Markus 16 - Hanunuu

Kay Pagkabuhi Uman ni Hisus

¹ Pagka lawuy yi ti Sirang Pamahari, sida ni Marya Magdalina, ni Marya kay ina ni Santiyagu hanggan si Salumi namili manga pamanglu hampay kanda ihaplas sa bangkay ni Hisus.

² Sa surip Duminggu sinminggit yi ti init, nag-ati sida sa tinaguktukan batu.

³ Nagharampangan sida sa kanda maglakaw magkun, “Hintay nguna kanta masugu hampay pumaligid batu hampay mabukasan ti sabian tinaguktukan batu?”

⁴ Dapat pagka binantayan nida ti tinaguktukan batu, nakitan nida ilinigid yi maaw ti batu. Daka gid tunda pag batu.

⁵ Pagka sinmulud sida sa tinaguktukan batu, nakitan nida may matukawan baliwa sa sikun usa ka kan-akan may sulung rutay sadsad malagti. Naglingut gid ti manga babayi.

⁶ Magkun ti lalaki, “Danga magkadala kamu. Paghanapun niyu si Hisus taga Nasarit, ti ipinaku sa kurus. Nabuhi siya uman. Udyi siya sitay. Bantayi niyu, asan kay nagkabugtangan niya.

⁷ Nakan ngani pag-atag yi kamu sabihi yi niyu sa manga tuludluan, lalu ngap sa kan Pidru, si Hisus umuna sa kanyu tag sa Galiliya. Makitan niyu siya ati, parihu sa kay sinabi sa kanyu.”

⁸ Nagluwas ginan sa tinaguktukan batu ti manga babayi, nalagiw sida dahil masyadu sida nakulbaan. Sa subra nida pag dala unman sida may itinultul una sa kantapu. [Aba pag Pangatapusan Tultulanun]

Napakakit si Hisus sa kan Marya Magdalina

⁹ Surip surip sirang Duminggu, pagka nabuhi uman si Hisus, un-an sa tanan napakakit siya sa kan Marya Magdalina. Kaybi may ipinaluwas si Hisus pitu ka labang ginan sa tunda pag babayi.

¹⁰ Pagka napakakit si Hisus sa kan Marya Magdalina, nag-ati siya sa kay manga tuludluan ni Hisus. Magkabayung ag maglulumian sida bag-u ibinarita niya sa kanda kay nakitan.

¹¹ Dapat unman sida naniwala sa kay sinabi ni Marya kuntay nabuhi uman si Hisus ag napakakit sa kanya.

Napakakit si Hisus sa kay Duwa ka Tuludluan

¹² Napakakit diman si Hisus sa duwa ka tuludluan sa kanda maglakaw tabug sa baryu. Dapat tuhay kay histuda.

¹³ Pagka nakitan nida si Hisus, nagpabalik sida duwa tag sa Hirusalim. Kanda ibinarita sa kanda manga kaibahan ti nangyari, dapat sida unman diman waydi pinaniwalaan.

Napakakit si Hisus sa Kay Sampulu may Usa ka Tuludluan

¹⁴ Bag-u napakakit si Hisus sa sampulu may usa ka tuludluan sa kanda magkaun. Tinamyaw niya sida dahil sa unman magsarig sa kanya ag maganit waya kanda tagipusuun, sapagka unman naniwala sida sa manga nakakit sa kanya sa kay pagkabuhi uman.

¹⁵ Sinabi ni Hisus sa kanda magkun, “Pag-ati kamu sa tanan rugar sitay sa babaw daga, itudlu niyu ti Mayad pag Barita sa tanan manga tawu.

¹⁶ Ti tawu nu sumarig sa kangku bag-u itulbaw, may karibrihan. Dapat ti tawu nu unman magsarig, sintinsiyahan siya ngapu aban sa kaparusahan.

¹⁷ Ti manga tawu nu magsarig may makitan inda pag manga tanda tungkul sa kamaskihan: sa ngaran niku pag ipalwas nida ti manga labang, ag bumagaw sida sa tuhay-tuhay pag pamagaw.

¹⁸ Balaw sida maunu una humiyaput sa ulay, una uminum sa makahilu. Umayad ti may manga sakit nu kup-an nida manga kamang.”

Kay Pag-atag ni Hisus sa Langit

¹⁹ Pagka nakatapus kay bagaw sa kanda, dinara yi ti Panginuun Hisus atag sa langit. Tinmukaw siya sa sikun baliwa Diyus.

²⁰ Bag-u nag-ati ngani kay manga tuludluan nanudlu Mayad pag Barita. Nagbuwat ti Panginuun manga tanda imaw yi ngap ti puruyba sa kanda bagaw.