Markus 12 - Hanunuu

Kay Pahalimbawa sa Ubasan ag sa manga Manugtarabahu

¹ Nagbagaw maan si Hisus sa kanda sa pahalimbawa magkun, “May tawu nagtanum ubas sa kay ubasan. Inaladan niya bag-u nagbuwat siya pirigsan ubas. Nagpatindug siya usa ka balay abwat hampay bantayan kay ubasan. Bag-u pinaupahan niya kay ubasan sa kay manga manugtarabahu. Bag-u siya linmakaw tag sa iba rugar.

² Pagka udas tigpuruti sinugu niya kay usa ka panawuhun tabug sa manga manugtarabahu hampay matanggap ginan sa kanda kay kahuray burak ubasan.

³ Dapat bin-ul nida ti panawuhun, kanda binakul bag-u pinauli ud may dara.

⁴ Tuhay maan pag panawuhun ti sinugu may apu ubasan tabug sa kay manga manugtarabahu. Dapat ay kanda maan binakul sa ulu, kanda minuransa waya.

⁵ Tuhay maan pag panawuhun ti sinugu may apu ubasan. Dapat kanda minatay tunda. Nagsugu waya maan siya mayamu panawuhun, ti iba kanda binakul, ti iba kanda minatay.

⁶ Usa wadi ti nasawad sa may apu ubasan, kay ngani pagmayadun pag anak lalaki. Imaw kay sinugu niya sa katapusan atag sa kanda. Magkun siya, ‘Pihu galangun nida kang anak.’

⁷ Dapat ay nanharampangan tunda pag manga manugtarabahu magkun, ‘Inda aban ti mumana ubasan. Abala kamu, kanta yi matyun hampay kanta yi apuun kay ama pamana.’

⁸ Nakan kanda dinakup siya kanda minatay bag-u ayinmut atag sa luwas ubasan.

⁹ “Hintay nguna ti buwatun may apu ubasan? Atihan niya hampay tunda pag manga manugtarabahu kay matyun bag-u iintirga maan sa manga iba kay ubasan.

¹⁰ Unman aw nabasa niyu sa Banal Kasuratan magkun, ‘Ti batu dinayu manga manugbuwat balay, imaw ngap ti binwat mahalaga pag kalap.

¹¹ Panginuun ti may buwat inda. Tutuu gid makadululaw sa kanta magbantay.’ ”

¹² Alam manga takinan Hudiyu kuntay sida yi ti pagpatamaan pahalimbawa ni Hisus. Nakan naghanap sida paraan hampay madakup siya dapat nadala sida sa kayamuan tawu. Nakan siya kanda yi lang pinatawasan.

Tungkul sa Pagbayad Buhis

¹³ Bag-u kanda sinugu atag sa kan Hisus manga Parisiyu hanggan manga napakampi sa kan Hirudis hampay pasalanun siya sa kay bagaw.

¹⁴ Nag-ati sida sa kan Hisus bag-u kanda sinabi sa kanya, “Maisturu, alam nimi kawu matinupadun. Unman kawu magkadala una sa kantapu pag tawu dahil kawu balaw may pag-apihun. Alam nimi pag-itudlu nimu ti buu katutuuhanan hampay pagtupadun manga tawu ti kagustuhan Diyus. Angay aw nguna sa Kasuguan Diyus nu bumuhis ti tawu sa Pangulu Hari aw ngatay unman? Ngatay kailangan mamuhis kami, aw ngatay unman?”

¹⁵ Dapat alam di ni Hisus kanda magpabalhinguun, nakan nagsabi siya sa kanda, “Hayga aku kanyu pagsubukan? Anti kanyu dinaryu.”

¹⁶ Binulwat ngani nida. Bag-u sinabi ni Hisus sa kanda, “Kantapu pag uyahun ti mapalatan sa inda pag kuwarta, kantapu pag ngaran ti ipinirma?” Ag sinabi nida sa kanya, “Sa Pangulu Hari duy inda.”

¹⁷ Bag-u magkun si Hisus, “Nakan ngani ipakaun lang sa Pangulu Hari ti para sa kanya. Dapat ay ipakaun niyu sa Diyus ti para sa Diyus.” Pagka nadnugan nida kay sagut ni Hisus, naglingut gid masyadu sida sa kanya.

Tungkul sa Pagkabuhi Uman

¹⁸ May manga Sadusiyu nagpakarani sa kan Hisus. Kanda paniwala basta namatay yi ti tawu balaw yi mabuhi uman. Magkun sida sa kan Hisus,

¹⁹ “Maisturu, nagsurat si Muysis bilin sa kanta magkun, ‘Ti magtar-ari lalaki nu ti usa mamatay natayak kay asawa babayi dapat unman may anak, kay patar-ari kailangan mag-asawa sa buranday hampay may anak sida imaw ti makamana sa kay pinagkagurang kayamanan.’

²⁰ Kaybi may pitu ka magtar-ari lalaki. Nag-asawa ti panganay. Pagka dugay namatay siya unman may anak.

²¹ Nag-asawa maan sa buranday ti ikadwa. Pagka dugay namatay waydi unman may anak. Katunda waydi ti nangyari sa ikatlu,

²² hanggan sa ikapitu. Kada usa nag-asawa sa babayi. Namatay sida ud nagkaanak. Pagka tabu namatay ti pitu ka lalaki hanggan kay babayi namatay diman waydi.

²³ Nu sa pagkabuhi uman aban kantapu asawa ti babayi? Kabay inasawa niya tunda pag pitu ka lalaki.”

