Manugtudlu 3 - Hanunuu

May Kanya-kanya Udas ti Tanan Buruwatun

¹ May kanya-kanya udas ti tanan buruwatun sitay sa kalibutan:

² May udas sa paglusad ag may udas diman sa pagkamatay, may udas sa tig-taranum ag may udas diman sa tig-arani,

³ may udas sa pagmatay ag may udas diman sa pagbulung, may udas sa pagguba ag may udas diman sa pagbungsud,

⁴ may udas sa paglumi ag may udas diman sa pagkasari, may udas sa manghimanglaw ag may udas diman sa pagbaya,

⁵ may udas sa pagwayak manga batu ag may udas diman sa pagtumpuk inda, may udas sa pagsarampakan, ag may udas diman sa pagbululagan,

⁶ may udas sa paghanap ag may udas diman sa pagkalyam, may udas sa paghamnu ag may udas diman sa pagyamut,

⁷ may udas sa paggisi ag may udas diman sa pagtahi, may udas sa unman mag-ingay ag may udas diman sa pagbagaw,

⁸ may udas sa pagmahal ag may udas diman sa pag-isug, may udas sa pag-arawayan ag may udas diman sa kahusayan.

⁹ Nu inda pag manga udas itinagka yi Diyus, unu nguna kay pulus sa pagpangabudlay tawu?

¹⁰ Nakitan niku ti manga buruwatun itinagka Diyus para sa tawu.

¹¹ Ag inda tanan itinagka Diyus mangyari sa kang-ud pag udas. Pinakan-an niya kita kagustuhan maalaman ti aratubangun, dapat unman gid nita masalman kay manga binuwat ginan sa kabag-u hanggan sa katapusan.

¹² Naalaman niku ti pinakamayad buwatun tawu habang buhi waya siya imaw ti pagbaya, pagbuwat mayad,

¹³ pagkaun ag pag-inum, ag ti pagpakasulung sa kay binudlayan. Inda pag manga bagay papalad Diyus.

¹⁴ Naalaman niku ti tanan manga pagbuwatun Diyus pumarargu tugka aban, ag balaw inda mauman. Pagbuwatun inda Diyus hampay gumalang ti tawu sa kanya.

¹⁵ Ti magpangyari taynguna ag ti mangyari di waya nangyari yi kaybi. Pag-ulit-ulitun lang Diyus ti manga magpangyari.

¹⁶ Nakitan diman niku sitay sa kalibutan ti kadautan imaw ti maghari kaysa katadlungan ag pagkamatadlung.

¹⁷ Magkumun aku sa kang sadili, “Sintinsiyahan Diyus ti matadlung ag ti daut pag manga tawu, dahil may itinagka siya udas sa kada buruwatun.

¹⁸ Pagsubukan Diyus ti manga tawu hampay ipakakit sa kanda parihu lang sida sa hayup.

¹⁹ Parihu lang ti patabgan tawu ag hayup; parihu sida mamatay. Parihu lang diman sida may arup, nakan ti tawu unman may ilangbaw sa hayup. Tutuu gid waydi ti tanan unman may pulus.

²⁰ Parihu lang ti patabgan tanan buhi pag linalang. Sida tanan ginan sa daga, ag sa daga diman sida pag bumalik.

²¹ Unman may nakaalam nu ti ispiritu tawu magpatungud ag ti ispiritu hayup magdugsun sa sirung daga.”

²² Nakan naisip niku ti pinakamayad buwatun tawu imaw ti pagbaya sa kay binudlayan, dahil para diman waydi inda sa kanya. Unman may makasabi sa tawu nu unu ti mangyari nu tigbak yi siya.