Markus 14 - Hanunuu

Paggayakun yi si Hisus Matyun

¹ Duwa wadi ka sirang bag-u Kapistahan yi sa Pag-alaala sa Karibrihan hanggan Kapistahan manga Tinapay unman may Pamadaka. Pag-isipun yi manga pangulu manughandug hanggan manga manugtudlu Kasuguan nu kabitay kanda ipadakup si Hisus sa lihim bag-u ipamatay.

² Dahil magkun sida, “Danga nita ipadakup katpung sa Kapistahan, barang magulu ti manga tawu.”

Binuhusan Pamanglu si Hisus

³ Ati katpung, si Hisus sa balay ni Simun sa baryu Bitanya. Tunda pag Simun kaybi may dilikadu pag sakit sa lukub. Sa kay magkaun ni Hisus, nagpakarani sa kanya ti usa ka babayi may dara alabasturu pag batu ti binwat sukadan punu mahalaga pag pamanglu nardu. Binuung niya ti liug sukadan bag-u kay ibinuhus kay pamanglu sa kay ulu ni Hisus.

⁴ Dapat nag-isug ti iba magkun, “Hayga inuyang lang tunda?

⁵ Mayad waya nu ipinabili kis-ab sa tulu ka gatus dinaryu bag-u nu ipinakaun sa manga pugri kay kabilyanan.” Bag-u tinamyaw nida ti babayi.

⁶ Dapat magkun si Hisus, “Pabay-ani niyu siya. Hayga duy kanyu pagpakialman siya. Mayad ngap inda kay binwat sa kangku.

⁷ Pirmi di sa kanyu ti manga pugri. Una kapira nu gustu niyu, mahimu niyu mabwatan sida mayad, dapat aku aban udyi dugay kaibahan niyu.

⁸ Binwat babayi kay nakaya. Binuhusan yi niya pamanglu kang bilug bilang ga alistu yi sa udas aban maglubung sa kangku.

⁹ Ungud duy kang pagsabihun sa kanyu, una naan pag itudlu ti Mayad pag Barita sa buu kalibutan, hanggan ti binwat babayi matultul diman bilang ga pag-alaala sa kanya.”

Nagkasundu si Hudas sa kay manga Kalaban ni Hisus

¹⁰ Sa sampulu may duwa ka tuludluan ni Hisus ti usa kay ngaran si Hudas Iskariyuti. Nag-ati si Hudas sa manga pangulu manughandug hampay itudlu niya si Hisus sa kanda.

¹¹ Pagka naalaman nida nakabaya sida ag nangaku nida siya pakan-an kuwarta. Siyun ginan naghanap paraan si Hudas hampay itudlu niya si Hisus sa kalaban.

Sida ni Hisus Namwat Yapun bilang Pag-alaala sa Karibrihan

¹² Rinmas-ug ti un-an pag sirang Kapistahan manga Tinapay unman may Pamadaka. Sa ati pag sirang kanda ugali mag-iyaw anak karanidu sa Pag-alaala sa Karibrihan. Sinabi niya manga tuludluan sa kan Hisus, “Naan duy kanmu gustu ialistu nimi kanmu yapun sa Pag-alaala sa Karibrihan?”

¹³ Sinugu niya kay duwa ka tuludluan. Magkun siya sa kanda, “Pag-atag kamu sa banwa, ati may masulang kamu usa ka lalaki may sungguy usa ka banga danum. Kuyuga niyu siya.

¹⁴ Nu naan siya pag sumaka pag balay, sabiha niyu sa may puun balay, ‘Magkun ti Maisturu, naan duy pag sulud-sulud ti mahimu mahayinan nimi yapun para sa Pag-alaala sa Karibrihan, kasaru niku kang manga tuludluan?’

¹⁵ Bag-u itudlu niya sa kanyu ti daka pag sulud-sulud sa ikadwa pag ugpu, alistu yi kay gamit. Ati kamu paghiwat kanta karan-an.”

¹⁶ Nag-ati ti manga tuludluan. Pagka sida rinmas-ug sa banwa, nakitan nida ti angay sa sinabi ni Hisus sa kanda. Bag-u ihinanda nida ti yapun sa Pag-alaala sa Karibrihan.

