Markus 1 - Hanunuu

Kay Pagtudlu ni Huwan Manugtulbaw

¹ Inda ti Mayad pag Barita ni Hisu-Kiristu kay Anak Diyus.

² Isinurat sa ribru ni Purupita Isayas magkun, “Inda yi kang suruguun kang ipauna sa kanmu, Siya yi tig-alistu kanmu dalan.

³ May magtawag sa pangawakawaan magkun, Ialistu niyu ti dalan Panginuun, Tadlunga ti dalan kay lakawan.”

⁴ Nakan ngani rinmas-ug si Huwan manugtulbaw sa pangawakawaan. Nanudlu siya sa manga tawu magkun, “Pag-ampu yi kamu sa kanyu manga kasalanan ag pagpatulbaw yi bag-u patawadun yi Diyus kanyu manga kasalanan.”

⁵ Naglinuwang ti manga tawu ginan sa kabuuhan daga Hudiya hanggan ginan sa banwa Hirusalim, nag-ati sida tag sa kan Huwan. Itinulbaw sida ni Huwan sa sapa Hurdan, isinabi nida kanda tanan kasalanan.

⁶ Si Huwan may sulung rutay bulbul kamilyu, may hawud paknul. Kay karan-unun manga apan, manga daykut putyukan.

⁷ Nanudlu siya magkun, “Dumasun sa kang uryan ti lalu makamaskihan sa kangku. Unman aku may karampatan magyungdu maglubad kay higut niya manga lapak.

⁸ Aku magtulbaw ngani sa kanyu sa danum. Siya bay tumulbaw sa kanyu sa Ispiritu Banal.”

Itinulbaw si Hisus

⁹ Ati katpung nagluwang si Hisus ginan sa Nasarit sa sakup Galiliya bag-u itinulbaw siya ni Huwan sa Hurdan.

¹⁰ Pagka napatakas si Hisus ginan sa danum, kadaka nakitan niya nabukasan ti langit ag ti Ispiritu ga histuda kalampati nagpakababa atag sa kanya.

¹¹ May nagbagaw ginan sa langit magkun, “Kawu kang pagmayadun pag Anak, sa kanmu aku lubus pag magbaya.”

Pagtuksuhun mana si Hisus

¹² Bag-u nagsugu ti Ispiritu Banal sa kan Hisus tabug sa pangawakawaan.

¹³ Ati siya sa pangawakawaan sa sulud upatpulu ka sirang, pagtuksuhun mana ni Satanas. Nangulian si Hisus sa basad masimarun hayup. Dapat inalagaan siya manga anghil.

Nag-umpisa si Hisus Nanudlu

¹⁴ Pagka dinakup si Huwan, nag-ati maan si Hisus tag sa Galiliya, kay itinudlu ti Mayad pag Barita Diyus magkun,

¹⁵ “Natupad yi ti kaudasan, udyi dugay rumas-ug yi kay paghari Diyus. Iampu yi niyu kanyu kasalanan, pagpaniwala sa Mayad pag Barita.”

Pinili ni Hisus ti Upat ka Manug-isda hampay Kay Tuludluan

¹⁶ Sa kay maglakaw ni Hisus sa saruy danaw Galiliya, nakitan niya si Simun hanggan kay patar-ari si Andiris. Pag-itaplak nida kanda sarap sa danaw, dahil manga manug-isda sida.

¹⁷ Sinabi ni Hisus sa kanda, “Pagkuyug duy kamu sa kangku ag buwatun niku kamu manga manugtaban yi sa manga tawu.”

¹⁸ Kadaka tinayakan nida kanda manga sarap, bag-u nagkuyug sida sa kan Hisus.

¹⁹ Sa kay maglakaw maan ni Hisus balaw arayu, may nakitan siya duwa maan magtar-ari, si Santiyagu hanggan si Huwan kay manga anak ni Sibidiyu. Sa duunduun sida, pagputikan nida kanda manga sarap.

²⁰ Kadaka tinawagan niya sida bag-u kanda tinayakan sa duunduun kanda ama si Sibidiyu hanggan ti manga suruguun suruhulan bag-u nagkuyug ngani sida sa kan Hisus.

Ti Tawu Inapuan Labang

²¹ Pagka rinmas-ug sida ni Hisus ati sa Kapirnaum pag banwa, nagsaka si Hisus sa simbahan manga Hudiyu sa Sirang Pamahari ag nanudlu sa manga tawu.

²² Naglingut ti manga tawu sa kay tudlu, dahil nanudlu siya sa kanda bilang may karampatan, balaw parihu sa manga manugtudlu Kasuguan.

