Manugtudlu 5 - Hanunuu

Danga Harus-harus Magtaratu sa Diyus

¹ Pag-aman kawu sa kanmu pagbuwatun nu atag kawu sa Balay Diyus. Mas mayad umati kawu alistu sumunud sa Diyus, kaysa manhandug parihu sa handug usa ka unman may kabuluhan pag tawu unman alam nu hintay ti mayad ag ti daut.

² Danga kawu harus-harus magbagaw. Isip-isipa dapu kaayad bag-u kawu magtaratu sa Diyus. Tandai ti Diyus ati sa langit ag kawu bay inda sitay lang sa daga, nakan pag-aman kawu nu magbagaw.

³ Ti tagin-up burak mayamu irisipun. Habang magyamu kanmu pagsabihun, barang makabagaw kawu kalukuhan.

⁴ Nu mantaratu kawu sa Diyus, danga pagpadugaya, tupada gid inda. Tupada gid kanmu itinaratu sa kanya dahil unman siya magbaya sa manga unman may intindi, sa manga unman magtupad sa kanda taratu.

⁵ Mas mayad waya balaw yi lang kawu mantaratu kaysa mantaratu kawu unman lang diman waydi nimu tupadun.

⁶ Danga kawu magsalan sa kanmu baragawun, ag danga kawu magsabi sa manughandug ati sa Balay Diyus kuntay balaw nimu tinikis kanmu taratu sa Diyus. Dahil magalit ti Diyus nu sabihun nimu inda ag dautun niya kanmu binudlayan.

⁷ Ti masyadu pag panagin-up hanggan baragawun unman may pulus. Bagkus ngap, pagkadala kawu sa Diyus.

Ti Kayaman Unman may Pulus

⁸ Danga kawu magkadulaw nu makitan nimu pag-apihun ti manga pugri sa kanyu rugar, unman pagpakan-an katadlungan ag pagpuryahun kanda karampatan. Dahil ti takinan mag-api sa kanda pag-alagaan pinakaabwat waya pag takinan, ag inda pag duwa pag-alagaan waya gid lalu pinakaabwat pag takinan.

⁹ Dapat mas makalamang waya ti hari sa kita daga manga pugri kaysa kanda tanan pag manga takinan.

¹⁰ Una si unu ti maraibgun sa kuwarta ag sa tuhay waya pag kayamanan, balaw gid ikabaya. Inda unman diman may pulus.

¹¹ Nu magdugang kanmu kayamanan, magyamu diman ti magtabu inda, ag unman kawu may pakinabangun sa kanmu kayamanan nu unman bantayan lang nimu inda.

¹² Hamuuk ti turug usa ka manugtarabahu, mayamu man ngatay pira-pira kay karan-unun; dapat ti mayaman, madi aduk kay kayamanan, unman makaturug mayad.

¹³ May nakitan aku unman gid mayad sitay sa kalibutan: Ti kayamanan natipun tawu makapadamhak sa kanya

¹⁴ ngatay madura inda sa unman mayad pag nigusyu, ag unman yi may masawad para sa kay manga anak.

¹⁵ Inanak kita unman may dara, ag mamatay kita unman diman may dara. Unman gid kita may madara sa kanta manga binudlayan.

¹⁶ Unman gid inda mayad! Mamatay kita unman may dara parihu sa kanta paglusad. Nakan hintay ti mab-ul nita sa kanta magpangabudlay unman diman waydi may pulus?

¹⁷ Kanta buhi lunsay kakurian, kaguluhan, panakitun ag pangagalit.

¹⁸ Nakan naisip niku ti pinakamayad buwatun tawu sa kay dag-ud pag buhi ipinakaun Diyus sa kanya imaw ti pagkaun, pag-inum ag pagpakasulung sa kay binudlayan sitay sa kalibutan, dahil para diman waydi inda sa kanya.

¹⁹ Pinakan-an Diyus ti tawu manga kasiyunan ag tuhay waya pag kayamanan, ag pinahintulutan niya siya kuminabang inda, hampay matanggap niya ti para sa kanya ag manpakasulung siya sa kay binudlayan. Pakaun inda Diyus sa kanya.

²⁰ Ag dahil pagpasulungun pirmi Diyus ti tawu, udyi siya mag-alala sa dag-ud niya buhi.