²⁴ Sinabi ni Hisus sa kanda, “Unman gid duy tama kanyu pagbagawun, dahil unman niyu magkasalman ti Banal Kasuratan una kay kapangyarihan Diyus.

²⁵ Dahil nu sa pagkabuhi uman ti manga tawu udyi umasawa, udyi paasawan-un. Parihu yi sida sa manga anghil sa langit.

²⁶ Tungkul bay sa pagkabuhi uman manga namatay, unman aw magkabasa niyu sa ribru ni Muysis tungkul sa kayu minaktan apuy. Ati kabay nagsabi ti Diyus sa kanya magkun, ‘Aku ti Diyus ni Abraham, Diyus ni Isaak, Diyus ni Hakub.’

²⁷ Ti Diyus balaw Diyus manga namatay nu unman Diyus ngap manga tawu may buhi. Ungud duy balaw yi tama ti kanyu pagsabihun.”

Ti Pinakamahalaga pag Sugu

²⁸ Siyun diman ti usa ka manugtudlu Kasuguan. Nadnugan niya kanda magdiribatihan. Nasaydan niya mahusay kay nagsagut ni Hisus sa manga Sadusiyu. Nakan ngani nagpakarani siya sa kan Hisus nagpaingana magkun, “Hintay duy pag sugu ti pinakamahalaga?”

²⁹ Kay sagut ni Hisus magkun, “Inda ti pinakamahalaga pag sugu magkun, ‘Pagpatingi kamu pag nasyun Israil. Ti Panginuun imaw yi kanta Diyus. Siya yi lang gid ti Panginuun.

³⁰ Ilubus nimu kanmu tagipusuun, kanmu karadwa, kanmu pag-iisip hanggan kanmu kabisugan sa kanmu pagmahal sa kanmu Panginuun Diyus.’

³¹ Bag-u inda pag sugu kay pangadwa, ‘Mahala nimu kanmu kaparihu tawu ga kanmu diman magmahal sa kanmu sadili.’ Udyi may iba sugu mahalaga man sa sitay.”

³² Magkun ti manugtudlu Kasuguan, “Tama duy, Maisturu. Tutuu gid kanmu sinabi. Usa-usa di gid ti Diyus, udyi may iba nu ud siya lang.

³³ Nu ilubus tawu kay tagipusuun, kay pag-iisip hanggan kay kabisugan sa kay pagmahal sa Panginuun ag nu ti tawu may pagmahal sa kay kaparihu tawu ga kay diman pagmahal sa kay sadili, tunda subra man mahalaga sa tanan hayup pagsunugun handug sa Panginuun hanggan sa iba waya manga handug sa Diyus.”

³⁴ Nadnugan ni Hisus mayad kay sagut manugtudlu Kasuguan, nakan magkun siya, “Arani yi kawu mipaminsan sa manga tawu pagharian Diyus.” Tunda di ginan udyi may nakabaya nakapaingana sa kanya.

Kay Paingana ni Hisus tungkul sa kay Linahi ni Dabid

³⁵ Nagtudlu si Hisus sa manga tawu ati sa Balay Diyus. Magkun siya, “Kabitay pag masabi manga manugtudlu Kasuguan linahi ni Dabid ti Pinili Diyus Manugribri pag Hari?

³⁶ Inudyukan Ispiritu Banal si Dabid nakan sinabi niya magkun, ‘Sinabi Panginuun sa kang Panginuun, Pagtukaw kawu sitay baliwa sa kang sikun, Pagpaminsan sa kang karampatan hanggan sa udwaya mabuwat niku kanmu manga kalaban ga tarat-an lang nimu manga lulud.’

³⁷ Si Dabid yi waydi ti nag-ingaran sa Pinili Diyus Manugribri pag Hari magkun, ‘Panginuun.’ Nu katida kabitay pag masabi ti Pinili Diyus Manugribri pag Hari kay linahi ni Dabid?” Magbaya gid ti manga tawu magpatingi sa kan Hisus manga adal.

Pat-ama Laban sa manga Manugtudlu Kasuguan

³⁸ Nanudlu maan si Hisus sa manga tawu magkun, “Pag-aman kamu sa manga manugtudlu Kasuguan, magkaibug mamasyar sadsad kay rutay, masulungun sida paggalangun, magpabaya-baya sa manga luwas balay. Kanda gustu tumukaw sa tukawan ihinanda sa may kangaranan.

³⁹ Sa simbahan manga Hudiyu ngatay sa manga karan-an kanda gustu makatukaw gid sa marinu pag tukawan.

⁴⁰ Pagtabuhun nida ti kasiyunan manga buranday, dapat magpadayaw-dayaw diman sa kanda magdarangin araba. Lalu waya mabuyat aban pag parusa sa kanda.”

Kay Pakaun Babayi Buranday

⁴¹ Pagka ati sa Balay Diyus, tinmukaw si Hisus sa arani sukadan kuwarta pakaun sa Panginuun. Binantayan niya ti manga tawu magsukad kuwarta. Mayamu diman manga mayaman ti nagsukad daka pag kuwarta.

⁴² Nagpakarani diman waydi ti babayi buranday nagsukad duwa ka singku, kay halaga usa ka diyis.

⁴³ Tinawag ni Hisus kay manga tuludluan kay sinabi, “Ungud duy kang pagsabihun sa kanyu, ti pugri pag buranday nagpakaun subra man sa kanda tanan pag pakaun.

⁴⁴ Dahil ti iba nagpakaun kay lang baliw udyi kailanganun nida. Dapat inda pag pugri buranday itinabu ipinakaun kay pamili.”