Markus 2 - Hanunuu

Pinaayad ni Hisus ti Tawu Lunu

¹ Pagka lawuy pira ka sirang, nagsiyun yi maan si Hisus sa Kapirnaum. Pagka nabaritaan manga tawu siya sa balay,

² mayamu ti nagtiripun hanggan di udyi mag-itabu sa balay una sa sugkadan. Itinudlu ni Hisus sa kanda ti Bagaw Diyus.

³ Pagka dugay may rinmas-ug upat ka tawu magyayung tawu lunu.

⁴ Pagka unman sida makapakarani sa kan Hisus dahil sa kayamuan tawu, linukaban nida ti atup sa kay tungud ni Hisus. Pagka linukaban yi bag-u kanda itinuntun ti tawu lunu sa basad duyan.

⁵ Pagka nakitan ni Hisus kanda pagsarig, sinabi niya sa tawu lunu, “Pinatawad yi duy kanmu manga kasalanan.”

⁶ May matukawan ati manga manugtudlu Kasuguan, pag-isipun nida sa kanda sadili magkun,

⁷ “Hayga nguna magbagaw inda pag tawu kumun? Magpalabi-labi siya sa Diyus. Hintay ti may kapangyarihan makapatawad manga kasalanan tawu nu unman ti Diyus lang?”

⁸ Kadaka naalaman ni Hisus sa kay tagipusuun may pag-isipun sida sa kanda sadili, sinabi niya sa kanda, “Hayga kanyu pagpakaisip-isipun tunda pag manga bagay sa kanyu sadili?

⁹ Hintay nguna ti lalu malpus sabihun sa tawu lunu, ngatay ‘Ipinatawad yi kanmu manga kasalanan’, aw ngatay ‘Pagtindug yi kawu, luhuta kanmu amak, paglakaw yi kawu’?

¹⁰ Dapat ay hampay maalaman niyu ti Anak Tawu may kamaskihan sa babaw daga hampay magpatawad sa manga kasalanan tawu,” sinabi ni Hisus sa tawu lunu,

¹¹ “Pagsabihun niku sa kanmu, pagtindug yi kawu duy, luhuta yi kanmu amak, pag-uli yi sa kanmu balay.”

¹² Kadaka siya nagtindug sa kanda atubangan, linuhut yi kay amak, rargu yi nuli sa kay balay. Nakan nadulaw sida tanan, dinayaw nida ti Diyus magkun, “Una kaybi ginan ud may nakitan katida.”

Tinawagan ni Hisus si Libi

¹³ Linmakaw maan si Hisus nag-atag sa saruy danaw. Pagka nagpakarani sa kanya ti kadamlan tawu, nanudlu maan siya sa kanda.

¹⁴ Sa kay naglakaw nakitan niya si Libi kan Alpiyu anak matukawan sa suruktan buhis. Magkun si Hisus sa kanya, “Pagkuyug duy kawu sa kangku.” Nagtindug si Libi nagkuyug ngani sa kan Hisus.

¹⁵ Pagka dugay magkaun si Hisus hanggan kay manga tuludluan sa kan Libi balay. Nagsaru diman sa kan Hisus ti mayamu pag manga manunukut buhis hanggan manga makasalanan pag tawu. Dahil mayamu ti nagkuyug sa kanya.

¹⁶ May manga Parisiyu ati, manga Manugtudlu ngani Kasuguan. Pagka nakitan nida si Hisus magkaun kay kasaru manga makasalanan hanggan manga manunukut buhis, sinabi nida sa kay manga tuludluan magkun, “Magkaun mag-inum aw siya kay kasaru manga manunukut buhis ag manga makasalanan?”

¹⁷ Pagka nadnugan ni Hisus tunda, sinabi niya sa manga manugtudlu Kasuguan, “Unman may kailangan sa manugbulung ti balaw may manga sakit, ti may manga sakit lang ti may kailangan. Unman aku nagsitay hampay magtaban sa manga matadlung, nu unman sa manga makasalanan ngap.”

Paingana tungkul sa Unman Maghandum Karan-unun

¹⁸ Ati katpung unman maghandum karan-unun kay manga tuludluan ni Huwan hanggan ti manga Parisiyu. Bag-u may nagpakarani sa kan Hisus magkun, “Hayga duy may ugali unman maghandum karan-unun kay manga tuludluan ni Huwan hanggan ti manga tuludluan manga Parisiyu, dapat unman may ugali katida kanmu manga tuludluan?”

¹⁹ Sinabi ni Hisus sa kanda magkun, “Mahimu aw lugud unman maghandum karan-unun ti manga binan-awan sa pamasaruhan nu kaibahan waya nida ti lalaki ipinasaru? Nu kaibahan waya nida ti lalaki ipinasaru, dayu waydi mahimu nu unman kumaun di gid sida.

²⁰ Dapat nu aban bul-un yi siya ginan sa kanda, bag-u di unman sida humandum karan-unun, nu udyi siya sa kanda.

²¹ “Unman may tawu maglupun bag-u rutay sa daan pag rutay. Nu bag-u pag lupun gumisi ngap sa kay daan pag rutay linupnan bag-u umamat dumaka kay gisi.

²² Unman diman may tawu magsukad bag-u intus ubas sa daan pag manga paknul pag sukadan. Nu abi katunda ti buwatun mabusni ti paknul. Mabuhus yi lang ti intus ubas ag madaut yi lang ti manga sukadan. Ti mayad nu isukad ti bag-u intus ubas sa bag-u pag manga paknul pag sukadan.”

Tungkul sa Sirang Pamahari

²³ Pagka sa usa ka Sirang Pamahari nakasabuk sida ni Hisus sa matiriguhan. Sa kanda ngani maglakaw, nag-umpisa kay manga tuludluan maggutul manga uhay tirigu.

²⁴ Magkun ti manga Parisiyu sa kan Hisus, “Malu duy, hayga pagbuwatun nimu manga tuludluan sa Sirang Pamahari ti labag sa Kasuguan?”

²⁵ Magkun si Hisus sa kanda, “Udwaya aw lugud nabasa niyu kay binwat ni Dabid, pagka siya hanggan kay manga kaibahan magkalun-us yi ag unman may karan-unun?

²⁶ Nagsaka kabay si Dabid sa Balay Diyus katpung pangulu manughandug si Abiyatar. Kinaun ni Dabid ti tinapay ti ibinugtang ipinakaun sa atubangan Diyus. Tunda pag tinapay unman mana may makakaun iba nu unman ti manga manughandug lang. Dapat kinaun ngap ni Dabid tunda pag tinapay bag-u pinakan-an niya hanggan kay manga kaibahan.”

²⁷ Sinabi maan ni Hisus sa kanda, “Ti Sirang Pamahari binwat para sa tawu, balaw tawu ti binwat para sa Sirang Pamahari.

²⁸ Nakan una ti Sirang Pamahari sa sirung di kapangyarihan Anak Tawu.”