¹⁷ Pagka yabi yi, nag-ati ngani si Hisus hanggan kay sampulu may duwa ka tuludluan.

¹⁸ Pagka sida tinmukaw yi ag magkaun yi, sinabi ni Hisus sa kanda, “Ungud duy kang pagsabihun sa kanyu, ti usa sa kanyu kasaru diman niku, pumakampi sa kalaban hampay aku kay itudlu.”

¹⁹ Nanruku gid ti manga tuludluan, ti kada usa namaingana sa kan Hisus magkun, “Aku aw nguna duy?”

²⁰ Nagsagut si Hisus, “Usa sa sampulu may duwa, ti kadungan niku sumawsaw sa taya, imaw yi ngani.

²¹ Mamatay gid ti Anak Tawu angay sa isinurat sa Banal Kasuratan tungkul sa kanya. Dapat kaawaawa duy tunda pag tawu ti pumakampi sa kalaban hampay itudlu ti Anak Tawu. Mayad waya nu unman siya nianak.”

²² Pagka sida magkaun, nagpunpun si Hisus tinapay. Pagka siya nakapasalamat sa Diyus, pinikapika niya ti tinapay bag-u kay ipinakaun sa kay manga tuludluan. Ag magkun siya, “Tanggapa niyu inda. Inda kang bilug.”

²³ Pagkatapus binitbit niya ti ungut, nagpasalamat siya sa Diyus bag-u itinunghul niya sa kanda. Sida tanan nag-inum sa ungut.

²⁴ Bag-u sinabi niya sa kanda, “Inda kang dugu magpatutuu sa taratu Diyus. Ibuhus kang dugu alang alang sa mayamu tawu.

²⁵ Ungud duy kang pagsabihun sa kanyu, dayi aku uminum inda pag bag-u pin-ga ubas hanggan sa udwaya kaudasan aban nu inmun niku ti bag-u pag pin-ga ubas sa kaharian Diyus.”

²⁶ Pagka sida kinmanta kanda dayaw sa Diyus, nag-atag sida sa Bantud Ulibu.

Ipinurupita ni Hisus kan Pidru Pagtanggi sa Kanya

²⁷ Sinabi ni Hisus sa kay manga tuludluan magkun, “Sab kamu tanan umalinlangan sa kangku, parihu sa pagsabihun Diyus sa Banal Kasuratan magkun, ‘Matyun niku ti manug-alaga karanidu, bag-u mangalat ti manga karanidu.’

²⁸ Dapat nu aku mabuhi uman, umuna aku sa kanyu atag sa Galiliya.”

²⁹ Dapat sinabi ni Pidru sa kanya magkun, “Una duy umalinlangan sida tanan sa kanmu, aku dayu umalinlangan.”

³⁰ Sinabi ni Hisus sa kanya, “Ungud duy kang pagsabihun sa kanmu, taynguna yi gid pag yabi inda, udwaya tumarauk ti manuk pakadwa, itanggi nimu aku katlu ginan.”

³¹ Dapat lalu inungud ni Pidru kay sinabi, “Una waya sa kamatayan damayan gid niku kawu, balaw gid niku kawu itanggi.” Katunda diman ti sinabi nida tanan.

Magdarangin si Hisus sa Gitsimani

³² Pagka rinmas-ug sida ni Hisus sa usa ka rugar kay ngaran Gitsimani, sinabi niya sa kay manga tuludluan magkun, “Pagtukaw dapu kamu sitay, mandarangin aku.”

³³ Bag-u tinaban niya sida ni Pidru, ni Santiyagu, ni Huwan. Bag-u nanruku siya ag naarimputu sa kay tagipusuun.

³⁴ Sinabi niya sa kanda, “Kang tagipusuun mas-ut yi sa karukuan harus ga mamatay yi aku. Pag-alagad kamu sitay. Pagmaimatahan kamu.”

³⁵ Pagka nagpakarayu siya diit, napadapa siya sa daga, nagdarangin nu mahimu unman mana malakawan niya kay pag-atubangun pag kakurian.

