Markus 4 - Hanunuu

Ti Pahalimbawa tungkul sa Manugpamgas

¹ Nanudlu maan si Hisus sa manga tawu sa saruy danaw Galiliya. Pagka siniut siya kayamuan tawu, sinmakay siya tinmukaw sa usa ka duunduun. Ti kayamuan tawu bay sa saruy di danaw.

² Bag-u mayamu pag bagay kay itinudlu sa kanda sa manga pahalimbawa. Sa kay magtudlu magkun siya,

³ “Pagpatingi kamu. May usa ka tawu manugtanman linmakaw hampay mamamgas.

⁴ Sa kay magpamgas may binhi sinmamad sa saruy dalan. Linmuwang ti manga manuk, bag-u tinabu tininduk nida tunda pag binhi.

⁵ Kay iba nipamgas sa mabatu, ag manipis lang pag daga. Madali nagtubu ti binhi dahil manipis lang pag daga.

⁶ Dapat pagka nasinggitan masyadu gid pag init, nalayung yi tunda dahil unman may gamut aba.

⁷ Kay iba binhi nipamgas sa basad kadugihan. Pagka linmangba ti manga dugi, pinil-it yi ti binhi, udyi namurak.

⁸ Dapat ay ti binhi nipamgas sa mayad pag daga nag-abwat, nanlagbak, nanguhay. Kay butir sa kada uhay may tigtatlumpulu kay butir, may tig-unumpulu, may tigmananggatus.”

⁹ Magkun si Hisus, “Ti may tuli kailangan pagpatingi.”

Kay Turunu manga Pahalimbawa

¹⁰ Pagka nuli yi ti kayamuan tawu, kay sampulu may duwa ka tuludluan hanggan manga iba waya nagpaingana sa kan Hisus tungkul sa manga pahalimbawa.

¹¹ Bag-u magkun siya sa kanda, “Sa kanyu pag iinintirga ti katutuuhanan unman waya niburayhaw tungkul sa kaharian Diyus. Dapat sa manga sa luwas paggamitun niku ti manga pahalimbawa sa kang magtudlu,

¹² hampay angay sa isinurat sa Banal Kasuran magkun, ‘Una sida magpakabantay, unman may mag-akitan, una sida magpakapatingi, unman diman may naintindihan. Nu bukun katida barang bumalik sida sa Diyus ag patawadun sida.’”

¹³ Magkun si Hisus sa kay manga tuludluan, “Unman aw naintindihan niyu inda pag pahalimbawa? Kabitay pag masalman niyu ti tanan pag manga pahalimbawa?

¹⁴ Ti pag-ipamgas imaw ti Bagaw Diyus.

¹⁵ Tunda yi ngani manga sa saruy dalan imaw ti manga manugpatingi. Pagka ipinamgas ti Bagaw sa kanda manga tagipusuun ag kanda napatingihan, kadaka nagras-ug si Satanas, pagpalimutun niya ti Bagaw Diyus ipinamgas sa kanda manga tagipusuun.

¹⁶ Ti iba parihu sa nipamgas sa mabatu pag rugar. Nagpatingi sida sa Bagaw Diyus masulung mana kanda naisipan, susun yi kanda tinanggap.

¹⁷ Dapat maaw unman nidna tunda sa kanda tagipusuun, nakan unman sida dinmugay. Pagka rinmas-ug ti manga kakurian, ti manga pag-unuunu dahil sa Bagaw Diyus, bigla lang inmalinlangan.

¹⁸ Tuhay maan ti nipamgas sa basad kadugihan. Nagpatingi sida sa Bagaw Diyus.

¹⁹ Dapat pagka dugay naabala sida sa manga bagay sa babaw daga. Mairibgun yi sida sa kayamanan, maghingbut waya sa iba manga bagay. Nakan ti Bagaw Diyus udyi may rugar sa kanda tagipusuun, udyi binmurak.

²⁰ Ti iba imaw ti nipamgas sa mayad pag daga. Magpatingi sida sa Bagaw Diyus kanda gid pagtanggapun, mamurak sida may tigtatlumpulu, may tig-unumpulu, may tigmananggatus.”

