Markus 5 - Hanunuu

Pinaayad ti Tawu Inapuan Labang

¹ Pagka nakadipay yi sa danaw sida ni Hisus, rinmas-ug kanda duunduun sa daga manga Girasinu.

² Pagka nagdugsun si Hisus sa duunduun may usa ka lalaki inapuan labang ti kadaka nagsulang sa kanya ginan sa kalubngan.

³ Kay ulian pag tawu ati lang sa kalubngan. Unman magkagapus dugay, una waya tarikada ti igapus sa kanya.

⁴ Dahil pirmi yi siya paggapusun pusas hanggan tarikada, pagpamugtasun lang niya tunda. Unman gid may tawu makalaban sa kanya.

⁵ Yabi sirang magpakawawaw lang siya sa kalubngan ag sa manga kabantudan. Pagpakabiyagan waya niya batu kay sadili bilug.

⁶ Pagka nakakit siya sa kan Hisus ginan sa arayu, nalagiw siya nagluhud sa kay atubangan.

⁷ Kay irininggit daka magkun, “Hintay kanmu labut sa kangku, Hisus, kawu ti Anak Diyus makamaskihan sa tanan. Alang alang sa Diyus, danga pakurian nimu aku.”

⁸ Bag-u sinabi ni Hisus sa labang, “Kawu pag labang, pagluwas yi kawu sa inda pag tawu!”

⁹ Bag-u pinaingana siya ni Hisus, “Hintay kanmu ngaran?” Nagsagut siya magkun, “Kayamuan kang ngaran. Dahil mayamu kami.”

¹⁰ Bag-u nanuyu ti labang sa kan Hisus danga sida paighitun ati ginan pag daga.

¹¹ Ati sa bantud may maglingaun kagadhan babuy.

¹² Nanuyu ti manga labang sa kan Hisus magkun, “Sugua nimu kami atag sa manga babuy hampay kami magsulud sa kanda.”

¹³ Pinahintulutan ngani niya. Pagka nagluwas ti manga labang ginan sa tawu, sinmulud yi ngani sida sa manga babuy. Bag-u nangras sa palagiw ti kagadhan babuy manga duwa ka libu, naglinuksu sa yangpas danaw nagkalalimus sa danum.

¹⁴ Pagka nakitan manga manug-alaga babuy may nangyari gid, nalagiw sida, kanda itinultul sa banwa hanggan sa manga baryu. Bag-u naglinuwang ti manga tawu hampay makitan ti nangyari nu kabitay.

¹⁵ Pagka nagpakarani sida sa kan Hisus, nakitan nida ti tawu pinalwasan labang. Matukawan siya, may rutay yi, mahusay yi kay naisipan, madi inapuan siya kayamuan labang sa kabag-u. Nakan nadala ti manga tawu.

¹⁶ Ti manga nakakit nanultul sa manga iba nu kabitay kay nangyari sa tawu inapuan labang ag tungkul sa manga babuy.

¹⁷ Nakan nagpakihampang ti manga tawu sa kan Hisus, pag-ighit yi siya sa kanda rugar.

¹⁸ Pagka siya magsakay yi sa duunduun, nagpakihampang ti tawu pinalwasan labang sa kanya magkun kumuyug yi mana sa kan Hisus.

¹⁹ Dapat unman pinahintulutan ni Hisus. Magkun si Hisus sa kanya, “Pag-uli yi duy sa kanmu balay, sa kanmu manga katawuhan. Itultul nimu sa kanda nu kabitay kay kadaka ti binwat Panginuun sa kanmu ag nu kabitay kawu kay kinaawaan niya.”

²⁰ Nuli yi ngani siya, nag-umpisa nagbarita sa Dikapulis pag daga nu kabitay kay kadaka ti binwat ni Hisus sa kanya. Nadulaw gid ngani ungud ti tanan manga tawu.

Binuhi Uman ti Usa ka Anak ag Pinaayad ti Usa ka Babayi

²¹ Bag-u nagsakay maan si Hisus sa duunduun. Pagka rinmas-ug siya sa baliw dipay danaw sa baybay waya, tinaripunpunan yi siya mayamu tawu.