³⁶ Sinabi niya, “Amang duy, kaya nimu mabuwat ti tanan bagay. Ipakarayu nimu ginan sa kangku inda pag ungut may kakurian. Dapat una katida, danga kangku pag kagustuhan ti masunud nu unman kanmu di gid ti masunud.”

³⁷ Nagbalik si Hisus, naras-ugan niya turug kay tulu ka tuludluan. Sinabi niya sa kan Pidru, “Simun, turug aw kawu? Unman aw kawu makaagwanta maimatahan usa lang ka udas?

³⁸ Pagmaimatahan kamu pagdarangin hampay kamu balaw madara sa tuksu. Ti naisipan mana alistu, dapat ay ti bilug malumuy.”

³⁹ Nagpakarayu maan si Hisus nagdarangin, kay sinabi imaw diman pag manga bagaw ga kis-ab.

⁴⁰ Nagbalik maan siya naras-ugan maan niya sida manga maturugan, dahil tinalu yi sida puyat. Unman nida alam nu hintay ti isagut sa kanya.

⁴¹ Pagka sa kay ikatlu yi pagbalik niya sa kanda magkun si Hisus, “Magkaturug aw waya kamu, magpahari aw waya? Hustu yi. Inda yi ti kaudasan. Malu, iintirga yi ti Anak Tawu sa manga makasalanan.

⁴² Pagbangun yi kamu, atag yi kita. Inda yi ti tumudlu sa kangku atag sa manga makasalanan.”

Kay Nagdakup sa kan Hisus

⁴³ Magbagaw di waya si Hisus, nagras-ug yi ngap si Hudas, usa sa sampulu may duwa. May kaibahan siya mayamu tawu may dara manga baladaw, manga pamakul. Sinugu sida manga pangulu manughandug, manga manugtudlu Kasuguan hanggan manga paggurangunun manga Hudiyu.

⁴⁴ Udwaya sida rinmas-ug ati, magkun ti manugdaya, si Hudas, sa kay manga kaibahan, “Inda kanta palatandaan, nu hintay sab kang arkan imaw yi ngap pag tawu. Dakpa yi niyu, daran-a ag bantayi niyu siya kaayad.”

⁴⁵ Pagras-ug ni Hudas, kadaka siya dinmulud sa kan Hisus magkun, “Maisturu”, bag-u kay inarkan.

⁴⁶ Bag-u hiniyaptan yi manga tawu si Hisus kanda yi dinakup.

⁴⁷ Dapat ay ginmabut kay baladaw ti usa ka kaibahan ni Hisus, tinigbas niya ti panawuhun pangulu manughandug, napungus kay tuli.

⁴⁸ Sinabi ni Hisus sa manga nagdakup sa kanya, “Aku lugud tulisan aw, nakan nagsitay kamu may dara manga baladaw ag manga pamakul hampay dakpun aku?

⁴⁹ Sirang-sirang asan diman waydi aku sa Balay Diyus pag magtudlu. Bati unman waydi niyu dinakup aku. Nakan nangyari inda hampay matupad ti manga Kasuratan.”

⁵⁰ Bag-u naglinayas yi ti manga tuludluan tanan-tanan, tinayakan yi lang usa-usa si Hisus.

⁵¹ Kinmuyug sa kan Hisus ti usa ka kan-akan unman marinu pag rutay. Hiniyaptan siya manga tawu.

⁵² Dapat ay kay binuhian kay kulimpay, nalagiw siya udyi may karutay-rutay.

Si Hisus sa Atubangan Katipunan manga Pinunu

⁵³ Bag-u dinara nida si Hisus tabug sa balay pangulu manughandug. Nagtiripun ati ti tanan manga pangulu manughandug, ti manga paggurangunun manga Hudiyu hanggan ti manga manugtudlu Kasuguan.

⁵⁴ Dinmasun diman si Pidru sa kan Hisus dapat ay balaw napasuud. Pagka rinmas-ug sida sa balay pangulu manughandug sinmulud si Pidru sa sugkadan, tinmukaw siya siyun, kaibahan niya ti manga suruguun magpanarang sa apuy.

