhawa.

² Inda ti sampulu may duwa ka apustul kanda manga ngaran: un-an si Simun (imaw yi ti pagkumnun si Pidru), bag-u si Andiris kay patar-ari ni Simun, bag-u kay anak ni Sibidiyu si Santiyagu, hanggan kay patar-ari si Huwan,

³ bag-u sida ni Pilipi, ni Bartulumi, bag-u si Tumas, bag-u si Matiyu ti manunukut buhis, bag-u si Santiyagu kan Alpiyu anak, bag-u si Tadiyu,

⁴ bag-u si Simun (imaw ti pagsabihun makabayan), hanggan si Hudas Iskariyuti imaw ti nagpakampi sa kay kalaban ni Hisus.

Sinugu ni Hisus ti Sampulu may Duwa ka Tuludluan

⁵ Sinugu ni Hisus tunda pag sampulu may duwa ka tuludluan kay binilinan magkun, “Danga kamu mag-ati sa daga manga balaw Hudiyu, danga waydi magsulud sa banwa manga Samaritanu.

⁶ Bagkus ngap atihan niyu ti nasakupan Israil nagtalang ga manga karanidu.

⁷ Pag-ati kamu pagtultul sa manga tawu magkun, ‘Arani yi ti kaharian langit.’

⁸ Paayadun niyu ti may manga sakit, buhiun niyu ti manga namatay. Paayadun diman niyu ti may dilikadu pag sakit sa lukub, ipalwas niyu ti manga labang. Nagtanggap kamu unman may bayad, pagpakaun kamu balaw waydi may bayad.

⁹ Danga kamu magdara kuwarta, danga kamu magdara una gintu, una pilak, una galang sa kanyu manga hagkus.

¹⁰ Danga kamu magdara bay-ung sa kanyu maglakaw, una ililsan, una lapak una sugkud, dahil ti manugtarabahu kailangan pakan-an kay pangabuhi.

¹¹ “Una naan pag banwa hanggan baryu kamu pag umaput, pagligaw kamu kanyu mayad pag ras-ugan pag tawu. Siti kamu pag mangulian pag balay hanggan sa udwaya kamu umighit siyun ginan pag rugar.

¹² Sa kanyu pagsaka sa tunda pag balay, papaladan niyu ti manga mag-uli siyun.

¹³ Nu ungud pagtanggapun nida kamu, papaladan niyu sida. Dapat nu unman, danga niyu pag papaladi.

¹⁴ Nu balaw kamu tanggapun una patingihan sa usa ka balay aw ngatay banwa, pag-ighit yi kamu siyun ginan. Bag-u pagpagun niyu ti galbuk sa kanyu raprapa bilang pasandam laban sa kanda.

¹⁵ Ungud duy kang pagsabihun sa kanyu, nu sa udas pagsintinsiya aban, subra waya pag kaparusahan ti malakawan manga tawu sa ati pag banwa balaw lang ga kanda nalakawan manga taga Suduma ag Gumura.”

Ti Pag-unuunu Rumas-ug Aban

¹⁶ Magkun si Hisus, “Pagsuguun niku kamu taynguna parihu ga manga karanidu tabug sa karaw-an manga simarun idu. Pagmadunung kamu parihu ga manga amu, pagmabuut kamu parihu sa kalampati.

¹⁷ Pag-aman kamu, dahil dakpun kamu manga tawu bag-u darahun tag sa Katipunan manga Pinunu. Litusun nida kamu sa simbahan manga Hudiyu.

¹⁸ Dahil sa kanyu magpasakup sa kangku, ipaatubang kamu sa manga gubirnadur hanggan sa manga hari hampay tumultul kamu tungkul sa kangku sa atubangan nida hanggan sa manga balaw Hudiyu.

¹⁹ Pagka kamu ipabahala nida sa husgadu, danga kamu magkakuri sa kanyu sarabihun nu kabitay kanyu bagawun. Pagka ati katpung pag udas, itudlu di waydi Ispiritu Banal sa kanyu ti dapat niyu sabihun.

²⁰ Dahil balaw kamu ti bumagaw, nu unman ti Ispiritu niyu Ama ti pumabagaw sa kanyu.

²¹ “Sa ati pag manga sirang, itudlu kay patar-ari tabug sa kalaban agud matyun. Katunda diman ti buwatun aban ama sa kay anak. Labanan manga anak kanda manga gurang kanda ipamatay.

