Manugtudlu 7 - Hanunuu

Manga Paanyu sa Buhi

¹ Nu kabitay ti mayad pag ngaran mas mayad kaysa mahalaga pag pamanglu, katunda diman ti sirang kamatayan mas mayad kaysa sirang paglusad.

² Mas mayad waya umatag sa balay may magpanruku sa namatay kaysa mangatag sa balay may karan-an, dahil kamatayan diman ti patabgan tanan. Kailangan pirmi isipun inda kada usa.

³ Ti karukuan mas mayad waya kaysa kabayaan dahil ti karukuan makapatadlung sa buhi tawu.

⁴ Ti madunung pag tawu mag-isip pirmi tungkul sa kamatayan, dapat ti unman may intindi pag tawu mag-isip pirmi tungkul sa kabayaan.

⁵ Mas mayad waya mamatingi kawu sa sungyaw madunung pag tawu kaysa mamatingi kawu sa pagdayaw unman may intindi pag tawu.

⁶ Ti paarak-ak unman may intindi pag tawu parihu sa manga dugi magbuti sa apuy. Unman inda may pulus.

⁷ Pihu bumaliw parihu sa unman may intindi ti madunung pag tawu nu mandaya siya. Nu mananggap kawu lamisada pagdautun lang nimu kanmu kagalangan.

⁸ Mas mayad waya ti katapusan usa ka bagay kaysa umpisa inda. Ti matiniisun mas mayad waya kaysa marapalabaw.

⁹ Danga kawu magdaldali magkagalit, dahil ti pangagalit imaw ti buruwatun unman may intindi pag tawu.

¹⁰ Danga kawu magpaingana, “Hayga mas mayad kaybi kaysa taynguna?” Dahil balaw inda kang-ud pag paingana.

^11-12 Ti kadunungan mayad pag bagay parihu sa usa ka mana, parihu inda makaawat gid inda sa manga magkabuhi sitay sa kalibutan. Magpakaun diman inda parihu sa kuwarta. Dapat tuhay waya siyun, mag-alaga inda sa kay buhi.

¹³ Isip-isipa nimu nu hintay ti binuwat Diyus. Si unu lugud ti makatul-id sa kay tinipluk?

¹⁴ Nu mayad kanmu kahamtangan, pagbaya kawu. Dapat nu asan kawu sa kakurian, alalahana ti Diyus balaw lang magpakaun mayad pag kahamtangan nu unman kakurian diman. Nakan unman nita maalaman nu hintay ti mangyari sa aratubangun.

¹⁵ Sa inda pag buhi niku unman may pulus, nakitan niku inda tanan: ti manga matadlung nagkaramatay una matadlung kanda pagpangabuhi ag ti manga daut magkabuhi dugay una daut kanda pagpangabuhi.

¹⁶ Danga pagbaliwa kanmu sadili subra matadlung ngatay madunung. Nu buwatun nimu inda, pag-ipadamhak lang nimu kanmu sadili.

¹⁷ Danga diman kawu masyadu magpakadaut, ag danga kawu luku-luku. Nu buwatun nimu inda, mamatay kawu sa udwaya nimu kaudasan.

¹⁸ Danga kawu magpasyadu sa tunda pag manga bagay; kailangan sa karaw-an lang kawu, dahil ti maggalang sa Diyus unman magpasubra sa una hintay pag bagay.

¹⁹ Laun ti mabuwat kadunungan sa usa ka tawu kaysa mabwat sampulu ka takinan sa usa ka banwa.

²⁰ Unman gid may tawu sitay sa kalibutan ti pirmi magbuwat matadlung ag unman magsalan.

²¹ Danga pagpatingihi ti tanan pagsabihun tawu, dahil barang kanmu ngap suruguun ti masaydan nimu magbagaw laban sa kanmu.

²² Dahil alam nimu mayamu pag bisis yi pagpuyaan diman nimu ti iba.

²³ Pagpaabi-abihan niku intindihun ti tanan magpangyari sitay sa kalibutan sa panab-anan niku kadunungan. Nag-isip aku maintidihan niku, dapat unman maaw.

²⁴ Unman niku magkasalman ti manga magpangyari; makuri gid inda masalman. Unman gid may makasalum inda.

²⁵ Dapat parargu niku pag-adalan ag pag-usisaun, hampay matanggap niku ti kadunungan ag masagut kang manga paingana, ag hampay maalaman niku nu kabitay ka bagul ti tawu magbuwat daut ag nu kabitay ka daut ti naisipan tawu magbuwat kalukuhan.

²⁶ Nasalman niku ti babayi magtuksu mas mapait waya kaysa kamatayan. Kay pagmahal parihu sa suduk, ag kay manga kamang maghakus sa kanmu parihu sa tarikada. Makaaman sa kanya ti tawu mayad sa pamantay Diyus, dapat ti makasalanan masduk niya.

^27-28 Aku pag manugtudlu magsabi, “Pag-isip-isipun gid niku mayad ti kada bagay sa kang maghanap sagut sa kang manga paingana. Dapat unman waya gid niku magkasampakan kay manga sagut. Dapat imaw inda kang nakitan: sa 1,000 lalaki usa lang ti matadlung, dapat sa 1,000 babayi unman gid may matadlung.

²⁹ Tuhay waya siyun, naalaman niku binuwat Diyus ti tawu matadlung dapat ti tawu mayamu kay paggayakun balaw matadlung.”