Manugtudlu 6 - Hanunuu

¹ May nakitan waya gid aku unman mayad sitay sa kalibutan imaw ti magpabuyat sa tawu:

² May manga tawu pinakan-an Diyus sa tanan nida pagka ibgan: ikadayaw, kasiyunan ag tuhay waya pag kayamanan. Dapat unman sida pinahintulutan Diyus makakinabang sa inda nu unman ti iba tawu. Unman inda may pulus, ag unman gid mayad.

³ Kang masabi mas mayad waya ti usa ka lapsag iinanak tigbak kaysa tawu nabuhi ngani dugay ag nagkaanak mayamu, dapat unman nakalakaw kasulungan sa kay buhi ag ilinbung waya balaw mayad.

⁴ Una unman may pulus ti pagkalusad sa lapsag, ag una nag-atag siya sa rugar manga namatay nu naan unman yi siya maalaala waya,

⁵ ag una unman siya nakakit rayaw init ngatay nakaalam nu unu ti buhi, may kahusayan waya siya kaysa ati pag tawu

⁶ unman may kabayaan sa marinu pag bagay kay natanggap, una waya mabuhi ati pag tawu sa pira ka libu timpu. Unman aw lugud ti tanan parihu lang kay patabgan pag rugar?

⁷ Ti tawu magpangabudlay hampay may kan-un, dapat unman diman siya magkabayaan.

⁸ Nakan hintay nguna ti ilamang madunung pag tawu sa unman may intindi pag tawu? Hintay nguna pag kaayadan ti mab-ul pugri pag tawu una alam niya atubangun ti buhi?

⁹ Unman inda may pulus; ga parihu lang sa maglagas kawu durus. Nakan mas mayad waya pagbaya yi lang kawu nu hintay ti asan sa kanmu kaysa magpakahangad kawu manga bagay unman sa kanmu.

¹⁰ Itinagka yi Diyus ti tanan kaybi waya, ag naalaman yi niya nu bumaliw unu kita. Nakan unman kita makariklamu sa Diyus tungkul sa kanta kapaladun, dahil mas mabisug siya kaysa kanta.

¹¹ Nu pirmi kita magriklamu, magdugang waya gid kanta baragawun unman may pulus, ag unman inda makapakaun kaayadan sa kanta.

¹² Unman may nakaalam nu hintay gid ti mayad para sa tawu sa kay dag-ud ag unman may pulus pag buhi — maglawuy lang inda parihu sa aninu. Unman may makatultul sa kanya nu hintay ti mangyari sa kalibutan nu nighit yi siya siyun ginan.