²² Kagalitan aban kamu tanan tawu dahil sa kanyu pakiusa sa kangku. Dapat tigpakarig-un hanggan tugka sa katapusan imaw ti maribri.

²³ Nu unu-unuhun kamu manga tawu sa usa ka banwa, pagpalagiw yi kamu tag sa usa maan ka banwa. Ungud duy kang pagsabihun sa kanyu, unman waya napalibut niyu ti tanan pag manga banwa sa Israil, rumas-ug yi aku, ti Anak Tawu.

²⁴ “Unman may tuludluan mataas man sa kay maisturu, unman may panawuhun mataas man sa kay amu.

²⁵ Makabaya ti tuludluan nu pumarihu sa kay maisturu, makabaya diman ti panawuhun nu pumarihu siya sa kay amu. Nu ti puun magtal-anakan pag-ingarnan Biilsibul, lalu waya pagmuransahun kay manga kaibahan.”

Ti Dapat Nita Kadalaan

²⁶ Magkun si Hisus, “Nakan ngani danga magkadala sa kanda. Unman may maitagu nu unman makitan gid aban. Unman may mailihim nu unman miburayhaw aban.

²⁷ Ti kang pagsabihun sa kanyu sa madulum, itultul maan niyu sa marayaw. Ti iyinanas sa kanyu kailangan kanyu maan ipahayag hampay mag-adnugan tanan tawu.

²⁸ Danga niyu kadalai ti magmatay sa bilug balaw makamatay sa karadwa. Dapat kadalaan niyu ti makamatay sa karadwa hanggan bilug sa impirnu.

²⁹ Unman aw pag-ipabili ti duwa ka maya sa usa lang ka sintimus? Dapat una di usa sa kanda unman magkalagpak sa daga nu unman kagustuhan niyu Ama.

³⁰ Una paman kanyu buhuk nabilang yi tanan.

³¹ Nakan ngani danga kamu magkadala. Mahalaga man kamu sa mayamu pag maya.”

Kilalan-un si Kiristu

³² Sinabi ni Hisus magkun, “Una si unu ti magkilala sa kangku kay Panginuun sa atubangan manga tawu, kilalan-un diman waydi niku sa atubangan niku Ama sa langit.

³³ Dapat ti magtanggi sa kangku sa atubangan manga tawu, itanggi diman niku sa atubangan niku Ama sa langit.”

Balaw Kahusayan nu Unman Baladaw ngap

³⁴ Magkun si Hisus, “Danga niyu isipun aku nagsitay hampay magpakaun kahusayan sitay sa babaw daga. Nagsitay aku hampay magdara away balaw kahusayan.

³⁵ Nakan aku nagsitay hampay palabanun ti anak lalaki sa kay ama, ti anak babayi sa kay ina, ti umagad babayi sa kay sinakahan.

³⁶ Kay kalaban tawu ginan ngap sa kay kasunu balay.

³⁷ “Nu ti tawu magbaya sa kay ama hanggan sa kay ina balaw lang ga kay magbaya sa kangku, unman mahimu siya magpakiusa sa kangku. Nu ti tawu magbaya sa kay anak lalaki una anak babayi balaw lang ga kay magbaya sa kangku, unman mahimu siya magpakiusa sa kangku.

³⁸ Nu ti tawu unman magpas-an kay kurus ag magkuyug sa kangku, unman mahimu siya magpakiusa sa kangku.

³⁹ Ti mag-ingat sa kay sadili buhi, maduraan ngap buhi unman may katapusan. Ti nabul-an buhi sa kay magsunud sa kangku, imaw ngap ti kumakit buhi.”

Manga Pirimyu

⁴⁰ Magkun si Hisus, “Tigtanggap sa kanyu magtanggap diman sa kangku. Tigtanggap sa kangku kay tanggapun diman niya ti nagsugu sa kangku.

⁴¹ Tigtanggap sa purupita dahil sa kay pagkapurupita makatanggap pirimyu ginan sa Diyus parihu sa matanggap purupita. Tigtanggap sa tawu matadlung dahil siya matadlung pag tawu makatanggap pirimyu ginan sa Diyus parihu sa matanggap tawu matadlung.

⁴² Una si unu ti pumakaun una lang usa ka ungut danum maramig sa usa sa pinakaababa pag tuludluan niku, Ungud duy kang pagsabihun sa kanyu, pihu gid makatanggap siya pirimyu.”