²² Linmuwang si Hairu, ti pangulu simbahan manga Hudiyu. Pagka nakitan niya si Hisus napayuk-ub siya sa kay atubangan,

²³ nagpakihampang gid sa kanya magkun, “Diit wadi duy magkaugtas kang anak babayi. Pagkuyug mana kawu sa kangku kup-an nimu manga kamang kang anak hampay maayadan di siya ag balaw mamatay.”

²⁴ Kinmuyug ngani si Hisus, hanggan ti kayamuan tawu kinmuyug waydi, sirit-an yi sa kay sangput ni Hisus.

²⁵ May usa ka babayi sulud sampulu may duwa yi ka timpu kay pagsulgan.

²⁶ Masyadu siya pinakurianan sa mayamu pag manugbulung ag iginastus yi niya ti tanan niya kasiyunan dapat unman diman nag-ayad una lang diit, lalu ngap inmamat di kay dahilan.

²⁷ Pagka naalaman niya ti manga barita tungkul sa kan Hisus, napaminsan siya sa kayamuan tawu, nagpakarani sa kan Hisus aday-an bag-u nag-igpil sa kay rutay.

²⁸ Dahil pag-isipun niya, “Nu maigpilan lang niku kay rutay, pihu gid maayadan aku.”

²⁹ Susun ngani nap-ut kay pagsulgan ag naasaydan niya sa kay bilug naayadan yi siya sa kay kakurian.

³⁰ Pagka naramdaman ni Hisus may ginmamit kay kamaskihan, kadaka napasrangu siya tag sa manga tawu magkun,

³¹ “Si unu nguna ti nag-igpil sa kang rutay?” Magkun kay manga tuludluan, “Kawu maghiling di waydi pagsiutun kawu kayamuan, hayga magpaingana waya kawu, ‘Si unu nguna ti nag-igpil sa kangku?’ ”

³² Namarantayun si Hisus sa kay libut hampay makitan niya nu si unu nguna ti nag-igpil sa kanya.

³³ Magkadala yi ti babayi pagtakigan sa dala dahil naalaman yi waydi niya nu hintay ti nangyari sa kanya. Nakan nagpakarani siya sa kan Hisus napayuk-ub sa kay atubangan bag-u itinultul niya ti buu katutuuhanan.

³⁴ Bag-u sinabi ni Hisus sa kanya, “Kawu duy pinaayad yi dahil sa kanmu magsarig. Pag-uli yi duy kawu, danga yi magkaaburidu, mayad yi kawu, udyi kanmu kakurian.”

³⁵ Magbagaw waya si Hisus, may rinmas-ug manga tawu ginan sa ulian pangulu simbahan manga Hudiyu. Magkun sida sa kan Hairu, “Udyi duy kanmu anak babayi. Danga yi lang kawu magbalag sa Maisturu.”

³⁶ Pagka naalaman ni Hisus kanda barita, sinabi niya sa pangulu simbahan manga Hudiyu, “Danga duy kawu magkadala. Pagsarig lang kawu.”

³⁷ Unman pinasnuan ni Hisus una hintay ti kumuyug sa kanya nu ud sida lang ni Pidru ni Santiyagu hanggan kan Santiyagu patar-ari si Huwan.

³⁸ Pagka sida napatangad sa balay pangulu, nakitan ni Hisus ti magkalaguluhan, may maglumi, may magnguynguy.

³⁹ Pagka nagsaka yi siya kay sinabi sa kanda, “Hayga kamu magkalaguluhan ag maglumi? Balaw tigbak ti anak. Turug lang siya.”

⁴⁰ Kanda lang kinasarin-an siya. Dapat ay pagka ipinalwas yi niya sida tanan, iniba niya kay ama kay ina anak hanggan kay manga tuludluan bag-u nagpakarani siya sa igyaan anak mabangkayan.

⁴¹ Pagka hiniyaptan niya ti anak, sinabi niya sa kanya magkun, “Talita kum.” Kay ibug sabihun, Anak, pagsabihun niku sa kanmu, pagbangun yi kawu.

⁴² Kadaka nagbangun yi ngani ti anak ag naglakaw. Sampulu may duwa yi waydi ka timpu kay idad. Masyadu gid pag naglingut kay manga kaibahan ni Hisus.

⁴³ Bag-u kay binilinan ni Hisus sida mahigpit danga sabiha una sa kantapu inda ti nangyari. Bag-u magkun siya pakan-i yi karan-unun ti anak.