Manugtudlu 4 - Hanunuu

¹ Nakitan maan gid niku ti manga magpan-api sitay sa kalibutan. Nakitan niku ti manga maglumi manga pag-apihun, ag unman may namasulung ag namabisug sa kanda. Makapangyarihan ti manga magpan-api sa kanda.

² Nakan nakasabi aku mas mayad waya ti manga namatay kaysa manga buhi.

³ Dapat mas mayad waya gid ti manga unman waya nianak, ag unman nakakit manga kadautan sitay sa kalibutan.

⁴ Nakitan diman niku ti tawu magpangabudlay ag magbuwat gid sa kay kakayahan dahil maghirak siya sa kay kaparihu. Unman diman inda may pulus; ga parihu lang sa maglagas kawu durus.

⁵ Ti kurang sa intindi pag tawu bugyahin, harus mamatay siya sa lun-us.

⁶ Mas mayad waya diit lang kanmu karan-unun dapat may kahusayan kaysa mayamu kanmu karan-unun dapat magkakurian gid kawu sa pagpangabudlay, unman diman waydi may pulus. Ga parihu lang sa maglagas kawu durus.

⁷ May nakitan waya aku sitay sa kalibutan unman may pulus:

⁸ May usa ka tawu usa-usa magpangabuhi. Unman siya may anak ngatay patar-ari, dapat unman may apas kay magpangabudlay, ag unman siya magbaya sa kay kayamanan. Magbagaw siya sa kay sadili, “Udyi aku makabaya dahil sa masyadu pagpangabudlay. Dapat unman diman aku may matayakan kang pinamudlayan.” Unman inda may pulus! Maruku inda pag kalasi magpangabuhi!

⁹ Mas mayad ti may kaibahan kaysa usa-usa; mayamu sida mabuwat.

¹⁰ Nu nidaphag ti usa sa kanda bangunun siya niya kaibahan. Nakan kaawaawa ti tawu usa-usa nidaphag, dahil unman may mangawat sa kanya.

¹¹ Ag nu maramig, mahimu kamu maturug taraidan ag parihu kamu maimbungan. Dapat kabitay kawu maimbungan nu kawu lang usa?

¹² Madali kawu taluhun nu kawu lang usa, dapat nu may kaibahan kawu makuri kamu taluhun. Parihu diman sa lubid; nu tulu inda ka langbid, makuri inda bugtasun.

¹³ Mas mayad waya ti manga pugri pag kalay-awan may kadunungan kaysa gurangun pag hari balaw may intindi, unman magkaibug paanyuan.

¹⁴ Ag mahimu hari ati pag kalay-awan una napirisu siya, ag nianak siya pugri sa ati pag kaharian hari.

¹⁵ Dapat naisip niku una mayamu gid pag manga tawu sitay sa kalibutan ti sumunud sa ati pag kalay-awan nag-ublus sa hari,

¹⁶ ag unman mabilang kay manga tawu dumarahan, mahimu balaw makabaya sa kanya ti uryan pag manga sinulput. Inda unman diman may pulus; ga parihu lang sa maglagas kawu durus.