⁵⁵ Ti manga pangulu manughandug hanggan ti buu Katipunan manga Pinunu naghanap kastigus laban sa kan Hisus hampay sintinsiyahan siya sa kamatayan. Dapat unman sida may mag-akitan.

⁵⁶ Dahil mayamu mana ti nagkastigus kapudilan laban sa kanya, dapat kanda manga pagsabihun unman magkaparihu.

⁵⁷ Bag-u may manga tawu nag-atubang magbagaw kapudilan laban sa kan Hisus. Magkun sida,

⁵⁸ “Nadnugan nimi kay sinabi magkun, ‘Kang gubaun ti Balay Diyus binwat tawu kamang bag-u sa sulud tulu ka sirang pumatindug tuhay pag Balay Diyus balaw buwat tawu kamang.’ ”

⁵⁹ Dapat unman diman magkaparihu ti pagsabihun manga kastigus.

⁶⁰ Bag-u tinmindug sa kanda atubangan ti pangulu manughandug, pinaingana niya si Hisus magkun, “Unman yi aw kawu may isagut sa inda pag dimanda nida laban sa kanmu?”

⁶¹ Dapat unman nag-ingay si Hisus, unman gid siya nagsagut. Pinmaingana maan ti Pangulu Manug-asiwa Balay Diyus magkun, “Kawu aw ti Pinili Diyus Manugribri pag Hari, ti Anak makapangyarihan pag Diyus?”

⁶² Sinabi ni Hisus, “Aku ngani. Kainda ginan makitan niyu ti Anak Tawu matukawan baliwa sa sikun Diyus makamaskihan minsan sa kay karampatan. Rumas-ug siya padara sa rurum ginan sa langit.”

⁶³ Pagka nakadnug Pangulu Manug-asiwa Balay Diyus sa kay sinabi ni Hisus, ginisi niya kay sadili rutay magkun, “Udyi kailangan nita ti manga kastigus.

⁶⁴ Kamu yi ngani ti nakadnug taynguna kay lapastangan laban sa Diyus. Kabitay lugud kanyu magkilala?” Bag-u sida tanan nagsintinsiya sa kan Hisus sa kamatayan.

⁶⁵ Bag-u ti iba sa kanda nagbuga sa kan Hisus. Tinakluban nida kay mata bag-u kanda sinuntuk siya magkun, “Hulaan nimu, si unu ti nagsuntuk sa kanmu?” Pagka iinintirga yi si Hisus sa manga bantay, nagsuntuk diman waydi sida sa kanya.

Itinanggi ni Pidru si Hisus

⁶⁶ Siyun di si Pidru sa sirung, sa sugkadan. Nagpakarani ti usa ka babayi suruguun Pangulu Manug-asiwa.

⁶⁷ Pagka nakitan babayi si Pidru magpanarang sa apuy, binantayan niya siya bag-u kay sinabi, “Kaibahan diman kawu ni Hisus taga Nasarit, unman aw?”

⁶⁸ Dapat ay nagtanggi si Pidru magkun, “Tau duy, unman niku magkaalaman kanmu pagsabihun.” Inmati si Pidru sa may sabian sugkadan. Nanarauk yi ti manuk.

⁶⁹ Pagka nakakit sa kanya ti suruguun babayi magkun maan siya sa manga tawu siyun, “Inda pag lalaki kaibahan diman nida ni Hisus.”

⁷⁰ Tinmanggi di gid maan si Pidru. Lagat lagat waya bag-u ti manga tawu siyun nagsabi maan sa kan Pidru, “Kaibahan gid ngap kawu nida, dahil taga Galiliya diman kawu.”

⁷¹ Sinmagut si Pidru, “Una waya matyun aku, balaw gid ungud magkakilala niku tunda pag tawu kanyu pagsabihun.”

⁷² Susun nanarauk yi ngani ti manuk pakadwa. Bag-u naisipan ni Pidru kay sinabi ni Hisus sa kanya magkun, “Udwaya tumarauk ti manuk pakadwa, itanggi nimu aku katlu ginan.” Pagka naisipan niya tunda, nanlumi gid si Pidru.