Markus 11 - Hanunuu

Nagras-ug si Hisus sa Hirusalim

¹ Pagka dugay arani yi sida ni Hisus sa banwa Hirusalim. Pagka nagras-ug yi sida sa baryu Bitpagi ag sa baryu Bitanya, sugkad Bantud Ulibu, sinugu ni Hisus kay duwa ka tuludluan magkun,

² “Pag-ati kamu sa usa waya ka baryu. Nu kamu magsulud yi sa baryu sab, susun makakit kamu anak asnu mahigtan, udwaya sinakyan tawu. Lubada niyu tunda, daran-a sitay tag.

³ Nu may pumaingana sa kanyu magkun, ‘Hayga duy paglubadun niyu tunda?’ Kaindaay duy kanyu sabihun, ‘Pagkailanganun duy Panginuun, balaw dugay iuli maan sitay tag.’ ”

⁴ Linmakaw yi ngani sida bag-u nakitan nida ti anak asnu sa saruy dalan, mahigtan sa may sabian balay. Kanda yi ngani linbadan.

⁵ May manga matindugan siyun magpaingana sa kanda, “Hintay tunda? Hayga duy paglubadun niyu ti anak asnu?”

⁶ Nagsagut ti manga tuludluan angay sa kay itinudlu ni Hisus sa kanda, bag-u pinahintulutan ngani sida.

⁷ Bag-u dinara nida ti anak asnu sa kan Hisus. Pagka ati, ahinampilu nida kanda manga rutay sa asnu bag-u sinmakay si Hisus.

⁸ Sinagmakan manga tawu rutay ti dalan. Ti iba nagbuul labung kayu ginan sa may tanman, bag-u kanda ilinatag sa dalan.

⁹ Ti manga tawu mag-una sa kan Hisus ag ti manga sa uryan nanarawagan magkun, “Pagdayawun ti Diyus. Papaladan Diyus ti magsitay sa ngaran Panginuun.

¹⁰ Papaladan Diyus ti humari maan sa kaharian nita ginurang, ni Dabid. Pagdayawun ti Diyus sa langit.”

¹¹ Pagka nagras-ug si Hisus sa Hirusalim, sinmaka siya sa Balay Diyus. Binantayan niya ti tanan manga pagbuwatun tawu ati. Malambung yi ati, nakan nag-atag si Hisus hanggan kay sampulu may duwa ka tuludluan tabug sa baryu Bitanya.

¹² Pagka sa surip, linmakaw dapu maan sida ginan sa Bitanya. Linun-us si Hisus sa dalan.

¹³ Pagka nakitan niya sa un-an may puun igus may manga labung, kay dinuawan nu ngatay may burak. Dapat ay pagka nagpakarani siya ud may nakitan siya burak nu ud manga labung lang. Dahil balaw udas pamurakun manga igus.

¹⁴ Bag-u sinabi ni Hisus sa puun igus, magkun, “Kainda ginan danga yi may makakaun kanmu burak hanggan aban.” Nadnugan diman niya manga tuludluan kay binagaw tunda.

Rinayawan ti Balay Diyus

¹⁵ Pagka rinmas-ug sida sa Hirusalim, nagsaka si Hisus sa Balay Diyus. Bag-u tinulak niya sa karagasyun ti manga magpabili manga magbili ginan sa sulud Balay Diyus. Linikwang niya ti manga burugtangan kuwarta manga manugbalyu hanggan ti manga tukawan manga manugtinda kalampati.

¹⁶ Unman pinayagan niya ti tawu lumapus lakaw sa sulud Balay Diyus may dara manga bab-an.

¹⁷ Bag-u nanudlu siya sa manga tawu magkun, “Unman aw nisurat sa Banal Kasuratan magkun, ‘Kang balay ingarnan balay dararanginan tanan manga nasyun.’ Dapat binwat ngap niyu paratag-an manga mananakaw.”

¹⁸ Nadnugan diman tunda manga pangulu manughandug hanggan manga manugtudlu Kasuguan. Siyun ginan naghanap sida paraan hampay kanda ipamatay si Hisus. Magkadala sida sa kanya dahil ti tanan tawu nadulaw sa kay adal.

¹⁹ Pagka yabi yi nagluwas maan sa banwa sida ni Hisus.

Nu may Pagsarig ti Tawu

²⁰ Sa maglakaw nida ni Hisus sa surip, nakitan nida ti puun igus nalayung yi ginan sa kay gamut hanggan tugka sa kay suru.

²¹ Naisipan ni Pidru ti nangyari nakan sinabi niya sa kan Hisus magkun, “Malu duy Maisturu, nalayung yi maaw ti puun igus kanmu sinaadan kaaldaw.”

²² Sinabi ni Hisus magkun, “Pagsarig kamu sa Diyus.

²³ Ungud duy kang pagsabihun sa kanyu, nu abi may magsabi sa bantud inda, ‘Pag-ighit yi kawu, ati kawu pag kipadna sa dagat’, pihu mangyari tunda nu unman siya mag-alinlangan sa kay tagipusuun, nu magsarig siya kuntay mitupad kay pagbagawun.

²⁴ “Nakan ngani kang pagsabihun sa kanyu, una hintay kanyu hagadun sa kanyu magdarangin, pihu mangyari sa kanyu nu kamu magsarig kuntay natupad tunda sa kanyu.

²⁵ Nu kamu magdarangin bag-u nu may pag-ikadaut kamu sa iba, patawadun dapu niyu siya hampay kamu patawadun waydi niyu Ama sa langit nu kamu nagkasala sa kanya.

²⁶ Dapat nu unman pagpatawadun niyu ti manga tawu, dayu waydi kamu patawadun niyu Ama sa langit.”

Ti Karampatan ni Hisus

²⁷ Nag-ati maan sida ni Hisus sa Hirusalim. Pagka si Hisus maglakaw-lakaw sa sulud Balay Diyus, nagpakarani sa kanya ti manga pangulu manughandug, ti manga manugtudlu Kasuguan hanggan ti manga paggurangunun manga Hudiyu.

²⁸ Sinabi nida sa kanya, “Naan ginan kanmu karampatan? Hintay ti may pakaun karampatan sa kanmu nakan kanmu pagbuwatun inda pag manga bagay?”

²⁹ Sinmagut si Hisus magkun, “Paingan-un waydi niku kamu usa ka paingana. Nu kanyu sabihun sa kangku, sabihun diman waydi niku sa kanyu nu naan ginan kang karampatan hampay mabuwat niku inda pag manga bagay.

³⁰ Ti tulbaw ni Huwan ngatay ginan sa Diyus, aw ngatay ginan sa tawu? Kamu pagsagut.”

³¹ Nagharampangan dapu sida magkun, “Nu sabihun nita, ginan sa Diyus, sabihun niya sa kanta, bati hayga unman naniwala kamu sa kanya?

³² Sabihun aw nguna nita, ginan sa manga tawu?” Magkadala sida barang nu hintay ti buwatun manga tawu sa kanda, dahil nakilala tanan tawu si Huwan purupita.

³³ Nakan nagsagut sida sa kan Hisus magkun, “Unman duy nimi alam.” Sinabi diman ni Hisus sa kanda magkun, “Unman diman sabihun niku sa kanyu nu naan ginan kang karampatan hampay mabuwat niku inda pag manga bagay.”