Manugtudlu 9 - Hanunuu

¹ Pag-isip-isipun mayad niku ti tanan bagay ag naalaman niku sa sirung Diyus ti matadlung ag ti madunung, hanggan yi kanda manga pagbuwatun. Dapat unman nida alam nu pagmahal aw ngatay galit kanda patabgan.

² Parihu lang ti ras-ugan tanan kalasi tawu — ti matadlung ag ti magkagalit, ti mayad ag ti daut, ti malumpiyu ag ti mayagting, ag ti maghandug ag ti unman maghandug. Parihu lang ti mayad pag tawu ag ti makasalanan, ag parihu lang ti magsumpa ag ti unman magsumpa.

³ Imaw inda ti unman mayad sa tanan pag magpangyari sa kalibutan: parihu lang ti ras-ugan tanan. Balaw lang inda, nu unman lunsay lang kadautan ag kalukuhan ti pag-isip-isipun tawu habang magkabuhi siya; ag sa uryan mamatay diman siya.

⁴ Habang buhi ti tawu, may pag-asa. May sarabihun, “Mas mayad waya ti buhi pag idu kaysa namatay liyun.”

⁵ Ag alam nida mamatay sida. Dapat ti namatay unman yi may alam. Udyi hanggan may matanggap pirimyu ag kalimtan yi.

⁶ Ti kanda pagmahal, galit ag marahirak nadura yi. Udyi sida may labut tugka aban sa tanan pag magpangyari sitay sa kalibutan.

⁷ Sigi, pagkaun kawu ag pag-inum intus pag may kabayaan, dahil ipinahintulut yi Diyus kaybi di waya inda kanmu buwatun.

⁸ Pag may kabayaan ag pagmasulung kawu pirmi.

⁹ Pagmasulung kawu kaibahan kanmu pagmahalun pag asawa, sa buu nimu buhi unman may pulus ti ipinakaun Diyus sa kanmu sitay sa kalibutan. Nakan para inda sa kanmu, sa kanmu magpangabudlay sitay sa kalibutan.

¹⁰ Buwata nimu buu kabisugan kanmu pagbuwatun, dahil ati sa ulian manga namatay, nu naan kawu tabug, unman yi may tarabahu. Udyi may manga paggayakun ati, ag unman diman may kadunungan ag kaalaman.

¹¹ May nakitan waya gid aku sitay sa kalibutan: Unman tanan mabisug magpalagiw magpanalu sa lalagsan, ag balaw tanan mabisug magpanalu sa labanan. Unman tanan madunung makakit karabuhian, unman tanan madunung magyaman, ag unman tanan may kakayahan magpanalu. Nakan magras-ug sa kada tawu kanya aratubangun.

¹² Balaw lang inda, nu unman niya alam nu kapira pag rumas-ug kay kaudasan. Parihu siya sa manuk nasduk ngatay sa isda nasarap; magkatakdan siya balaw mayad pag udas ag kadaka lang magras-ug sa kanya.

Mas Mayad ti Kadunungan kaysa Unman may Intindi

¹³ Nakitan diman niku sitay sa kalibutan ti usa ka mustara kadunungan kang pagkaibgan.

¹⁴ May usa ka diit pag banwa, ag pira-pira lang kay manga nasakupan inda. Dinugma inda usa ka makapangyarihan pag hari kaibahan kay manga sundalu. Nagbuwat sida daraka pag pandaut alad batu, ag rargu ginira nida ti banwa.

¹⁵ Sa tunda pag banwa may usa ka lalaki madunung dapat pugri siya. Mahimu mana niya iribri ti banwa sa panab-anan niya kadunungan dapat unman may nakaimatuun sa kanya.

¹⁶ Magkun aku mas mayad ti kadunungan kaysa kapangyarihan, dapat ti kadunungan usa ka tawu pugri unman pagpakan-an halaga ag kay manga pagsabihun unman pagpansinun.

¹⁷ Mas mayad waya mamatingi sa matugway pag bagaw madunung pag tawu kaysa mamatingi sa ringgit unman may intindi pag takinan.

¹⁸ Ti kadunungan mas mayad waya kaysa manga armas sa girahan. Dapat ti usa ka makasalanan makadaut mayamu kaayadan.