Markus 3 - Hanunuu

Ti Tawu Pilay kay Kamang

¹ Pagka dugay nag-ati maan si Hisus sa simbahan manga Hudiyu. May tawu ati pilay kay kamang.

² Tiniidan manga Parisiyu si Hisus nu ngatay paayadun niya sa Sirang Pamahari hampay kanda mana isumbung siya.

³ Sinabi ni Hisus sa tawu pilay kay kamang, “Abala duy kawu, pagtindug sitay.”

⁴ Bag-u magkun si Hisus sa manga Parisiyu, “Hintay nguna ti angay sa Kasuguan ni Muysis katpung Sirang Pamahari, ngatay tigbuwat ikaayad sa kaparihu, aw ngatay tigbuwat ikadaut? Ngatay tig bawi buhi tawu, aw ngatay tigpahamak buhi tawu?” Dapat ay sida unman nag-ingay.

⁵ Namarantayun si Hisus magkagalit sa kanda dahil pag-iruku niya ti kaganitan nida tagipusuun. Bag-u sinabi niya sa tawu pilay kay kamang, “Hunatan duy kanmu kamang.” Kay ngani ihinunat kay kamang bag-u nag-ayad yi ngap.

⁶ Nagluwas yi sa simbahan manga Hudiyu ti manga Parisiyu. Kadaka nagpululungan sida sa manga nagpakampi sa kan Hirudis, nu kabitay kanda ipamatay si Hisus.

Ti Kayamuan Tawu sa Saruy Danaw

⁷ Si Hisus hanggan kay manga tuludluan nag-ati sa saruy danaw. Nagkuyug sa kanya ti mayamu pag manga tawu ginan sa Galiliya hanggan Hudiya,

⁸ ginan sa Hirusalim, ginan sa Idumiya, ginan sa rugar dipay sapa Hurdan, ginan sa libut Tiru hanggan Sidun. Lalu mayamu pag tawu nag-ati sa kanya dahil nabaritaan nida ti tanan kay pagbuwatun.

⁹ Sinabi ni Hisus sa kay manga tuludluan magkun, “Ihanda niyu sa kangku ti usa ka duunduun dahil sa kayamuan tawu, bagay aku kanda siutun.”

¹⁰ Dahil magpaayad siya sa mayamu tawu, nakan magdurutdutan ti tanan manga may dahilan hampay siya maigpilan nida.

¹¹ Pagka nakitan si Hisus manga tawu inapuan labang, napadapa sida sa kay atubangan, nagringgit magkun, “Kawu ti Anak Diyus.”

¹² Binawalan ni Hisus ti manga labang magkun, “Danga pag-ingarni niyu kang ngaran.”

Pinili ni Hisus ti Sampulu may Duwa ka Tuludluan

¹³ Pagka dugay nagtukad si Hisus sa bantud ag tinawagan niya ti manga tawu kay pagkailanganun. Nagluwang ngani sida tag sa kanya.

¹⁴ Bag-u nagpili siya sampulu may duwa ka tawu, (kay iningarnan manga apustul) hampay sida kay yi gid manga kaibahan niya ag hampay sida paatagun niya manudlu,

¹⁵ may kamaskihan diman hampay magpalwas manga labang.

¹⁶ Inda ngani ti sampulu may duwa ka tawu kay pinili: si Simun, kay binansagan si Pidru,

¹⁷ si Santiyagu anak ni Sibidiyu, hanggan kay patar-ari ni Santiyagu si Huwan. (Sida kay binansagan ni Hisus Buanirgis, ibug sabihun manga mabisug pag tawu parihu sa linti.)

¹⁸ Bag-u si Andiris, si Pilipi, si Bartulumi, si Matiyu, si Tumas, si Santiyagu kan Alpiyu anak, si Tadiyu, si Simun (imaw ti pagsabihun makabayan),

¹⁹ hanggan si Hudas Iskariyuti, imaw ti nagpakampi sa kalaban ni Hisus.

Si Hisus ag si Biilsibul

²⁰ Pagka nagsaka si Hisus sa balay, nagtipun maan ti mayamu pag tawu siyun, nakan udyi makahimu kaun sida ni Hisus.

²¹ Pagka nabaritaan niya manga katawuhan, naglinuwang sida hampay siya kanda dakpun, dahil pagkumnun manga tawu paung si Hisus.

²² Bag-u may manga manugtudlu Kasuguan naglus-ug ginan sa Hirusalim magkun, “Inapuan siya ni Biilsibul. Hari manga labang ti nagpakaun kapangyarihan sa kanya hampay makapalwas manga labang.”

²³ Nakan ipinakarani ni Hisus ti manga tawu sa kanya bag-u magkun siya sa kanda sa manga pahalimbawa, “Kabitay pag pumalwas si Satanas sa kan Satanas?

²⁴ Dahil nu maglalabanan ti manga sakup kaharian, pihu marangga aban tunda pag kaharian.

²⁵ Mawayak ti magtal-anakan nu udyi magkarasunduan.

²⁶ Nu abi labanan ni Satanas kay sadili ag udyi magkarausa kay manga sakup, mawasak yi kay kamaskihan, arani yi kay katapusan.

²⁷ Dapat nu mabisug pag tawu ti may puun balay, unman may makasaka sa siti pag balay hampay umagaw kay manga butang nu unman gapusun dapu niya ti may puun balay. Bag-u mahimu siya sumaka umagaw kay butang.

²⁸ “Ungud duy kang pagsabihun sa kanyu, patawadun di Diyus ti manga tawu una hintay kanda manga kasalanan, una waya sida nagmuransa laban sa Diyus.

²⁹ Nu bay pagmuransahun tawu ti Ispiritu Banal, unman gid patawadun siya hanggan aban. Tunda pag kasalanan niya unman mab-ul hanggan aban.”

³⁰ Tunda kay sinabi ni Hisus dahil nagsabi ti manga tawu kuntay inapuan siya labang.

Kay Ina hanggan Kay manga Patar-ari ni Hisus

³¹ Nag-ati sa kan Hisus kay ina hanggan kay manga patar-ari. Mag-alagad sida sa luwas balay nagpasugu hampay siya bul-un.

³² Kayamuan tawu ti matukawan sa palibut niya. Magkun sida sa kanya, “Asan duy kanmu ina kanmu manga patar-ari sa luwas balay, kanda gustu maghampang sa kanmu.”

³³ Magkun si Hisus, “Hintay nguna kang ina, si unu nguna kang manga patar-ari?”

³⁴ Namarantayun siya sa manga tawu matukawan sa kay libut niya, bag-u magkun siya, “Inda yi ngani kang ina kang manga patar-ari.

³⁵ Una hintay pag tawu ti magtupad sa kagustuhan Diyus imaw kang patar-ari lalaki, kang patar-ari babayi, kang ina.”