Manugtudlu 8 - Hanunuu

¹ Si unu ti madunung pag tawu? Si unu ti madunung magpaliwanag manga bagay? Ti kadunungan tawu makapasulung sa uyahun, ag makapadura arimputu.

Sunda ti Hari

² Sunda ti sugu hari dahil itinaratu nimu sa Diyus buwatun inda.

³ Danga pagpabay-ani kanmu katungkulan sa hari, ag danga kawu magkuyug sa manga maggayak daut laban sa kanya, dahil mabuwat hari una hintay kay gustu.

⁴ Makapangyarihan ti sugu hari, ag unman may makalaban sa kanya.

⁵ Una si unu ti magsunud sa kay sugu balaw maunu. Ti madunung pag tawu alam nu kapira ag nu kabitay niya buwatun ti usa ka bagay.

⁶ Dahil ti kada bagay may kang-ud pag udas ag paraan sa pagbuwat inda una mayamu pag manga kakurian ti pag-atubangun tawu.

⁷ Dahil unman may tawu nakaalam sa aratubangun, unman may makasabi una si unu nu hintay ti mangyari.

⁸ Nu kabitay unman maampara tawu ti durus, unman diman niya maampara kay kamatayan. Parihu inda sa girahan unman siya makapalagiw. Ag kay kadautan unman gid makaribri sa kanya sa kamatayan.

⁹ Binantayan niku ti tanan bagay magpangyari sitay sa kalibutan, nakitan niku ti manga tawu may kapangyarihan manakit sa kay kaparihu.

¹⁰ Nakitan diman niku ilinbung ti daut pag manga tawu. Inda sida pirmi magsulud kaybi sa Balay Diyus. Ag siyun gid pag rugar sa banwa Hirusalim nu naan sida pag magbuwat kadautan ag pagdayawun sida manga tawu. Unman diman inda may pulus.

¹¹ Nu ti tawu nagsalan balaw rargu sinintinsiyahan, ti iba mag-isip diman bumwat kasalanan.

¹² Una makabwat mayamu pag kasalanan ti tawu, mahimu mabuhi diman siya dugay. Dapat alam niku mayad ti patabgan tawu maggalang sa Diyus,

¹³ ag daut ti patabgan tawu balaw maggalang sa Diyus, ag balaw dumugay kay buhi nu unman bumaliw inda parihu sa aninu madali lang malyam.

¹⁴ Ti makuri lang sitay sa kalibutan, nu kas-a ti matadlung pag manga tawu imaw ti magtanggap parusa para mana sa manga daut, ag ti daut pag manga tawu imaw ti magtanggap pirimyu para mana sa manga matadlung. Inda hanggan unman diman may pulus.

¹⁵ Nakan para sa kangku, mas mayad waya sa tawu ti pagbaya siya sa kay buhi. Unman may iba mayad sa kanya sitay sa kalibutan nu unman ti mangaun, manginum ag manbaya habang magtarabahu siya sa buu buhi ipinakaun Diyus sa kanya sitay sa kalibutan.

¹⁶ Sirang yabi unman aku magkaturug pagsikapun niku makab-ul kadunungan hampay masalman niku ti manga magpangyari sa kalibutan.

¹⁷ Nakitan niku ti tanan manga pagbuwatun Diyus sitay sa kalibutan, ag unman gid may tawu makasalum inda. Una waya kabitay kay paghingabut tawu masalman inda, unman niya inda masalman. Una sumabi waya ti madunung pag tawu nasalman niya, kay tutuu unman gid niya inda masalman.