²³ Sa kanda simbahan manga Hudiyu may usa ka tawu inapuan labang. Nagringgit siya

²⁴ magkun, “Hintay kanmu pakialam sa kanmi, Hisus taga Nasarit? Nakan aw kawu nagsitay hampay kami kanmu wasakun? Nakilala kawu niku, kawu yi gid ti Banal pag sugu ginan sa Diyus.”

²⁵ Sinungyaw ni Hisus ti labang magkun, “Danga mag-ingay, pagluwas yi kawu ginan sa kanya.”

²⁶ Dapat pinatigbak waya labang ti tawu, namagrit daka bag-u nagluwas ti labang ginan sa kanya.

²⁷ Nadulaw gid ti manga tawu tanan-tanan namaraingan-an magkun, “Hintay nguna inda? Usa ka bag-u pag tudlu inda. May kamaskihan siya magsugu una sa manga labang, magpaniwala gid sida sa kanya.”

²⁸ Kadaka nibantug ti barita tungkul sa kan Hisus sa kabuuhan daga Galiliya.

Pinaayad ni Hisus kan Pidru Manugang Babayi

²⁹ Pagka sida ni Hisus ginan sa simbahan manga Hudiyu, sinmaka sida sa balay nida ni Simun ni Andiris, kuyug hanggan sida ni Santiyagu ni Huwan.

³⁰ Maigyaan pagramigan kay manugang babayi ni Simun. Nakan naghampang sida sa kan Hisus tungkul sa kanya.

³¹ Dinulud ni Hisus ti babayi kay hiniyaptan sa kamang bag-u kay binangun. Rargu nahumpawan yi kay ramig. Bag-u nangapuy yi siya kanda karan-unun.

Pinaayad ni Hisus ti Mayamu Tawu

³² Tunda pag malambung, pagka nisalup yi ti init dinara manga tawu tag sa kan Hisus ti tanan may manga sakit hanggan ti manga inapuan labang.

³³ Ti tanan tawu banwa nagtipun sa sugkadan balay.

³⁴ Nagpaayad si Hisus sa mayamu pag tawu may mag-adnugan tuhay-tuhay pag sakit, mayamu diman pag manga labang kay ipinalwas ginan sa manga tawu. Unman pinahintulutan niya ti manga labang magbagaw, dahil nakilala nida siya.

Magtudlu si Hisus sa Galiliya

³⁵ Nagbangun si Hisus abasad waya ti yabi, nagluwas siya sa balay, nag-atag sa rugar pangawakawaan tawu hampay magdarangin.

³⁶ Pagka dugay inusig siya nida ni Simun.

³⁷ Pagka kanda nakitan siya, magkun sida sa kanya, “Ti tanan pag manga tawu maghanap yi sa kanmu.”

³⁸ Sinabi ni Hisus sa kanda, “Pag-ati yi duy kita sa manga banwa, sa manga baryu sitay sa kanta palibut hampay aku magtudlu diman ati. Dahil imaw kang turunu nakan aku nagsitay.”

³⁹ Nag-ati si Hisus sa tanan rugar sa kabuuhan daga Galiliya, nanudlu siya sa manga tawu sa simbahanan manga Hudiyu, ag ipinalwas niya ti manga labang.

Pinaayad ni Hisus ti Usa ka Tawu may Dilikadu pag Sakit sa Lukub

⁴⁰ Nagpakarani sa kan Hisus ti usa ka tawu may dilikadu pag sakit sa lukub, linmuhud sa kay atubangan bag-u nagpakihampang sa kanya magkun, “Duy nu gustu nimu, mapaayad nimu aku sa kang dilikadu pag sakit sa lukub hampay malumpiyu yi aku.”

⁴¹ Kinaawaan ni Hisus ti tawu, nakan kay kinup-an kamang magkun sa kanya, “Gustu ngani niku duy. Pagmaayadan yi kawu sa kanmu sakit sa lukub.”

⁴² Kadaka siya nabul-an sakit sa lukub, naayadan yi siya.

⁴³ Binilinan siya ni Hisus mayad-mayad magkun,

⁴⁴ “Danga pagsabiha nimu inda una sa kantapu pag tawu. Pag-atag kawu pagpakakit sa manughandug. Bag-u paghandug kawu sa Diyus usa ka hayup minatay angay sa kay ibinilin ni Muysis, bilang usa ka puruyba sa manga tawu nag-ayad yi kawu.”

⁴⁵ Dapat ay pagka siya linmakaw yi, lalu ngap niya itinultul sa mayamu pag tawu nu kabitay siya pag pinaayad ni Hisus. Nakan unman yi makasulud si Hisus sa banwa, ati lang siya sa luwas banwa sa manga rugar pangawakawaan tawu. Nag-ati diman ti manga tawu sa kan Hisus una ginan sa arayu una ginan sa arani.