Balaw Itagu ti Sulu

²¹ Sinabi ni Hisus sa kanda magkun, “Pagsul-an aw lugud tawu kay sulu hampay itagu tunda sa basad salupan, aw sa sirung laming? Unman aw pagsul-an ti sulu hampay ibugtang tunda sa dapat bugtangan sulu?

²² Dahil unman may mitagu, miburayhaw di gid aban ti tanan-tanan. Una hintay ti nilihim taynguna pihu miburayhaw aban.

²³ Ti may tuli kailangan pagpatingi.”

²⁴ Bag-u magkun waya si Hisus, “Pagpatingi kamu kaayad sa kangku. Ayawan kamu Diyus pan-unawa nu kabitay kamu magpatingi, ag dugangan waya niya inda.

²⁵ Dahil ti may imaw pakan-an waya lalu waya abunda. Dapat ti unman may imaw, una diit wadi ti sa kanya tabuhun bul-un.”

Pahalimbawa tungkul sa Binhi Nagtubu

²⁶ Magkun si Hisus, “Kay paghari Diyus kainda nangus. May tawu magpamgas binhi sa kay tanman.

²⁷ Bag-u magparargu siya sa kay buruwatun sirang-sirang ag magtubu magdaka ti binhi unman niya magkaalaman nu kabitay.

²⁸ Sa daga pag tinmubu bag-u binmurak ti tanum. Sa kabag-u tubu dapu, bag-u uhay, bag-u pasi tigpabuyat sa kay uhay.

²⁹ Pagka lutu yi, susun yi ipaani dahil aranyun yi.”

Ti Pahalimbawa sa Butir Mutsasa

³⁰ Magkun si Hisus, “Naan nguna nita pag ipaparihu ti kaharian Diyus ag sa hintay pag pahalimbawa pag ipaliwanag nita inda?

³¹ Kay paghari Diyus parihu sa butir mutsasa. Pagka isabug tunda, imaw ti pinakadiit sa tanan binhi sa babaw daga.

³² Dapat nu isinabug yi, mag-abwat, magdaka man sa tanan pag manga puun urupiun. Magsanga daraka bag-u mag-apun ti manga manuk sa magkahamyan pag sanga.”

Kay Paggamit ni Hisus sa manga Pahalimbawa

³³ Sa kay magtudlu ni Hisus Mayad pag Barita sa manga tawu, ginamit niya ti mayamu pahalimbawa parihu sa kainda angay sa kanda kaya intindi.

³⁴ Kada magtudlu siya sa kanda pirmi paggamitun niya ti manga pahalimbawa. Dapat nu sa kay sadili tuludluan pag-ipaliwanag niya ti tanan manga bagay.

Inampara ni Hisus ti Untug

³⁵ Pagka yabi yi, sinabi ni Hisus sa kay manga tuludluan magkun, “Pagdipay duy kita sa baliw dipay danaw.”

³⁶ Nakan tinayakan nida ti kayamuan. Inibahan nida siya sa duunduun kay sinakyan kis-ab. May kaibahan waya waydi manga iba duunduun.

³⁷ Pagka sida sa karaw-an danaw, kadaka sida natakdan untug. Nasipwakan balud ti duunduun harus mapnu yi lang danum.

³⁸ Si Hisus bay maturugan di sa duunduun sa ulin baliwa, sa kay sangdayan di kay ulu. Bag-u pinulaw nida siya magkun, “Maisturu, unman aw may daut sa kanmu nu mabagbag kita?”

³⁹ Nagbangun si Hisus, tinamyaw niya ti bagyu ag sinabi niya sa danaw magkun, “Paghubung yi, danga yi magpaywas pag danum.” Naghubung yi ngani ti untug, ag kinmalma ti danaw.

⁴⁰ Sinabi niya sa kay manga tuludluan, “Hayga lugud kamu manga madalaun? Udwaya aw lugud kamu may pagsarig?”

⁴¹ Masyadu gid sida nadala ag nadulaw. Magharampangan sida magkun, “Hayga nguna katida pag tawu. Hayga magpaniwala sa kanya una ti bagyu una ti paywas danum?”